Tutlayt taqbaylit

Adlis amenzu i d-yeffɣen s Teqvaylit d win yura Adolphe Hanoteau ɣef tuɣac n Ǧerǧer deg useggas n 1867, deffir-is d Auguste Mouliéras yuran sin n yidlisen ɣef tmucuha n Tmurt n Yiqvayeliyen gar n yiseggasen n 1891, 1893 d 1895, akked Bulifa i yuran adlis ɣef yisefra n Si Muḥend u Mḥend deg useggas n 1904.

Imir-nni, uran Yifṛansisen kra n yidlisen ɣef tmucuha d yisefra n Yiqvayliyen. Ungal amenzu yettwarun s Teqvaylit d win yura Velɛid At Ɛli deg yiseggasen 1940.

Adlis i as-yefkan ilugan iṛessan n tjerrumt i teqvaylit d win yura Mulud n At Mɛemmeṛ. Kamal U Zerrad netta yerna-d ɣef umahil n Dda Lmulud i wakken ad d-iṛessi ugar ilugan n tjerrumt n tutlayt-a.

Iseggasen-a ineggura ffɣen-d azal n 400 en yidlisen s teqvaylit, gar ammuden n yisefra, tullisin akked ungalen.

Taqvaylit asmi i d-kecmen Yifṛansisen ar tmura timaziɣin n Tefriqt n ugafa tella tettwameslay deg yiwet n temnaḍt meqqṛen azal n snat n tikkal tamnaḍt n Yizwawen (Leqvayel) n wass-a.

Seg tudrin i d-yezzin i Mila, teṛṛeḍ ar tid n yidurar n Lḥuḍna, idurar n Ṣṭif, idurar n Jijel, Msila d wezray ar Tmurt n Leqvayel n wass-a, At Wartilan, At Yeɛla, akked iderma n temnaḍt n Vgayet, n Tuvirett akked wid n Tizi Wezzu d Bumerdas.

 

Imir Ifṛansisen ttekkan ɣef lquyyad akked ibacaɣaten akken ad qehren agdud. Kksen akal i wid yellan zedɣen anda yella wakal yelhan i tyerza, kra snegren-t, kra snejlan-t.

Fkan akal-nni i Lquyyad. Lquyyad-agi akked ibacaɣaten d wid yeɣran taɛṛavt, Ifṛansiwen llan lemden taɛravt akken ad ttemyarun d lquyyad-a, imezdaɣ yeqqimen d aklan deg tmurt-nsen yeqqim-asen-d kan ad ḍefren almi i d-ufan iman-nsen ttun tutlayt-nsen, akken i asen-iṛuḥ wakal-nsen, ǧǧan iman-nsen tuɣ fell-asen taɛṛavt am akken werǧin mmeslayen-d taqvaylit. Ihi akka i teqqurmeḍ tjumma anda tettwameslay teqvaylit ass-a.

I izemren ad t-iḥudden ɣef ungar d tira akked tayri d wazal ad as-d-fken warraw-is. Ma tenger teqvaylit ad d-negren Yiqvayliyen, ad d-qqimen imdanen war idles, ad asen-teḍru am tevrikt yettun tikli n tyaziḍt, tin n tsekkurt ur as-tewwiḍ ara. Ttvut ɣef aya, ad d-iɣer kan yiwen amek d-gran wid akken yettun tutlayt-nsen uɣen tutlayt nniḍen anda yewweḍ wazal-nsen. Win i d-yusan ad ten-yenher am ulli.

Isekkilen n ugemmay swayes nettaru taqvaylit, d wid n tlatinit, anagar sin-a : ɣ d ε, i d-yekkan seg tegrikt. Isekkilen yettawin aɛeqqa ddaw-nsen, nettaru yes-sen imesla ufayen, anagar ḥ. Isekkilen yettawin akafu nnig-nsen, nettaru yes-sen izegnaggaɣen imezgiyen n c d j. Isekkilen [o], [p], [v], nettaru yes-sen imesla yezgan deg wawalen imnekcamen n umalu, imesla ur nelli deg unagraw asnilsan n teqvaylit. Asekkil u, azal-is d win n tuget n tutlayin n umalu (ou deg tefransist).

Agemmay atrar n tutlayt taqvaylit yesɛa 35 d asekkil :

Yal imesli(ṣṣut) nettaru-t s yiwen n usekkil, d aḥerfi neɣ d ussid ; anda yevɣu yili deg wawal, talɣa-s yiwet : – Ama deg tazwara n wawal : yezwar, zwir. – Ama deg tlemmast-is : tayri, Lezzayer. – Ama ɣer taggara n wawal : aggay, argaz.

Imesli ussid yettwaray s usiknew n usekkil : tameṭṭut, tameddurt, tazemmurt, yeṛṛeẓ, izegger, ddu , kker, atg.

Llant snat n taggayin n tussda : tin n tnumi d tin n tjerrumt :

Tussda n tnumi : Tussda deg wawal, nettaru-tt akken i nuɣ tanumi nsell-as. Maca tanumi-a temxallaf seg tama ɣer tayeḍ, seg taddart ɣer tayeḍ, tikwal seg umdan ɣer wayeḍ. Tifrat n wugur-a : d asegzawal ara aɣ-d-yemlen anda tella, d wanda ur telli tussda. Tussda-a, tella deg :

• Ismawen : tilelli, uzzal, uffal, ddeqs, atg. Deg yismawen i d-yekkan seg taεravt, wid iveddun s yisekkilen n yiṭij, deg tmaziɣt, asekkil amezwaru yezga d ussid : ssif, ṭṭbel, zzit, ṭṭir, ṭṭviv, nnif, rrif, nnefs, atg.
• Imyagen yesɛan yiwet n tergalt – war tiɣri) : ekk, err, eǧǧ, atg. – d teɣri : zzi, ddu, ssu, atg. + ilan(isɛan) snat (neɣ ugar) n tergalin – war tiɣri : cceḍ, ccef, ddem, dder, ffer, kker, kkes, degger, qqeṛs, ṭṭerḍeq, atg. – d yiwet n teɣri : ggal, seqqi, azzel, mlelli, atg. – d snat n teɣra : dduri, issin, gguni, atg.

Tussda n tjerrumt : (atan deg tira)

• http://www.imyura.net Archived 2013-08-12 at the Wayback Machine

• Si Amar ou Saïd Boulifa, Recueil de poésies kabyles. Texte zouaoua traduit, annoté et précédé d'une étude sur la femme kabyle et d'une notice sur le chant kabyle (airs de musique), Alger, 1904, 555 is. (taẓrigt tis 2 Alger-Paris, 1990, ISBN 2-906659-00-04)
• Adolphe Hanoteau, Poésies Populaires de la Kabylie du Jurjura, Paris, Imp. impériale, 1867 (aḍris es pdf)
• Auguste Mouliéras, Les Fourberies de Si Djeh'a, Wehran, Perrier, 1891
• Auguste Mouliéras, Légendes et contes merveilleux de la Grande Kabylie, Paris 1893-1895 (aḍris es pdf)