Tony Curtis

Den Tony Curtis, gebuer den 3. Juni 1925 an der Bronx zu New York City als Bernard Schwartz, a gestuerwen den 29. September 2010, war en US-amerikanesche Schauspiller.

Tony Curtis
Gebuertsnumm	Bernard Schwartz
Pseudonym	Anthony Curtis
Gebuer	3. Juni 1925 New York
Gestuerwen	29. September 2010 Henderson
Doudesursaach	Häerzkollaps
Nationalitéit	USA
Educatioun	The New School, City College of New York
Aktivitéit	Filmschauspiller, Schrëftsteller, Moler, Televisiounsschauspiller, Schauspiller, Militär, Offizéier
Partei	Democratic Party
Famill
Bestuet mat	Janet Leigh, Christine Kaufmann, Leslie Allen, Andrea Savio, Lisa Deutsch, Jill Vandenberg
Kanner	Kelly Curtis, Jamie Lee Curtis, Allegra Curtis

An den 1950er a 60er Jore war hien ze gesinn a Filmer wéi Trapeze (1956, mam Burt Lancaster an der Gina Lollobrigida), Sweet Smell of Success (1957, och mam Burt Lancaster), The Defiant Ones (1958, mam Sidney Poitier), Operation Petticoat (1959), Some Like It Hot (1959, vum Billy Wilder, mam Jack Lemmon an der Marilyn Monroe), Spartacus (1960, mam Kirk Douglas a mam Laurence Olivier), Taras Bulba (1962, mam Yul Brynner a mam Sam Wanamaker), The Great Race (1965, mam Jack Lemmon, Peter Falk an der Natalie Wood) an The Boston Strangler (1968, mam Henry Fonda an George Kennedy).

1971-1972 huet hien an The Persuaders zesumme mam Roger Moore d'Haaptroll gespillt. The Bad New Bears Go to Japan (1978) an The Mirror Crack'd (1980) ware Filmer, an deenen en ë. a. an den 1970er Jore matgespillt huet.

Zanterhier hat en en ettlech Gaaschtrollen ë. a. a Suddenly Susan (1998), Hope & Faith (2004) a CSI: Crime Scene Investigation (2005).

2008 si seng Memoiren ënner dem Titel American Prince erauskomm.

Zanter den 1980er Joren huet den Tony Curtis sech och als Moler en Numm gemaach.

Hie war sechsmol bestuet, dorënner mat der Janet Leigh (mat där en zwee Kanner hat, dorënner d'Jamie Lee Curtis) a senger leschter Fra Jill Vandenberg Curtis, mat där e vun 1998 bis zu sengem Doud bestuet war, an déi 42 Joer méi jonk ass wéi hien.