Stema de Com

Quell articol qì l'è scrivud in Lombard, cond l'ortografia Scriver Lombard.

Stema de Com
Blasonadura
De ross a la crox d'arjent

Ol stema storeg de Com l'è un scud ross con una crox d'arjent.

Ol stema ofiçal del Cumun de Com l'è: de ross a la crox d'arjent centrada, al mot Libertas de neger in banda ind el quart canton.^[1] L'è stait ricognossid con decret del Capo del Govern del 17 avril 1936.

La crox bianca in camp ross la nass in Lombardia come simbol gibellin, derivada da la Blutfahne, la bandera de l'imperador del Sacro Roman Impero.

Ol simbol citadin l'è descrid per la prima volta come rubra signa (segn ross), con sota-intendid cum cruce alba (con crox bianca), ind un poema sœ le guerra di Dex Agn (1118-1127) con Milan, componida da un anonem comasc de l'epoca.

La plœ antiga rapresentazion cognossida del stema l'è ind el stemare de la Biblioteca Trivulziana a Milan (codex n. 1390).

ind el 1680, ind la pianta topografega de Com de un'opera de V. Coronelli, la compar per la prima volta la corona, disegnada come una corona feudala: un circol pien de jeme, con vot ponte (cinq qe i s'pœl veder) perlade.

ind el Regn d'Italia Napoleoneg Com l'è una Bona Citaa de segonda class, a l'antiga crox l'è jontad ol canton franc destro de verd a la letera N d'arjent, con sora una stella de l'istess.^[2]

Ol 9 de november del 1819, l'imperador Francesc I d'Austria al recognossiva a Com ol titol de "Citaa Regia", e la corona la entra d'ofiçal ind el stema. Dopo la conquista de la Lombardia da part del Regn de Sardegna, la corona l'è cimada da ses fioron d'or (tri qe i s'pœl veder), tegnids da ponte, alternads da quater perle (do qe i s'pœl veder) tegnide da ponte; ol cercc l'è decorad con jeme romboidale e sferige alternade.

La prima menzion l'è del 1619, ind l'œvra Compendio delle croniche di Como de Francesco Ballarini: segond lu, ol mot latin Libertas al vegneress da la liberazion de la citaa dal dominio de Milan grazie al Barbarossa, e l'era scriit ind el mez del stendard comunal.

Al saress stait tirad vià ind le dominazion di Visconts prima e, dopo ol brev periodo de republica, di spagnœi dopo.

A la fin l'è tornad ind el 1859. La scriita la permetiva anc de distenguir-l dal stema del Regn d'Italia.^[3]

• 
  Ol stema sota ol dominio napoleoneg.
• 
  Ol stema ofiçal al dé d'incœ.

• Stemma comunale - Sit ofiçal del Cumun.

1. ↑ Stemma di Como - comuni-italiani.it
2. ↑ Pietro Fontana, Lo stemma di Torno in un sigillo del comune e l'antico e il moderno stemma di Como, pp. 24-26, Casa Editrice Emo Cavalleri, Como, 1935
3. ↑ Cesare Cantù, 1963