Leif Ericsson

Leif Erikson (Islanda, ca. 970 – ca. 1020) o l'é stæto un esploratô islandeize, o primmo œüropeo a sbarcâ inti Americhe.

Leif Ericsson

Alexander Stirling Calder, Leif Ericsson, 1930, Hallgrímskirkja (Islanda)

Dæti personâli

Nàscita: 970 c.
Mòrte: 1020 c.

Âtre informaçioìn

Profesción: esploratô

Nasciuo intorno a-o 970, segondogenito de Erik o Rosso (Eiríkur Raoði), un norvegin, figgio de Thorvald Asvaldsson, pro-nevo de Naddoddr, o descrovitô de l'Islanda. So moæ a l'ea Þjoðhildur. So poæ o l'aveiva fondao doe colònie vichinghe, l'Insediamento Ocidentâ e l'Insediamento Orientâ, in Groenlandia, tæra a-a quæ o mæximo aveiva dæto o nomme.

Durante un soggiorno in Norvegia, Leif o se convertì a-o crestianeximo, comme tanti âtri vichinghi a l'epoca; o l'andò into paise scandinavo ascì pe servî o re Olaf Tryggvason. De ritorno in Groenlandia o l'accattò a barca de Bjarni Herjólfsson e o partì in esploraçion da tæra che Bjarni o l'aveiva descoerto, o Nordamerica.

Uña de saghe, a saga di groenlandeixi, a nara che Leif o començò a preparase circa into 1000 pe seguî a rioso a rotta de Bjarni. A primma tæra ch'o l'incontrò o l'ea coverto da di ciappoin ciatti (norvegeize antigo: hellr), coscì lê o-o ciammò Helluland (tæra de prie ciatte), che presumibilmente a l'é l'odierna Isoa Baffin. De lì o l'arrivò presso una tæra ciatta e boscosa, con de ciazze gianche, ch'o ciammò Markland (tæra di bòschi), che se ritegne a segge o Labrador.

Doppo atri doi giorni de navegasion toccon torna tæra e ghe costruin un insediamento dæto che o scito o l'ea conforteive, i sciummi pin de sarmoin e o clima tempiao: d'uverno ziava de ræo e l'erba a l'arestava verde. Areston lì pe tutto l'inverno. Segondo a saga un di ommi de Leif, Tyrkir, un guerrê germanego, o scrovì de l'uga: pe questo, Leif o ciammò quella region Vinland. Quantunque no se conosce l'esatta ubicaçion do Vinland, se ritegne ch'a segge inte'n punto indefinio fra Tæranœuva e a Virginia (molti ritegnan che l'insediamento presso L'Anse aux Meadows fu a colonia de Leif, ma âtri sostegnan che a doveiva trovase ciu a sud, da-o momento che l'uga a no cresce coscì a nord, sciben che foscia a l'aviæ posciuo crescighe durante o periodo cado medioevâ).

In sce-a stradda do ritorno, Leif o sarvò un naofrago islandeize de nomme Þórir insemme a-o so equipaggio, fæto ch'o ghe varse o nomiagio de "Leif l'afortunao" (in norvegin antigo Leifr hinn heppni).

Un'âtra lezzendia, a Saga de Erik o Rosso, a conta che fu realmente o Leif a scrovî e tære d'America, mentre ch'o resegondava in Groenlandia da-a Norvegia, verso l'anno 1000, ma no gh'è prœuva de'n so tentativo de fondaghe un insediamento. A ogni moddo, a Saga di groenlandeixi a l'é ritegnua a-a giornâ d'ancœu a ciù affidabile de doe.

Pe quante ne semmo, Leif o l'ebbe doi fræ, Thorvald Erikson (in norren Þorvald) e Thorstein Erikson (Þorsteinn), e una sœu, Freydís. O sposò Þórgunnur e o l'ebbe un figgio, Thorkell Leifsson (Þorkell).

• Wikimedia Commons a contêgne di files in sce Leif Ericsson