Aminah binti Wahb

Galat skrip: tidak ada modul tersebut "Infobox Wikidata".

Aminah binti Wahb (bhâsa Arab: آمنة بنت وهب; ʾĀminah binti Wahb', sèdhâ è taon 577 Masèhi) èngghi panèka èbhuna Nabbhi Muhammad Saw.^[1]

Aminah èbhâbhâraghi è Mekka. Abana èngghi panèka katowana Bâni Zuhrah sè asmana Wahb bin Abdi Manaf bin Kilab bin Ka'ab bin Lu'ay bin Ghâlib bin Fihr.^[2] Anapon dhinèng èbhuna asmana Labirah binti Abdil 'Uzza bin Utsman bin Abd ad-Dar bin Qushay bin Kilab bin Murrah bin Ka'ab bin Lu'ay bin Ghalib bin Fihr.^[3]

Aminah èbhâbhâraghi è ngatengngana abâd sè kapèng 6 Masèhi ḍâri kalowarga sè èpandhâng mènangka kabilah sè sanget èmojâ'aghi bân ngaghungè potra-potrè sè moljâ. Sa'èngghâ Nabbhi Muhammad Saw. ampon adhâbu:

"Allah ros-terrosân ngallè kaulâ ḍâri tolang roso' sè bhâghus ḍâ' ka rahim sè soccè, bân terdidik. Sobung jhâlân sè aranca' dhâddhi duwâ', kajhâbâna kaulâ bâḍâ è jhâlân sè palèng bhâghus."

Aminah binti Wahb panèka araka sareng sapopona sè asmana Abdullah bin Abdul Mutthallib. Aminah è bâkto ka'dissa mènangka orèng binè' sè palèng moljâ ḍâri kaom Quraisy ḍâlem nasab otabâ kadudughân è masyarakat. Ḍâri kamoljâ'ân ka'dissa, Aminah èangghâp bisa makompol kamoljâ'ânna duwâ' kamoljâ'ân katoronan Abdi Manaf sè bhâkal ètoronaghi ḍâ' ka potrana, èngghi panèka Abdi Manaf bin Zuhrah bin Kilab, bân Abdi Manaf bin Qushai bin Kilab.^[4] Parkara ka'dissa sè abhuktè'aghi jhâ' Nabbhi Muhammad panèka orèng moljâ sè ètoronaghi ḍâri orèng moljâ sè ampon èpèlè ḍâri orèng moljâ. Akadhi dhâbuna Rasulullah Saw. è ḍâlem sèttong hadits sahih:

"Sa'ongghuna Allah Swt. ampon mèlè Kinanah ḍâri potra-potrana Ismail, bân mèlè Quraisy ḍâri Kinanah, bân mèlè Bâni hasyim ḍâri Quraiys, bân mèlè kaulâ ḍâri Bâni Hasyim".^[4]

Aminah ampon kennal sareng Abdullah ḍâri ghi' kènnè', polana kalowarga Bâni Hasyim panèka kalowarga palèng semma' sareng Bâni Zuhrah. Ḍâri bânnya'en orèng lakè' sè èntar mènta Aminah, sala sèttongnga panèka Abdullah bin Abdul Muthallib, sè bâkto panèka sobung orèng lakè' sè lebbi moljâ ḍâri Abdullah è ḍâlem nasab bân kamoljâ'ân kapamimpinan è masyarakat.^[4]

1. ↑ Al-A'zami, Muhammad Mustafa. (2003), The History of The Qur'anic Text: From Revelation to Compilation: A Comparative Study with the Old and New Testaments. UK: Islamic Academy. Kaca 22. ISBN 978-1872531656.
2. ↑ Hisyam, Ibnu (1990). "As-Sirah an-Nabawiyah". Beirut: Ihya at-Turats al-'Arabi. jld. 1. Kaca 156.
3. ↑ Hamami, Bassam Muhammad (2015). 39 Tokoh Wanita Pengukir Sejarah Islam. Jakarta: Qisthi Press. Kaca 10.
4. ↑ ^{4,0 4,1 4,2} Abdurrahman, Aisyah. (2018). Biografi Istri dan Putri Nabi. Sukoharjo: Ummul Qura.