Boton
En vestes moderna e la desinia de moda, un boton es un fisador peti, aora fabricada plu comun de plastica ma ance fabricada de metal, lenio, o concas, cual junta du pesos de stofa a lunlotra. En arceolojia, un boton pote es un ojeto fabricada sinifiante. En la artes pratical e en artisania, un boton pote es un esemplo de arte tradisional, de arte de studio, o an un obra miniatur de arte.
Botones es plu comun juntada a vestes, ma pote ance es usada sur contenintes como bolsas e portamones. Ma botones pote es coseda a vestes e cosas simil sola per orna. Botones deveni fisadores par lisa tra un anelo de stofa o filo, o par lisa tra un buco de boton. Otra tipos de fisadores inclui zipes, velcro, e magnetes.
Botones e ojetos botonin usada como ornas o selos en loca de como fisadores ia es descovreda en a la Sivilia de la Vale de Indo en sua fase Kot Diji (sirca 2800 a 2600 aec) e la locas de la eda de bronze en Xina antica (sirca 2000 a 1500 aec) e en Roma antica. Botones fabricada de concas ia es usada en la Sivilia de la Vale de Indo per intendes de orna an pos 2000 aec. Alga botones ia es taliada en formas jeometrial e ia ave foras perforada en los afin los pote es afisada a vestes con fileta.
Botones funsional con bucos per fisa o clui vestes ia apare prima en Deutxland en la sentenio 13. Los ia sperde vasta con la aveni de vestes streta a la corpo en Europa de la sentenios 13 e 14.
Car botones ia es fabricada de cuasi tota materia posible, natural o sinteseda, e combinas de ambos, la istoria de la composa material de botones refleta la curso de la tecnolojia de materias.
Botones pote es fabricada par artisanes o artistes individua de materias cru o ojetos trovada (pe fosiles), o un combina de ambos. En loca, los pote es la produida de industria de caseta par tecnolojias simple, o los pote es produida en fabricerias de tecnolojia avansada. Botones fabricada par artistes es ojetos de arte, conoseda a coliores como "botones de studio".
En 1918, la governa de la SUA ia sonda estendeda la mercato internasional de botones, cual lista botones fabricada de ivor vejetal, metal, vitro, galalito, seda, stofa de lino, croxe covreda con coton, plomo, esmalte, cauxo, cornos de servos, lenio, oso, cuoro, paper, carton presada, nacre, seluloide, porselana, polvo colida, stanio, zinco, petra, lenio covreda par stofa, e paper maxada. Ivor vejetal, cual usa la semes de alga palmas como la tagua, ia es la plu popular materia per usa con camisas e vestones. Paper maxada ia es la plu comun materia per botones sur sapatos e botas.
Oji, plastica dur, concas, metales, e lenios es la materias la plu comun per la fabricada de botones. Otra materias es jeneral usada sola en vestes lusosa o antica, o trovada en colies.
Plu ca 60% de la botones en la mundo es fabricada en Qiaotou en la contia de Yongjia, Xina.