Ngahad

Ngahad utawa Ngakad iku dina kang kapisan sajeroning kalèndher Jawa, yaiku sawisé dina Setu lan sadurungé dina Senèn. Jeneng Ngahad iku asalé saka basa Arab Ahad kang tegesé siji utawa dina kang kapisan. Sajeroning kalèndher Jawa, dina Ngahad iki neptuné 5. Neptu iku angka kang diduwéni saben dina, pasaran, wulan lan taun, kanggo pétungan golèk dina apik (Wariga Gemet, upamané kanggo miwiti kagiyatan kang wigati kaya déné arep palakrama, lelungan adoh lan sapanunggalané.

Ing kalèndher Masèhi, dina iki diarani dina Ngahad utawa Minggu. Dina Ngahad iki minangka dina libur, lan tumrapé umat agama Kristen lan Katulik minangka dina kanggo ngayahi ngibadah ing gréja. Jeneng liya kanggo dina iki yaiku Aditya, Raditya, Redité utawa Dité kang dijupuk saka basa Sangsekerta kang tegesé srengéngé, mèmper karo pangertèn ing basa-basa ing Éropa, kaya ta ing basa Inggris: Sunday, ing basa Walanda:Zondag, basa Jerman: Sonntag kang tegesé padha yaiku dina srengéngé.