Qaanaaq

Qaanaaq nunatsinni illoqarfinni avannarpasinnerpaajuvoq, nunarsuatsinnilumi avannarpasinnerpaajulluni. Kommunit kattunnerisa kingorna Qaanaaq Qaasuitsup kommunianut atalerpoq 1. jan. 2009 aallarnerfigalugu. Thule kulturi ukiut 1000 kingornatigut inuit Avanersuaq tikeqqaarpaa, Inuit-lu issittumi ullumikkut inuusut siuleraat. Qaanaaq inuusoqaaq oqaluttuarisaaneralu imaannaasimanani. 1953-mi Thuletoqaq Amerikamiunit sorsunnersuup nalaani najorneqalermalli kingornagullu sakkutooqarfik pilersinneqarmat, Qaanaarmiut maanna suli inissisimaffimminnut pinngitsaalisaallutik nuutsitaapput.

Nunartik, piniarfitoqarfitsik, erligisartik annaavaat, peqatigiiffik Hingitaq 53 ilaatigut aqqutigalugu ukiorpaalunni nunatoqqaminnut utersinnaanissaat, taarsiiffigineqarnissaallu ullumikkumut sorsuussutiginnissimallugu. Qaanaaq ullumikkut 870-t missaanni inoqarpoq, nunaqarfii, Savissivik, kujasinnerpaaq (110-t missaat.) , Moriusaq (10-t ataallugit inoqarpoq), Siorapaluk nunaqarfinni inoqarfiusunilu avannarpasinnerpaaq (76-it missaanni inoqarpoq), Qeqertat (20-t missaanni inoqarpoq). Qaanaap eqqaanilu piniarneq aalisarnerlu inuutissarsiutini pingaarnersaapput. Sakkutooqarfimmi Thule Airbase kalaallinik aamma sulisoqartarpoq.

Septemberip 1-ni 2001 Qaanaami mittarfittaaq nutaaq atuutinneqalerpoq, angallannerli akisoqimmat takornariaqarneq annikitsutut oqaatigineqarsinnaavoq.