Gabriel Boisanté

De Gabriel Boisanté huet 1997 e "Baccalauréat scientifique" am Lycée Vauban an der Stad Lëtzebuerg gemaach. Duerno huet hien e Master an der Immunologie an e Master a strategeschem an Entreprenermanagement zu Paräis gemaach.^[1]

Hien huet e puer Joer zu Paräis geschafft, ënner anerem bei der Versécherungsgesellschaft Axa, an duerno beim lëtzebuergeschen Zertifizéierungsinstitut Luxcontrol.^[1]

2012 war hien de Matgrënner vum Restaurant Mama Loves You. Duerno huet hien nach weider Restauranten a Baren mat opgemaach: Mamacita, Coppers, Paname, Urban, Bazaar, an Amore.^[2]

De Gaberiel Boisanté ass och e Schauspiller, deen a méi wéi 20 Kuerzfilmer, Filmer a Serië matgespillt huet.^[3] Hien hat ënner anerem Rollen a Baby(a)lone (2015), Capitani (2020) a Io sto bene (2021).

Hien huet 2012 an 2014 d'Galae vum 5. a vum 6. Lëtzebuerger Filmpräis moderéiert.

Hien ass zënter 2016 Member an der LSAP an zënter 2019 Chef vun de Stater Sozialisten.^[1] Am Januar 2020 ass hie fir de Marc Angel am Gemengerot vun der Stad Lëtzebuerg nogeréckelt, deen an d'Europaparlament gewiesselt ass, wéi den Nicolas Schmit EU-Kommissär gouf. U sech war d'Joanne Goebbels nom Marc Angel déi Persoun, déi bei de leschte Walen déi meescht Stëmme krut, mä si hat op d'Plaz am Gemengerot verzicht^[4].

Bei de Gemengewale vum 11. Juni 2023 gouf hien an de Gemengerot vun der Stad Lëtzebuerg erëmgewielt.^[5]

Hien ass Papp vun dräi Kanner.^[1]

1. ↑ ^{1,0 1,1 1,2 1,3 1,4} vdl.lu: Profil um Site vun der Stad Lëtzebuerg
2. ↑ ^{2,0 2,1} paperjam.lu: Profil op Paperjam
3. ↑ lequotidien: Luxembourg : Boisanté, 42 ans et tous ses dons vum Geneviève Montaigu (29. Januar 2020)
4. ↑ tageblatt.lu: Gemeinderat Luxemburg / Gabriel Boisante rückt für Marc Angel nach (10. Januar 2020)
5. ↑ David Thinnes: "So sieht der neue Gemeinderat der Stadt Luxemburg aus." wort.lu [w+], 12.07.2023.