Eurovision Song Contest 1980

De 25. Eurovision Song Contest war den 19. Abrëll 1980 an Holland. Organiséiert gouf d'Eurovisioun dat Joer am Nederlands Congresgebouw zu Den Haag. Presantatrice war d'Marlous Fluitsma. Holland huet d'Organisatioun vun der Eurovisioun dat Joer iwwerholl, well de Gewënner vum Joer virdrun, Israel, se net wollt fir d'zweet hannereneen organiséieren. Fir d'Käschte méi kleng ze halen hunn d'Hollänner eng manner pompös Versioun organiséiert.

Marokko ass nei derbäikomm, am Ganzen hunn 19 Länner matgemaach. Jugoslawien, Malta, Monaco an Israel waren net dobäi. Et war fir d'éischt (a fir d'lescht bis elo) dat mat Marokko e Land vum afrikanesche Kontinent matgemaach huet.

Verschidde Sänger ware scho virdru mol eng Kéier dobäi, d'Katja Ebstein fir Däitschland 1970 a 1971, d'Paola del Medico fir d'Schwäiz 1969 an d'Maggie MacNeal (als Deel vum Grupp Mouth & MacNeal) fir Holland 1974.

D'Reegel fir d'Ofstëmmung ass d'selwecht bliwwe wéi dat Joer virdrun: An all Land huet eng Jury 12, 10, 8, 7, 6, 5, 4, 3, 2 an 1 Punkt un déi zéng bescht Lidder verginn. D'Resultater si per Telefon op Den Haag matgedeelt ginn.

Déi éischt Plaz krut de Vertrieder vun Irland, de Johnny Logan, mat 15 Punkte Virsprong virum Katja Ebstein (Däitschland). Déi drëtt Plaz krut d'Grupp Prima Donna, déi fir Groussbritannien ugetruede war.

Fir Irland war et déi zweet Kéier datt et de Grand Prix gewonnen hat.