Klummesj

Dit artikel is gesjreve (of begós) in 't Klummesj. Laes hie wie v'r mit de versjillende saorte Limburgs ómgaon.

't Dialek van Klumme, dat van 't buurtsjap Termaar en dat van 't kèrkdörp Ranzel lieke hièl väöl opein. Dit kump ouch umdat de sjoeël in Klumme liek. Harie Eussen sjreef 'ne Klank en vormlieër van 't Ranzels en maakde 'n lies van werkweurd in 't Ranzels dialek. Eussen beweert dat 't dialek euverein kump mèt dat van Klumme. De gehuchte Gerieësjbrich, Geweustrao höbbe get ander oetsjpraok van bepaalde weurd en 't versjil mèt 't Sjins en 't Wieldersj is al groeëter. 't Versjil mèt 't Valkebergs is bès opvallend. Klumme lik op de grens van 't versjiensel r-sjoew (r-deletie). Versjillende dialekte ten oeëste van Valkeberg laote de r in bepaalde gevalle wegvalle, veural veur 'n t aan 't woordeind: poaët= poort, weut= woorden; zjwat= zwart. 't Ranzels haet väöl Heeëlese kènmerke meh gebruuk die r waal nog. De grens mèt de r-deletie löp dus ónmiddellik oeëstelik en de grens van de lidweurd d'r en g'ne löp pal westelik langs Klumme-Ranzel.