Autorodeo

Een autorodeo is een evenement daoras ze in Oost-Nederlaand drok op bint, waorbi'j een stok of vieftien olde auto's rondriedt op een deur een gröppel umringd grösveld en tègen mekare anknalt. De leste auto die as nog rieden kan, is de winnaar.

't Evenement is vake köppeld an een karmse, een feesttent mit meziek, enzowieder.

De auto's die mitdoet an de rodeo bint olde bakken die al haoste riep bint veur de sloop. Veur de veiligheid wördt de auto's estript; zo haalt ze d'r de raampies uut. Achter de bestuurdersstoel zet ze een iezern paol, en an de bestuurderskaante last ze een metalen plaot tègen de deure. De auto's wördt ok verstevigd an de wiedere flaanken en de veur- en achterkaante. Veur 't milieu wisselt ze de koelvluuistof umme veur water.

De auto's wördt op-espoten in teamkleuren en versierd mit namen en kreten. Ze wördt naor de race ebrocht op anhangwagens.

't Grösveld, det deur de auto's wördt ummeploegd töt een zaand- of (bi'j règen) modderveld, is ongeveer zo groot as een voetbalveld. In de midden lig een zaandbulte daoras de auto's umhenne riedt. Um de butengröppel hen lig een eerdewal. Daor weer achter staot hekken, en daorachter stiet 't pebliek.

De racers beukt mit de auto's tègen mekare an en perbeert mekare total loss te kriegen of in de gröppel te drokken en zo uut te skakeln. Umme de eigen motor te besparen, knalt ze vake van achtern tègen mekare an. De rodeo is op-edield in verskeiden rondes of manches, mit op 't ende een finale. Een manche vlagt ze of as d'r nog drei auto's riedt. De auto's kunt zölf ok in klasses verdield wèden, zoals töt an de twei liter en daorboaven.

Naost de finale kan d'r een 'wrakkenfinale' wèden van uuteskakelde auto's die naodien toch nog op-elapt bint.

De rodeo wördt evolgd deur een jury en een köppel skeidsrechters mit vlaggen. Dizze lu bint d'r ok veur de veiligheid en vlagt de race stil as d'r beveurbield een auto in de braand vlig.

Variaanten op de autorodeo bint ok in aandere laanden bekend; zo mut de Amerikaanse demolition derby in de jaoren vieftig van de twintigste eeuw, of daorveur nog, ontstaon wèden.

Banger racing wik van de autorodeo of deurdet ze op asfalt riedt en as eerste oaver een finish perbeert te komen. Dizze variaant viej in laanden as Nederlaand, België, 't Verienigd Keuninkriek en Ierlaand.

Fans van banger racing gaot vake maank dizze laanden de grèenze oaver umme de evenementen te bezuken.

Uut Autorodeo deur Jovink en de Voederbietels.

Dit stok is eskreven in 't Zuudwest-Zuud-Drèents van de Drèents-Oaveriesselse grèensstreek.