Henri Folmer

Den Henri Folmer huet seng Kandheet an der Stad am Garer Quartier erlieft. No senger Première 1952 op der Sproochesektioun mat Latäin am Kolléisch, huet hie Sprooche studéiert, fir d'éischt op de Cours supérieurs an der Stad, duerno op den Universitéite Stroossbuerg, Paräis a München. Seng Fächer ware Latäin, Franséisch an Däitsch.

No sengem pedagogesche Stage gouf hien am Escher Jongelycée als Sproocheprofesser genannt.

Am Abrëll 1960 huet hie sech mat der Henriette Koch bestuet an si kruten zwee Kanner, d'Françoise an de Michel.

1967 koum hien als Professer an de Kolléisch an 1974 gouf hie conseiller pédagogique fir d'Sproochen am Kolléisch. Vun 1975 bis 1981 war hien och Professer fir klassesch Philologie um Centre universitaire.

1978 gouf hien directeur adjoint ënner dem Direkter Joseph Poeker, deen 1981 iwwerraschend gestuerwen ass. De 15. Abrëll 1981 gouf hien zum Direkter vum Kolléisch ernannt. Well hie seng Aarbecht als Direkter als net kompatibel mat der Aarbecht als Professer um Centre universitaire ugesinn huet, huet hien um Centre universitaire demissionéiert.

1993 ass hien an d'Pensioun gaangen an den Emil Haag gouf säin Nofollger als Direkter.

No senger Pensionéierung als Schouldirekter war hien am Optrag vum Ausseministère Member vun der diplomatescher Delegatioun bei der Organisatioun fir Sécherheet an Zesummenaarbecht an Europa (OSZE).

Wéi 1989 gouf de Sportkomplex vum Kolléisch komplett renovéiert gouf an d'Kolléischsschwämm verschwonnen ass, gouf e grousse polyvalente Sall amenagéiert, deen als Salle Folmer bekannnt ass.

1. ↑ Doudesannonce am Luxemburger Wort vum 20. Abrëll 2023
2. ↑ Jos Salentiny, Hommage à Henri Folmer, directeur honoraire de l'Athénée, Luxemburger Wort, 5. Mee 2023, S.37