Europese Gemeinsjap veur Atoomenergie

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

De Europese Gemeinsjap veur Atoomenergie (Ingels: European Atomic Energy Community, EAEC) of kort-eweg Euratom is 'n internationaol organisatie mèt es buut 't promote vaan vreizaom touwpassinge vaan kernenergie.

De lidstaote vaan Euratom zien allemaol lidstaote vaan de Europese Unie (EU). De organisatie is opgeriech op 25 miert 1957 es rizzeltaot vaan 't Verdraag vaan Roeme. Mèt datzelfde verdraag woort ouch de Europees Ikkenomische Gemeinsjap opgeriech.

De Euratom is 'n aofzoonderleke organisatie, mer veur beslissinge gebruuk zie de instituties vaan de Europese Unie (Europees Parlemint, Europese Raod, Europees Kemissie). Op 1 jannewarie 1958 trooj 't Euratom-verdraag in wèrking en woort de Kemissie veur Euratom geïnstalleerd in Breusel. In 1967, mèt intwèrkingtreiing vaan 't Fusieverdraag kraog de Euratom same mèt de Ikkenomische Gemeinsjap en de Europees Gemeinsjap veur Kole en Staol ein Kemissie, eine Raod en ein begroeting. Alle len die touwtreije tot de EU mote ouch touwtreije tot de Euratom.

Allewel 't opriechtingsverdraag vaan de Euratom veur onbepaolden tied is geslote en noets is veraanderd, gief 't al sinds 2003 kritiek um 't Verdraag te herzien. Zoe gief 't väöl nui lidstaote sinds 1957 die gaaroet noets interesse höbbe getoend um mie te innovere in kernenergie. Ouch gief 't veer vaan de oorsproonkeleke lede (Belsj, Duitsland, Italië en Nederland) die ummertouw mie gefocus zien op 't aofbouwe vaan 't gebruik vaan kernenergie. Ouch nuier lidstaote, wie Zwede, riechte ziech dao-op.