Italiaons hierevoetbalèlftal

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

't Italiaans hierevoetbalèlftal, bijgenaom Gli Azzuri ('de blauwe'), is e voetbalteam wat Italië in interlandwèdstrije vertrejt. 't Land kint al hiel laank 'n rieke en deep gewortelde voetbalcultuur, en 't Italiaans èlftal heet zoewel vreuger es recint groete successe behaold. 't Team is veer kier wereldkampioen geweure; daomèt steit 't op gelieke huugde mèt Duitsland en mer einen titel achter Brazilië. 't Èlftal weurt gereguleerd door d'n Italiaanse voetbalboond (FIGC).

't Èlftal woort in 1910 opgeriech; 't ierste speul, tege Fraankriek, woort geliek mèt 6-2 gewonne. Italië kós toen al e bleujend clubvoetbal mèt 'n voetbalcultuur die de Ingelse nao de kroen kós steke. Op de Olympische Speule in Amsterdam vaan 1928 woorte ze daarde, nao e verluus tege Uruguay (toen mesjiens wel 't bèste team vaan de wereld) en 'n wins tegen Egypte. Aon 't WK vaan 1930 deeg Italië neet mèt; 't volgend WK woort in eige land gehawwe en dao woort 't land direk wereldkampioen. Veer jaor later, in Fraankriek, lökden 't um deen titel vas te hawwe.

In 1949 raakden 't Italiaans voetbal bij de Superga-vleegramp in eine klap tien vaan zien speulers kwiet. De volgende jaore zouw 't voetbal geine sjiem zien vaan 't team wat veur d'n oorlog 't wereldvoetbal had gedomineerd. In de jaore viefteg en zèsteg evels kaom 't clubvoetbal in 't land tot groete huugde, en 't niveau vaan 't nationaol èlftal steeg mèt. Bij 't WK vaan 1966 waore ze de groete favoriete, meh in de grópsfaas verlore ze vaan de Sovjet-Unie en vaan Noord-Korea. Veural 't lèste späöl woort toes in Italië es 'n groete sjan gezeen. Nog jaore daonao repe de Italiaanse supporters vaan Corea, Corea es 't team ins oondermaots presteerde. Beter góng 't ze aof op 't EK vaan 1968 in eige land, wat ze wonne. Dit is tot nog touw de lèste kier tot Italië 'nen Europesen titel pakde. In 1970 woorte ze twiede op 't WK, in 1978 daarde (nao e verluus tege Nederland).

Italië waor weer gans trök wie 't in 1982 de wereldtitel pakde, oonder coach Enzo Bearzot. Bearzot zouw aonblieve tot 1986, meh de tegevallende prestaties dege häöm toch aoftrejje. In 1990 kaom 't WK obbenuits nao Italië; 't land deeg 't hei beter es veer jaor ieder en haolde de daarde plaots. 't Team hanteerde in dezen tied e zier defensief en op 't rizzeltaot geriech speul, boebij ze 't leefste vreug in de wèdstrijd scoorde en daan de res vaan d'n tied dee veursprunk door negatief voetbal perbeerde vas te hawwe. Allewel tot 't mier ploge gaof mèt zoe'n tactiek, haolde Italië heimèt in 1994 zelfs de finaal vaan 't WK, boe 't tege Brazilië oetindelek tot penanties kaom.

Op volgende toernoje waor 't team minder succesvol, mèt oetzundering vaan de twiede plaots op 't EK vaan 2000. In 2006 lökden 't Italië evels, gans oonverwach, um 't WK veur de veerde kier te winne. Sindsdeen heet 't team gekwakkeld. Slechte prestaties op 't EK vaan 2008 en de WK's vaan 2010 en 2014 woorte aofgewisseld mèt 'n twiede plaots op 't EK vaan 2012.

't Deepdepunt kaom in november 2017: Italië kaom de kwalificatie veur 't WK vaan 2018 neet door en oontbraok veur d'n ierste kier in zèsteg jaor op e WK. Oonder de nuie coach Roberto Mancini woort 't team umgegoejd. Heer bewoerde allein de bèste aw speulers, en veurde 't totaolvoetbal in, boe neve 't verdeidege boe Italië um bekindstoont ouch aondach kaom veur d'n aonval. Zien werkwijs waor hendeg succesvol: Italië won 't EK vaan 2021 en kraog ouch väöl complimente euver de veerkrach en 't good speul vaan zie team. Veur 't WK vaan 2022 wis 't team ziech evels obbenuits neet te plaotse, nao e compleet oonverwach verlees vaan Noord-Macedonië.