Fernando Ricksen

Dit artikel is gesjreve in 't Mestreechs. Ómdat 't plaatsgebónge is, maogs doe 't ómzètte nao 't Heëlesj, es te dit dialek sjpriks.

Fernando Jacob Hubertina Henrika Ricksen (27 juli 1976 – 18 september 2019) waor 'ne Nederlands-Limbörgse profvoetballer, dee ouch oetkaom veur 't Nederlands èlftal. Heer späölde es rechsback of rechshaaf.

Ricksen woort gebore in 'n arbeiersfemilie in Heerle. Dat leve umsjreef heer later es 'ne meujeleken tied, boe heer neet op trök wouw zien. In 1988 woort heer gescout door Roda JC, boe heer in de jäög góng speule. Veer jaor later wisselde heer nao Fortuna Sittard, nog ummer in de jäög; heer späölde dao oonder mie same mèt Mark van Bommel. In 1993 debuteerden 'r in 't iersten èlftal.

In 1997 góng heer euver nao AZ, neet allein um carrièr-reies meh ouch um te breke mèt 't milieu vaan zien awwers. Dao trof heer ouch zien vrouw, Graciela l'Ami, mèt wee 'r in 2000 trouwde. Datzelfde jaor góng heer speule bij Glasgow Rangers in Sjotland, daan nog 'n Europese topclub, en debuteerde heer bij 't Nederlands èlftal. In zienen tied bij de Rangers kaom heer ouch boeten 't veld bekind te stoon, um zie hedonistisch leve mèt väöl drinke, snoeve en boetenechteleke affaire. Oonder invlood deeg heer dèks gewelddaodege dinger; in 2003 woort heer veroerdeild veur de mishandeling vaan 'ne naober. In 2006 mós heer ziech zelfs laote opnumme um zien alcohol- en cocaïneverslaving.

Datzelfde jaor stapde Ricksen euver nao Zenit Sint-Petersbörg, iers nog op huurbasis, later es contrakspeuler. Zien verslavinge kreeg heer neet oonder controle, zoe wieneg wie zien affaire mèt aander vrouwlui. In 2010 sjeide Ricksen en zien vrouw officieel, nao al e jaor oeterein te zien. Ricksen góng trök nao Limbörg en späölde de res vaan zien carrièr bij Fortuna oet en góng daonao wijer bij de amateurs vaan RKSV Minor oet Nut. Rechszake tege zien ex-vrouw späölde nog tot in 2014.

Op 30 oktober 2013 maakde Fernando Ricksen bekind tot heer lijde aon ALS, 'n degeneratief spierkrenkde boe me gemeinelek binne de paar jaor aon doedgeit. In 2014 trouwde heer mèt zien twiede vrouw, de Russische Veronika. Naotot heer neet mie kós voetballe góng heer in Valencia woene. Sindsdeen verslechterde zien situatie. Zien vitaol functies bleve evels stabiel.^[1] Oonderwijl (september 2018) kin heer allein nog mèt 'nen ougesjriever praote.^[2]

Ind 2018 zörgde 'ne medische fout deveur tot heer bekaans doedbleef. Heer woort veur 'nen aandere patiënt aongezeen en op ziene rögk gelag, wat häöm d'n aosem benaom.^[3] Oetindelek storf heer op 18 september 2019 in e hospice in Sjotland.^[4]

In zien (ierste) veer jaor in 't ierste vaan Fortuna Sittard späölde Ricksen 97 kier en maakde heer 7 gole. In 1995 woort heer mèt zien club kampioen vaan de Ierste Devisie en promoveerde heer direk nao de Ieredevisie. Bij AZ scoorde heer in 92 matche 10 kier, bij de Glasgow Rangers in 182 matche 13 kier, bij Zenit in 36 matche 2 kier. In zien lèste jaore bij Fortuna scoorde heer nog eine gool in 27 matche.

Ricksen späölde tösse 2000 en 2003 twelf kier in 't Nederlands èlftal, miestal es invaller. Heer maakde in 't oranje gein gole.

Dit artikel is gebaseerd op, meh neet vertaold oet, 't corresponderend Nederlandstaoleg artikel, en wel in dees versie.

1. ↑ Nu.nl - ALS-patiënt Ricksen ontkent dat situatie flink is verslechterd
2. ↑ Nu.nl - ALS-patiënt Fernando Ricksen praat via computer met gezin
3. ↑ De Stentor - Zwolse biograaf Vincent de Vries: ‘Fernando Ricksen vocht voor z’n leven na blunder in ziekenhuis’
4. ↑ Nu.nl - Oud-voetballer Fernando Ricksen (43) overleden aan ALS