Manaus
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Manaus (oetspraok in 't Braziliaans Portugees: [mɐˈnaws]) is 'n stad in Brazilië, hoofstad en groetste stad vaan de staot Amazonas. De stad had in 2014 2.020.301 inwoeners (allein de gemeinte) en is daomèt de zevende groetste gemeinte vaan 't land. 't Aontal veurstei is beperk. Oondaanks zien mieljoenepopulatie ligk de stad hendeg geïsoleerd in 't regewoud; ze is vaanoet 't kösgebeed allein euver de Amazone en door de loch te bereike. Manaus woort in 1669 gestiech es fort bij de munding vaan de Rio Negro in de Amazone. 't Dörp wat um 't fort greujde kraog in 1695 de naom Nossa Senhora da Conceição; in de volksmoond beter bekind es Lugar do Barrio do Negro. In de negentienden iew explodeerde de bevolking door de greujende vraog nao rubber, wat hei verhandeld woort. Zoewel door de väöl proonkvol gebouwe es door 't beröch nachleve kraog de stad de bijnaom Paries vaan de Trope. Zienen huiege naom woort in 1856 gegeve, tot 1937 es Manaós gespeld, en verwijs nao d'n Indiaonestam dee hei vaanajds woent. Allewijl trèk Manaus väöl (eco)toeriste wie ouch lui die op de belastingvrij zone aofkoume die vaan regeringsweeg in de stad is ingestèld.
