Keizersloup

Dit artikel is gesjreve in 't Mofers. Ómdat 't plaatsgebónge is, maogs doe 't ómzètte nao 't Naers, es te dit dialek sjpriks.

De Keizersloup, Keizersluip, Kwirloup (Nederlandjs: Keizersloop) is 'ne waterloup inne Nederlandjse pervinsje Limbörg (Midde-Limbörg), dae bie Naer oetmundj inne Naerbaek.

De Keizersloup óntsteit in 't landjboewgebied tösse Rogkel en Naer oet e stilsel van aafwateringsknaelkes die alein t'n tieje van raengerval water doon veure. Vanoet 't gehuch Brumholt löp 't water nao 't oeaste langs 't gehuch Dries (Keizersbós), wo ouch gróndjwater nao baove kump. Vanaaf hie wuuertj de Keizersloup 'ne netuurlike waterloup en struimp t'r vervolges óngere Napoleonsbaan door en dore dörpskómp van Naer veur dao oppe Naerbaek aaf te watere. In Naer wuuertj de Keizersloup ouch waal de Kwirloup geneump, nao de veurmaolige Cuirmeule, 'n watermeule die hie wersjienlik inne vieftieëndjen ieëf haet gelaenge.