Paulo Coelho

Paulo Coelho
Ħajja
Twelid	Rio de Janeiro, 24 Awwissu 1947 (77 sena)
Nazzjonalità	Brażil
Familja
Konjuga/i	Christina Oiticica  (1980 -
Koppja/i	Christina Oiticica
Edukazzjoni
Alma mater	St. Ignatius College (en)
Lingwi	Portugiż
Okkupazzjoni
Okkupazzjoni	kittieb rumanzier bloggej attur kompożitur poeta ġurist kittieb tal-fantaxjenza liriċista kompożitur tal-kanzunetti riċerkatur
Parteċipant Timbalada concert (en) World Economic Forum Annual Meeting 2013 (en) World Economic Forum Annual Meeting 2015 (en) World Economic Forum Annual Meeting 2004 (en)
Post tax-xogħol	Brasilia Tarbes
Impjegaturi	Ġnus Magħquda
Xogħlijiet importanti	The Alchemist (en) The Fifth Mountain (en) Veronika Decides to Die (en) Eleven Minutes (en) Brida (en) By the River Piedra I Sat Down and Wept (en) The Devil and Miss Prym (en) The Zahir (en) The Witch of Portobello (en) The Spy (en)
Premjijiet	List Golden Feather  (2005) Kavallier tal-Leġjun tal-Unur Officer of Arts and Letters Chevalier des Arts et des Lettres Hans Christian Andersen Literature Award  (2007) Gold medal of Galicia  (1999)
Influwenzat minn	Jorge Amado (en) Henry Miller (en) William Blake (mul) Christina Lamb (en) Jorge Luis Borges (mul)
Sħubija	Brazilian Academy of Letters (en)
Moviment artistiku	mużika tal-Brażil

Paulo Coelho de Souza (/ˈkwɛl.juː, kuˈɛl-, -joʊ/^[1]; pronunzja bil-Portugiż: [ˈpawlu kuˈeʎu]; twieled fl-24 ta' Awwissu 1947) huwa kittieb tal-kanzunetti u rumanzier Brażiljan. Huwa membru tal-Akkademja Brażiljana tal-Arti Lingwistika.^[2] Ir-rumanz tiegħu The Alchemist bigħ iżjed minn 150 miljun kopja mad-dinja kollha u huwa l-iktar ktieb ta' kittieb Brażiljan li qatt inbigħ b'numri daqstant kbar. Huwa influwenza l-mużika rock Brażiljana permezz tas-sħubija tiegħu mal-mużiċista Raul Seixas.

Paulo Coelho twieled f'Rio de Janeiro, il-Brażil, u attenda skola tal-Ġiżwiti. Meta kellu 17-il sena, il-ġenituri ta' Coelho daħħluh f'istituzzjoni mentali li ħarab minnha tliet darbiet qabel ma nħeles meta kellu 20 sena.^[3][4] Iktar 'il quddiem Coelho rrimarka "Il-ġenituri tiegħi ma ridux iweġġgħuni, iżda ma kinux jafu x'se jaqbdu jagħmlu... Dak li għamlu m'għamluhx biex jeqirduni, iżda biex isalvawni".^[5] Skont ix-xewqat tal-ġenituri tiegħu, Coelho nkiteb fi skola tad-dritt u abbanduna l-ħolma tiegħu li jsir kittieb. Sena wara, telaq mill-iskola u għex ħajtu bħala hippie, u vvjaġġa fl-Amerka t'Isfel, fit-Tramuntana tal-Afrika, fil-Messiku, u fl-Ewropa. Huwa beda jieħu d-drogi fis-snin 60 tas-seklu 20.^[6][7]

Meta reġa' lura fil-Brażil, Coelho ħadem bħala kittieb tal-kanzunetti, u kkompona l-lirika għal Elis Regina, Rita Lee, u l-ikona Brażiljan Raul Seixas. Il-kompożizzjoni ma' Raul wasslet biex Coelho jiġi assoċjat mal-maġija u mal-okkult, minħabba l-kontenut ta' xi kanzunetti.^[8] Spiss jiġi akkużat li dawk il-kanzunetti kienu ġew ikkupjati minn kanzunetti barranin li ma tantx kienu magħrufa fil-Brażil dak iż-żmien.^[9] Fl-1974, skontu, huwa ġie arrestat għal attivitajiet "sovversivi" u ġie ttorturat^[10][11] mill-gvern militari fil-poter minn għaxar snin qabel u li kien iqis il-lirika ta' Coelho bħala xellugija u perikoluża.^[5] Coelho ħadem ukoll bħala attur, ġurnalist u direttur tat-teatru qabel ma beda l-karriera tiegħu bħala kittieb.^[8]

Coelho iżżewweġ lill-artista Christina Oiticica fl-1980. Flimkien preċedentement kienu jqattgħu nofs sena f'Rio de Janeiro u n-nofs l-ieħor f'villeġġatura fil-Pirinej fi Franza, iżda issa l-koppja tirrisjedi b'mod permanenti f'Ġinevra, l-Iżvizzera.^[12]

Fl-1986 Coelho għamel il-Pellegrinaġġ ta' San Ġakbu lejn Santiago de Compostela fil-Majjistral ta' Spanja.^[6][13] Fil-pellegrinaġġ kellu qawmien mill-ġdid spiritwali, li huwa ddeskriva b'mod awtobijografiku f'The Pilgrimage.^[14] F'intervista, Coelho stqarr "[Fl-1986], jiena kont tassew kuntent bl-affarijiet li kont qed nagħmel. Kont qed nagħmel xi ħaġa li biha kont qed nittrejjaq – biex nuża l-metafora f'The Alchemist, kont qed naħdem, kont qiegħed ma' persuna li nħobb, kelli l-flus, iżda ma kontx qed inwettaq il-ħolma tiegħi. Il-ħolma tiegħi kienet, u għadha, li nkun kittieb".^[15] Coelho abbanduna l-karriera tiegħu bħala kittieb tal-kanzunetti li biha kien qed jaqla' ħafna flus u minflok beda jikteb full-time.

The Pilgrim – Story of Paulo Coelho huwa t-titlu internazzjonali għall-film bijografiku Não Pare na Pista, koproduzzjoni bejn Drama Films tal-Brażil u Babel Films ta' Spanja, li fih Coelho adolexxenti u Coelho ikbar inħadmu minn żewġ atturi differenti. Waħda mill-produtturi, Iôna de Macêdo, qalet lil Screen International: "Il-film jirrakkonta l-ġrajja ta' raġel li għandu ħolma. Qisha l-ġrajja ta' Aliċe fl-Art tal-Għeġubijiet – huwa xi ħadd li kien kbir wisq għal fejn kien jgħix". Il-film, maħdum bil-Portugiż, intwera għall-ewwel darba fiċ-ċinema Brażiljani fl-2014 u ġie distribwit b'mod internazzjonali fl-2015.^[16]

Fl-1982, Coelho ppubblika l-ewwel ktieb tiegħu, Hell Archives, li ma rnexxilux jagħmel impatt sostanzjali.^[8] Fl-1986 huwa kkontribwixxa fit-tħejjija tal-Practical Manual of Vampirism (Manwal Prattiku tal-Vampiriżmu), għalkemm iktar 'il quddiem ipprova jneħħiħ mill-kummerċjalizzazzjoni peress li kkunsidrah "ta' kwalità ħażina".^[8] Wara li għamel il-pellegrinaġġ lejn Santiago de Compostela fl-1986, Coelho kiteb The Pilgrimage, li ġie ppubblikat fl-1987.

Filwaqt li kien qed jipprova jegħleb il-prokrastinazzjoni tiegħu biex jagħti bidu lill-karriera tiegħu bħala kittieb, Coelho ddeċieda, "Jekk nara rixa bajda llum, dik tkun sinjal li Alla jkun qed jagħtini li għandi nikteb ktieb ġdid". Malli ra waħda fil-vetrina ta' ħanut, huwa beda jikteb dakinhar stess.^[14] Is-sena ta' wara, Coelho kiteb The Alchemist u ppubblikah permezz ta' pubblikatur Brażiljan żgħir li inizjalment kienet stampat 900 kopja tal-ktieb u ddeċidiet li ma terġax tistampah.^[17] Sussegwentement huwa sab pubblikatur ikbar, u bil-pubblikazzjoni tal-ktieb ġdid tiegħu Brida, il-bejgħ ta' The Alchemist qabad ġmielu. Il-pubblikatur HarperCollins iddeċieda jippubblika l-ktieb fl-1994. Iktar 'il quddiem sar wieħed mill-iktar kotba li nbigħu internazzjonalment.^[17] F'intervista fl-2009 mar-rivista Sirjana Forward Magazine, Coelho stqarr li t-tradizzjoni Sufista kellha influwenza fuqu, b'mod partikolari meta kiteb The Alchemist u iktar 'il quddiem meta kiteb The Zahir.^[18]

Mill-pubblikazzjoni ta' The Alchemist, Coelho b'mod ġenerali kiteb mill-inqas rumanz wieħed kull sentejn. Erba' minnhom – The Pilgrimage, Hippie, The Valkyries u Aleph – huma awtobijografiċi, filwaqt li l-maġġoranza tal-kumplament huma fizzjoni. Kotba oħra, bħal Maktub, The Manual of the Warrior of Light u Like the Flowing River, huma ġabriet ta' saġġi, artikli tal-gazzetta, jew tagħlimiet magħżula. Ix-xogħol tiegħu ġie ppubblikat f'iktar minn 170 pajjiż u ġie tradott bi tlieta u tmenin lingwa. B'kollox inbigħu 320 miljun kopja tal-kotba tiegħu kollha.^[19] Fit-22 ta' Diċembru 2016, Coelho ġie elenkat mill-kumpanija bbażata fir-Renju Unit, Richtopia, bħala n-numru 2 fil-lista tal-200 l-iktar awturi kontemporanji influwenti.^[20]

Madankollu, fost ir-reazzjonijiet għall-kitba tiegħu kien hemm ukoll kontroversji. Għalkemm huwa trabba f'familja Kattolika, u hu jiddeskrivi lilu nnifsu bħala Kattoliku anke issa, il-fehmiet tiegħu ġew deskritti bħala inkompatibbli mal-fidi Kattolika, minħabba l-kontenut panteisti, relattivisti u tal-Era l-Ġdida fil-kitba tiegħu.^[21] U minkejja l-bejgħ tal-kitbiet tiegħu, ir-reċensjonijiet tax-xogħol ta' wara ta' Coelho b'mod konsistenti jinnutaw is-superfiċjalità tagħhom.^[22][23][24]

Fl-2016, huwa ġie kkuntattjat mill-plejer tal-basketball Kobe Bryant, li ried jiddiskuti proġett ta' ktieb għat-tfal miegħu. Xi xhur qabel il-mewt ta' Bryant f'ħabta b'ħelikopter f'Jannar 2020, huma kienu qabdu jiktbu l-ktieb flimkien, iżda malli sema' bit-traġedja, Coelho ddeċieda li jħassar l-abbozz kollu, u f'intervista qal li "ma kienx jagħmel sens li jippubblika l-ktieb mingħajru". Huwa ma qalx kemm kienu nkitbu paġni jew jekk il-ktieb kienx ingħata titlu.^[25][26]

Fl-2018, ġie mħabbar li Coelho kien iffirma ma' sensiela tat-televiżjoni bbażata fuq il-karattri tar-rumanzi tiegħu The Devil and Miss Prym, Brida u The Witch of Portobello.^[27][28]

1. ^ J C Wells (2008), Longman Pronunciation Dictionary. Pearson Education Limited.
2. ^ "Academia Brasileira de Letras".
3. ^ "Paulo Coelho Interview by Marika Schaertl @ Focus Munich". Paulo Coelho (bl-Ingliż). 2007-12-19. Miġbur 2021-08-24.
4. ^ DOLAND, ANGELA (2007-05-12). "Author Paulo Coelho Thrives on Extremes" (bl-Ingliż). Miġbur 2021-08-24.
5. ^ ^{a b} "A mystery even to himself". www.telegraph.co.uk. Miġbur 2021-08-24.
6. ^ ^{a b} "An interview with Brazilian spiritual fiction writer, Paul Coelho". web.archive.org. 2014-02-09. Arkivjat minn l-oriġinal fl-2014-02-09. Miġbur 2021-08-24.
7. ^ Nast, Condé (2007-04-30). "The Magus". The New Yorker (bl-Ingliż). Miġbur 2021-08-24.
8. ^ ^{a b ċ d} "Biography". web.archive.org. 2009-01-31. Arkivjat minn l-oriġinal fl-2009-01-31. Miġbur 2021-08-24.
9. ^ "Cópia Infiel: Ato 1, Raul Seixas e o Dolo de Ouro". whiplash.net (bil-Portugiż). Miġbur 2021-08-24.
10. ^ "Opinion | Paulo Coelho: I was tortured by Brazil's dictatorship. Is that what Bolsonaro wants to celebrate?" (bl-Ingliż). Miġbur 2021-08-24.
11. ^ "Bolsonaro: the dark ages are back". Paulo Coelho (bl-Ingliż). 2019-03-30. Miġbur 2021-08-24.
12. ^ "Interview with Paulo Coelho". web.archive.org. 2016-06-12. Arkivjat minn l-oriġinal fl-2016-06-12. Miġbur 2021-08-24.
13. ^ "Teacher's Guide to The Alchemist" (PDF). Arkivjat minn l-oriġinal (PDF) fl-2009-03-27. Miġbur 2021-08-24.
14. ^ ^{a b} "Paulo Coelho Dances with Angels". www.beliefnet.com (bl-Ingliż). Miġbur 2021-08-24.
15. ^ "BBC World Service | World Book Club". www.bbc.co.uk. Miġbur 2021-08-24.
16. ^ Barraclough, Leo; Barraclough, Leo (2014-08-05). "Picture Tree Acquires Paulo Coelho Biopic 'The Pilgrim' (EXCLUSIVE)" (bl-Ingliż). Miġbur 2021-08-24.
17. ^ ^{a b} "Sant Jordi Asociados". web.archive.org. 2008-08-02. Arkivjat mill-oriġinal fl-2008-08-02. Miġbur 2021-08-24.Manutenzjoni CS1: BOT: url-oriġinali status mhux magħruf (link)
18. ^ "Paolo Coelho tells Syrians: My writings are influenced by your Sufi tradition" (bl-Ingliż). 2009-04-12. Miġbur 2021-08-24.
19. ^ Heller, Karen. "Meet the writers who still sell millions of books. Actually, hundreds of millions".
20. ^ Team, ConantLeadership. "richtopia-top-200-authors". ConantLeadership (bl-Ingliż). Miġbur 2021-08-24.
21. ^ "Paulo Coelho: ¿alguna objeción desde la fe cristiana?". Aleteia.org | Español - valores con alma para vivir feliz (bl-Ispanjol). 2014-07-23. Miġbur 2021-08-24.
22. ^ "Observer review: The Zahir by Paulo Coelho". the Guardian (bl-Ingliż). 2005-06-19. Miġbur 2021-08-24.
23. ^ "Adultery, Paulo Coelho, book review: New novel fails to stimulate". The Independent (bl-Ingliż). 2014-09-15. Miġbur 2021-08-24.
24. ^ Woodhead, Cameron (2017-01-16). "The Spy review: Paulo Coelho's fictional take on Mata Hari misses the mark". The Sydney Morning Herald (bl-Ingliż). Miġbur 2021-08-24.
25. ^ Press, the Associated; Press, the Associated (2020-01-27). "Co-Author of Kobe Bryant Children's Book Deletes Unfinished Draft" (bl-Ingliż). Miġbur 2021-08-24.
26. ^ "Author deletes children's book co-written with Kobe Bryant". AP NEWS (bl-Ingliż). 2021-05-01. Miġbur 2021-08-24.
27. ^ Andreeva, Nellie; Andreeva, Nellie (2018-05-01). "Drama Series Based On Books By 'The Alchemist' Author Paulo Coelho In Works At FremantleMedia North America" (bl-Ingliż). Miġbur 2021-08-24.
28. ^ Hazelton2018-05-01T18:32:00+01:00, John. "Paulo Coelho signs with FremantleMedia for first TV series". Screen (bl-Ingliż). Miġbur 2021-08-24.