Almanak/Van Dorp/1858
Sêrat Pananggalan
Ing taun Wêlandi ôngka: 1858.
Kaêcap dening Tuwan Oliphan sakancanipun ing nagari Sêmawis.
Bab Namaning Taun Jawi.
Namanipun taun Jawi punika sami kabêkta saking nêptunipun piyambak-piyambak. Awit ingkang kalampah ing tiyang Arab, sastranipun ngiras kadamêl ôngka kados ta sastra Alip, kadamêl ôngka: 1, sastra Be kadamêl ôngka: 2, Jim: 3, Dal: 4, Ehe: 5, Wawu: 6, Je: 7, wondening nêptuning dintên wêwolu punika: 1, 5, 3, 7, 4, 2, 6, 3, kados ingkang sampun kapratelakakên ing ngajêng, dados sastra Alip, He, Jim, Je, Dal, Be, Jim, ingkang punika sarèhning wontên taun kêkalih ingkang tunggil nêptu: 3, mila ingkang satunggil kawastanan Jimawal. Satunggilipun kawastanan Jimakir: têgêsipun Jim wêkasan.
Bab Lampahing Pranata Môngsa.
Pranata môngsa punika yasan dalêm Ingkang Sinuhun Kangjêng Susuhunan Pakubuwana ingkang kaping VII: ing Surakarta, kados ingkang kapratelakakên ing Sêrat Pananggalan ing taun 1856, wondening lampahing pranata môngsa wau mêkatên.
Kasa umuripun 41 dintên, surya wiwit mangidul.
Kalih umuripun 23 dintên.
Katiga umuripun 24 dintên.
Kasakawan umuripun 25 dintên.
Gangsal umuripun 27 dintên.
Kanêm umuripun 43 dintên. Surya pantok dumugi wêkas kidul.
Kapitu umuripun 43 dintên. Surya wiwit mangalèr.
Kawolu umuripun 26 utawi 27 dintên. Yèn taun Wastu umuripun 26 dintên, yèn Wuntu: 27 dintên.
Kasanga umuripun 25 dintên.
Kasadasa umuripun 24 dintên.
Dhêstha umuripun 23 dintên.
Sadha umuripun 41 dintên. Surya pantok dumugi wêkas lèr.
Gunggunging dintên salêbêting sataun, yèn Wastu: 365, yèn Wuntu: 366 dintên.
Mênggah panggenaning taun Wuntu mêkatên ing taun ôngka: 4, ôngka: 8, 12, 16, 20, salajêngipun sabên angsal kawan taun, inggih punika taun Wuntu, ingkang kathah-kathah sami Wastu, kados taun ôngka 1, 2, 3, 5, 6, 7, 9, 10, sapanunggilanipun sadaya ingkang botên kalêbêt nyakawanan, inggih punika taun Wastu.
Manawi nagari ing Surakarta: tumbuk kaping sapisan sabên taun nuju wiwitipun môngsa gangsal, tumbuk kaping kalih nuju ing sawiwitipun môngsa kasanga, yèn ing sanès nagari inggin wontên kaotipun. Mawi-mawi lèr kidulipun. Kados ta ing nagari Batawi tumbuk kaping sapisan angrumiyini tumbuking Surakarta: udakawis kawan dintên. Tumbuk kaping kalih inggih angantuni mèh kawan dintên. Yèn ing Pacitan kosokwangsul, tumbuk kaping sapisan angantuni tumbuking Surakarta mèh kalih dintên, tumbuk kaping kalih angrumiyini kalih dintên. Sêmantên punika yèn salêbêting tanah Jawi punika kirang langkunga botên patos kathah.
Punika cariyosing Pandhawa, kados ingkang kasêbut ing Sêrat Mahabarata.
1. Dhandhanggula
1. kang pinurwa rinênggèng artati / kandhanira Pandhawa kang kocap / ing Srat Mahabaratane / Mahabarata wau / têmbungira Sangkrêta tuwin / punika baboning Srat / Bratayudanipun / miwah panunggalanira / critaning Pandhawa myang Korawa tuwin / lêluhurira sanggya //
2. ananging ta tibane ing Jawi / kèh salencanira lawan sêrat / wau Mahabaratane / dene gancare tuhu / kadi ingkang winiyos mangkin / rikala kunanira / ing Indhu winuwus / wontên kang madêg narendra / abisikan Prabu Barata puniki / kang nêrahkên Pandhawa //
3. myang nêrahkên Korawa sakalir / de wastaning Korawa kabêkta / sing Prabu Kuru juluke / kaprênah wayah buyut / lawan wau Barata Aji / wusnya antara lama / wontên têdhakipun / malih Prabu Asti mangran / kang akarya dhatulayenggal sawiji / wasta Ngastinapura //
4. myang winastan Gajapura tuwin / Gajahawya marma ran mangkana / wit asti gajah têgêse / ahwaya têgêsipun / nama dadya wastaning nagri / kabêkta sing panêngran / nira prabunipun / dene prênahira praja / ing Ngastina wau anèng sakiduling / prabata ing Imawan //
5. datan têbih lan Gôngga bênawi / ya ta Prabu Asti sinilihan / ing putra Sri Pratipane / Sang Pratipa sêsunu / kakung tiga ingkang sawiji / Dewapi wastanira / kaping kalihipun / Bahlika panêngranira / katrinira Santanu dene Dewapi / anandhang gêrah barah //
6. datan bangkit waluya sumarmi / tilar pura mangun tapèng wana / wontên satêngah kaole / lamun Dewapi wau / têkèng mangkin datan ngêmasi / maksih tapa nèng desa / Kalapa ranipun / salèring ardi Imawan / arinira Bahlika cakar pribadi / ngupaya praja enggal //
7. dadya Sang Santanu kang wuragil / sumilih ing kaprabon Ngastina / sêsunu juga priyane / mijil saking Dyah Ayu / Dèwi Gôngga tuwi Jahnawi / sinung bisikan Bisma / ngajrihi liripun / dupi sira wus diwasa / winisudha mring sudarmanira dadi / sri naranata mudha //
8. kasusrambêk wicaksana ngadil / apratama ing pangulah yoda / myang mring pakêm agamane / samana kang winuwus / ing Magada wontên mandhiri / narendra abisikan / Sang Aprabu Wasu / kêkalih atmajanira / miyos kêmbar patutan saking apsari / wasta Dèwi Adrika //
9. apsarèku asalah kadadin / warni mina marma sutanira / kang priya Matsya wastane / têgêse ulam ranu / duk diwasa jumênêng aji / anèng praja Wiratha / ajêjuluk Prabu / Matsyanata utawi Sang / Matsyapati de arinira pawèstri / Satyawati mangaran //
10. tuwin Matsyagônda awit dening / wandanira amis kadi mina / nulya pinracayakake / mring sajuganing ratu / Prabu Dasa ingkang wêwangi / dadya pinèt atmaja / rèhning gandanipun / amis datan wagêd sirna / tinuduh ing nata pinrih anambangi / wontên ing lwah Jamuna //
11. môngka tapanira sang sudèwi / dupi sampun lamantaranira / nulya antuk pitulunge / atmajèng Saktri Wiku / Parasara ingkang wêwangi / yèku ingkang ambengkas / gônda amis wau / malah-malah santun gônda / langkung arum marma wontên kang mastani / Gôndawati Sang Rêtna //
12. nulya sira Rêtna Gôndawati / ginarwa mring Rêsi Parasara / datan antara lamine / sang rêtna asêsunu / nèng nuswane Jamuna kali / miyos jalu sinung ran / de rama sang wiku / Krêsnadwepayana Wyasa / dupi lair dyan agêng sakala nuli / pamit mring ibunira //
13. tumutur ing sudarma umulih / mring patapan turira i[1] rena / lamun kang ibu ing têmbe / darbe karsa apangguh / ciniptaa kewala prapti / riwusnyantara lama / wau ingkang kantun / Dèwi Satyawati sira / katrênjuh ing Santanu Sri Narapati / nata wangwang kasmaran //
14. dyan pininta mring Dasa Nrêpati / sang dyah wau yun ingangkah garwa / sri nata pêthuk ing tyase / nging minta janji lamun / Dèwi Satyawati ing benjing / pêputra sumiliha / panjênênganipun / wontên ing Ngastinapura / Sri Santanu datan jumurung ing kapti / awit tanayanira //
15. ingkang nama Bisma wus kinardi / prabu anom saksana sang nata / kondur sru suntrut nityane / de kacuwan ing lulut / sapraptanta ing dalêm puri / nitya masmu turida / Rêsi Bisma sampun / anggarjita ingkang dadya / lêking driyanira rama sri bupati / sumarma sigra mentar //
16. mung pribadi sumêdya kapanggih / lawan wau Naranata Dasa / sapraptanirèng ngarsane / aprasêtya kalamun / datan arsa umadêg aji / malah tan arsa krama / salami tumuwuh / Prabu Dasa duk miyarsa / tur mangkana nulya Dèwi Satyawati / ingulungkên mring Bisma //
17. risaksana binêkta umulih / mring Ngastina dhinaupkên lawan / kang rama Sri Santanune / dupi alama sampun / Dèwi Satyawati sêsiwi / kêkalih miyos priya / dene ingkang sêpuh / Citranggada wastanira / kang taruna Wicitrawirya wêwangi / wau Sang Rêsi Bisma //
18. ingkang môngka sogataning siwi / kalihira ya ta duk Sang Nata / Santanu praptèng lalise / ginantyan ingkang sunu / Citranggada madêg narpati / Citranggada ginantyan / ing wau rinipun / kang wasta Wicitrawirya / yèku darbe paminta mring Bisma pinrih / angupayakkên garwa //
19. Bisma sigranjujug prajèng Kasi / angadêgi sayêmbaranira / putri têtiga wastane / Ômba ping kalihipun / Ambika de ingkang kaping tri / ran Dèwi Ombalika / sahadayanipun / kang nglamar putri têtiga / kasor ing prang dening Rêsi Bisma sami / nulya wanodya tiga //
20. tinawanan mring Sang Bisma Rêsi / nanging kang pambayun Dèwi Ômba / tinilar sing pamintane / ingkang kêkalih muhung / Dyah Ambika miwah kang ari / Ombalika binêkta / mring Ngastina mantuk / jinênêngkên ratu nulya / dupi sampun antara ing sapta warsi / Prabu Wicitrawirya //
21. angêmasi datan tilar siwi / marma ibunira sru turida / awit dening tanayane / wus puput wijinipun / ing wusana Sang Satyawati / kayatnan mring tanaya / kang tapa rumuhun / nênggih Sang Arêsi Wyasa / dyan cinipta sakêdhap kewala prapti / munggwing ngarsaning rena //
22. Rêsi Wyasa sinabdan ing bibi / pinrih nambungana wiji muwah / nangkarna têdhak-têdhake / sumaguh aturipun / dhinaupkên sira tumuli / lan tilarane garwa / nata kang wus surud / kocapa Dèwi Ambika / duk kapanggih kalawan Sang Wyasa Rêsi / dahat giris tumingal //
23. dening galak ulatira tuwin / netra andik jenggot wèh katrêsan / sang dèwi wau marmane / rikalanta pulang hyun / tansah mêrêm amargi dening / tan tahan non ing priya / dadya têmahipun / wawratannya mijil wuta / sinung aran Dhrêtarasthra inggih ugi / mangran Dhrêtanagara //
24. atanapi Dhrêtapura tuwin / Dhrêtaradya têgêsira samya / angasta kasrinatane / Ombalika kang kantun / dupi arsa pinardyèng rêsmi / dening Sang Rêsi Wyasa / sru kapitèng kalbu / kongsi kapayus kang nitya / marmanira mawêkaja kulit putih / Pandhu panêngranira //
25. pradikaning Pandhu iku putih / Dyah Ambika rikala ingatag / ing ibu marêka malèh / mring Rêsi Wyasa wau / ing tyasira ewa kapati / nanging jrih lêngganaa / sumarma sang ayu / anandukakên upaya / animbali pawonganira sawiji / sinalinan busana //
26. nênggih busananira pribadi / dyan ingagnyan umarêk Sang Wyasa / mindha Dèwi Ambikane / dupi sira cumundhuk / sèstu sira Sang Wyasa Rêsi / kasamaran ing tingal / panyananing kalbu / satuhu Dèwi Ambika / sinanggaman pawongan wau tumuli / anggarbini tantara //
27. apêputra jalu dèn juluki / Widura têgêse wicaksana / wangwang Sang Rêsi Wyasane / pamit dhatêng kang ibu / umantuk mring patapan malih / rèhning Sang Dhrêtarasthra / wuta cacadipun / marma Pandhu arinira / madêg prabu anom Bisma kang ngêmbani / amêngku kapamasan //
28. salamine wau calon aji / maksih timur ngiras momong putra / tiga tantara lamine / rajaputra tri wau / mijil kagunanira sami / kang tan kaprah kalawan / samining tumuwuh / Dhrêtarasthra langkung rosa / Pandhu putus ing pangulah mring jêmparing / dene sira Widura //
29. limpad ing budi miwah mumpuni / kasusastran tuwin silakrama / wasana putra tigane / sing ramantuk pituduh / kinèn sami amawa krami / Sang Dhrêtarasthra krama / antuk putranipun / Sri Subala ing Gandara / nama Dèwi Gandari Pandhwantuk Kunti / tuwi ran Dèwi Prêta //
30. duk ing nguni wau Dèwi Kunti / pinèt putra de Sri Kuntiboja / de sudarmanta yêktine / Prabu Sura jêjuluk / ing Yadawa ya ta winarni / Dèwi Kunti rikala / maksih kênyanipun / tinurunan ing Hyang Surya / têmah wawrat ambabar jalu sawiji / sinungan aran Karna //
31. tuwi Suryaputra kang wêwangi / lairira wus ngrasuk kawaca / kang tan tamèng gêgamane / myang anting-anting tatur / saking rama Hyang Surya sami / Dèwi Kunti dyan ngagnya / mèt kandhaganipun / bayi pinrih anglêbêtna / ing kandhaga linabuh ing Aswa nadi / kentir umraptèng Gôngga //
32. kongsi têkèng jajahaning nagri / Ôngga datan têbih prênahira / sing sawangan samudrane / praja ing Ôngga wau / duk samana winêngkwèng aji / jêjuluk Adirata / pawong mitranipun / wau Risang Dhrêtarasthra / kandhagèku anulya sinarah dening / garwèng Sang Adirata //
33. Dèwi Radha ingkang awêwangi / dhasar sira dèrèng awawêka / marma sang pramèswarine / dahat tustha ing kalbu / dènnya manggih rare sawiji / nulya ingangkah putra / ing pangrêngkuhipun / dènira angupadrawa / saksat kadi tanayanira pribadi / marma wau Sang Karna //
34. pêparab Radheya pradikaning / putrèng Radha nêngna kang winarna / Sri Pandhu mèt garwa malèh / Dèwi Madri ranipun / kadangira Salya Nrêpati / ratu prajèng Madraka / de Widura wau / krama bôngsa lit kewala / kocap kratonira Pandhu Narapati / prasida ing raharja //
35. kineringan myang pinundhi-pundhi / de sasamèng ratu môncapraja / nujwèng sajuga arine / Sri Naranata Pandhu / ambêbêdhag dhatêng wanadri / amrangguhi arina / èstri lawan jalu / lagya lêlakèn saksana / ingkang jalu cinupan warastra kêni / purna jati brahmana //
36. ngupatani mring Pandhu Nrêpati / têmbe lalisira ing nalika / sarêsmi lan wanodyane / sru nalôngsa Sri Pandhu / dènnya sampun anglaksanani / dosa gêng ajalaran / madhêm brahmanèku / marma asèlèh kaprabwan / mring kang raka dyan mentar lan garwa kalih / mangun tapa mring wana //
37. umungguh ing Satasrêngga wukir / dene wau têmbung Satasrêngga / pêpucuk satus têgêse / tan lamantaranipun / lairira Pandhawa sami / pradikaning Pandhawa / putranipun Pandhu / dene ta satuhunira / dewa gangsal ingkang samya asêsiwi / sarana môntra juga //
2. Sinom
1. kang darbe môntra punika / Dèwi Kunti antuk saking / Bathara Surya ing kuna / kaluwihanira bilih / winatêk iku bangkit / andhatêngkên dewanipun / sadhengah kang cinipta / inggih lalu anuruni / dadya Sang Hyang Darma ingkang apêputra //
2. pambayun ran Yudhisthira / têgêse mantêp ing jurit / panggulunira ran Bima / têgêse anggêgirisi / inggih ugi anami / Bimasena têgêsipun / abala wèh katrêsan / tuwin Wrêkodara nami / pradikane udaraning sona ajag //
3. kanang wawêka Sang Bima / Bathara Wayu kang dadi / dewa-dewaning maruta / panêngahira wêwangi / Arjuna inggih ugi / Parta panêngêranipun / kabêkta saking rena / Dèwi Prêta lawan malih / Sang Arjuna ajêjuluk Dananjaya //
4. pradikane Dananjaya / kang rumêbut rajapèni / tuwin Kirithi anama / amakutha pradikaning / Arjuna kang sêsiwi / Hyang Indra ingkang sinêbut / ratuning para dewa / wau Risang Dèwi Madri / nambut môntra saking Dèwi Kunti nulya //
5. wawrat awawêka kêmbar / sami jalu dèn wastani / Nakula lan Sahadewa / putrane dewa kêkalih / sami anama Aswi / kalihira dadya dhukun / wontên ing Suralaya / samana Dèwi Gandari / ing Ngastina ambabar daging tugêlan //
6. atosira kadi sela / saksana Sang Wyasa Rêsi / ingundang myang pinintanan / pitulung anulya prapti / sing pituduh sang rêsi / nglewah dagingipun wau / umijil rare priya / Duryodana dèn wastani / pradikane punika prajurit ala //
7. inggih nama Suyodana / têgêse prajurit bêcik / lairira lan Sang Bima / pêparêngan ing saari / riwusira anuli / wontên malih ingkang mêtu / rare ran Dusasana / wangwang dulur mijil malih / gantya-gantya kongsi satus etungira //
8. marma ran sata Korawa / dene lairira sami / sarênti jroning sacôndra / awanèh saking puniki / Sang Dhrêtarasthra Aji / adarbe atmaja kakung / miyos saking ampeyan / Yuyutsu dipun namani / atanapi putra wanodya sajuga //
9. anama Dèwi Dusala / putra sadaya winarni / sami titising raksasa / kunêng wusnyantara lami / upatanira nguni / risang brahmana katuhun / nèng Pandhu sedanira / dupi ngayuh Dèwi Madri / de sang rêtna abela lêbu tumangan //
10. parêng lan kunarpèng raka / Dèwi Kunti dyan umulih / dhumatêng Ngastinapura / Pandhawa gangsal umiring / dupi praptèng nagari / wontên ingkang tan anggugu / yèn putrèng Pandhu marga / kinira wus lama lalis / suprandene pinupu mring Dhrêtarasthra //
11. pinasrahakên mring Bisma / pinrih angêmonga sami / lan putra dalêm priyôngga / ya ta tan antara lami / Satyawati winangsit / de Rêsi Wyasa kang sunu / aturira ing rena / ing têmbe wontên bilahi / agêng andhatêngi praja ing Astina //
12. kang dadi wêwinihira / ing bêbaya sing pradondi / Pandhawa lawan Korawa / marma Dèwi Satyawati / saksana tilar puri / dinulur ing putra mantu / Dèwi Ambika miwah / Ombalika datan kari / entarira arsa mangun tapèng wana //
13. darapon ywa mênangana / karusakaning nagari / duk wus lama putri tiga / murud mring kasidan sami / Rêsi Bisma winarni / sung guru kêkalih sampun / marang momonganira / Pandhawa lêlima tuwin / mring Korawa de sogatanira mangran //
14. Pandhita Drona kalawan / Krêpa pra sami pinurih / amulang pangulah yoda / de Drona ingkang sêsiwi / Sang Baratwaja Rêsi / lairira saking êjun / jun ing basa Sangkrêta / Drona arane lan malih / êjun inggih ugi winastanan Kumba //
15. marma na malih wastanta / Kumbayoni awit saking / yoni uwêl têgêsira / dadya aran Kumbayoni / pradikanira lair / saking jun ya ta winuwus / duk Drona maksih truna / adarbe mitra sawiji / ran Drupada yèku atunggal sogata //
16. rikalane puruita / dhatêng Baradhwaja Rêsi / riwusnya antara lama / Drupada jumênêng aji / ing Pancala nagari / Rêsi Drona kumacèlu / panggih lan mitra lama / dupi tumama ing ati / Sri Drupada amitambuhi kewala //
17. malar tinundhung siniya / Drona tan kêna winarni / runtikira ing jro nala / dyan mentar anjujug maring / Ngastinapura amrih / margining pamalêsipun / kacarita Sang Drona / krama antuk Dèwi Krêpi / prênah kadangira wau Rêsi Krêpa //
18. krêpa têgêsira wêlas / marma ran mangkana awit / duk Krêpi kalawan Krêpa / kalihira maksih alit / pinanggih nèng wanadri / dening Narendra Santanu / ing nagari Ngastina / anulya pinupu sami / awit saking kamiwêlasên ing driya //
19. yêktinira kang pêputra / Saradwat lawan apsari / Janapadi wastanira / Rêsi Krêpa wau inggih / kaprênah wôngsa kalih / Drupada Sri Naraprabu / ing nagari Pancala / ya ta kang winuwus malih / Pandhawa lan Korawa duk wus krêtarta //
20. mring saliring kawruh nulya / Sang Dhrêtarasthra Nrêpati / ngadêgakên gung kasukan / karsanira sri bupati / mintonkên guna tuwin / saktine putra sadarum / sakèhing para nata / sinuruhan kang supadi / sami ngadêgana prang tandhing sadaya //
21. ingkang tumutur sewaka / Karna putrèng Dèwi Kunti / dupi ngajak prang Arjuna / karsanta tan dèn turuti / marma mangkana dening / Karna dede trahing ratu / Sang Duryodana nêdya / ambantoni Karna nuli / jinênêngkên narendra ing nagri Ôngga //
22. pra Pandhawa maksih panggah / datan arsa aprang tandhing / lan Karna têmahan bubar / kongsi abusêkan sami / kawarna Drona Rêsi / aminta pitulungipun / Pandhawa myang Korawa / pinrih mikut Drupada Sri / minôngka wêwalêsira dènnya mulang //
23. saksana sata Korawa / lumurug Drona kang ngirid / praptèng jajahaning praja / Pancala sami kalindhih / ing prang lan wadya aji / anulya sami umundur / angungsi mring Pandhawa / Arjuna tandya ngayoni / tan antara kapikut Prabu Drupada //
24. ingaturkên maring Drona / sang arêsi andarbèni / pamundhut mring Sri Drupada / ing Ahicakra nagari / bawah Pancala nagri / dadia panêbusipun / sarirane sang nata / Drupada tan nuwalani / nulya sira ingantukkên mring krajanta //
25. sakondure Sri Drupada / kamantyan dènnya aruntik / dhumatêng Sang Rêsi Drona / tan surud raosing galih / lamun dèrèng amanggih / sarana wêwalêsipun / marma sru amêmuja / ing jawata kang supadi / wontêna sihira lumuntur mring nata //
26. katrima pamintanira / sing agni padupan mijil / tanaya jalu sajuga / wus gêng sakaprabon jurit / kaparingan wêwangi / Dhrêsthadyumna têgêsipun / dahat karosanira / yèku kang sampun pinasthi / ing jawata umadhêm Sang Rêsi Drona //
27. benjing ing prang Bratayuda / nulya wontên malih mijil / putra wanodya sajuga / ran Dèwi Krêsni utawi / winastanan Dropadi / kawarna sang rêtna wau / titising putranira / èstri pandhita sawiji / nguni mangun tapa mêminta ing dewa //
28. mugi sinungana lakya / ingkang utama ing budi / katrima pamintanira / nging rèhne paminta kongsi / rambah ping gangsal marmi / panjanmanta malyèng besuk / pinasthi laki gangsal / ya ta Drupada Nrêpati / apêputra malih wanodya sajuga //
29. Sikandhini wastanira / punika aliron parji / kalawan ditya sajuga / Sêtunakarna kang nami / dadya sira sang dèwi / amancala warna jalu / nulya amalih aran / Sikandhi yèku pinasthi / têmbe ingkang umadhêm Sang Rêsi Bisma //
30. gantya kocapa Pandhawa / kathah solahira sami / mintonkên kaprawiranta / miwah tan kêndhat akardi / kadarman mring wong alit / sumarma kongsi misuwur / myang sinihan ing kathah / sira Yudhisthira nuli / jinênêngkên prabwanom de Dhrêtarasthra
Candhakipun cariyos punika badhe mêdal ing taun ngajêng.
Sasampuning pangêcapipun Sêrat Pananggalan ngajêng punika, Kangjêng Pangeran Adipati Arya Prabu Prangwadana ing nagari Surakarta kaangkat dados kolnèl ing lesiyunipun piyambak. Sarta kapatêdhan nama Kangjêng Pangeran Adipati Arya Mangkunagara, wondening pangangkatipun ing dintên Rêbo kaping: 16 wulan Sèptèmbêr taun Wêlandi 1857, utawi tanggal kaping: 27 wulan Sura taun Jimakir ôngka: 1786.
ꦱꦫꦠ꧀ꦥꦤꦁꦒꦭꦤ꧀
ꦲꦶꦁꦠꦲꦸꦤ꧀ꦮꦭꦤ꧀ꦢꦶꦎꦁꦏ:꧇꧑꧘꧕꧘꧇꧉
ꦏꦲꦕꦥ꧀ꦢꦺꦤꦶꦁꦠꦸꦮꦤ꧀ꦎꦭꦶꦥ꧀ꦲꦤ꧀ꦱꦏꦤꦚ꧀ꦤꦶꦥꦸꦤ꧀ꦲꦶꦁꦤꦒꦫꦶꦱꦩꦮꦶꦱ꧀꧉
ꦧꦧ꧀ꦤꦩꦤꦶꦁꦠꦲꦸꦤ꧀ꦗꦮꦶ꧉
ꦤꦩꦤꦶꦥꦸꦤ꧀ꦠꦲꦸꦤ꧀ꦗꦮꦶꦥꦸꦤꦶꦏꦱꦩꦶꦏꦧꦏ꧀ꦠꦱꦏꦶꦁꦤꦥ꧀ꦠꦸꦤꦶꦥꦸꦤ꧀ꦥꦶꦪꦩ꧀ꦧꦏ꧀ꦥꦶꦪꦩ꧀ꦧꦏ꧀꧉ꦲꦮꦶꦠ꧀ꦲꦶꦁꦏꦁꦏꦭꦩ꧀ꦥꦃꦲꦶꦁꦠꦶꦪꦁꦄꦫꦧ꧀꧈ꦱꦱ꧀ꦠꦿꦤꦶꦥꦸꦤ꧀ꦔꦶꦫꦱ꧀ꦏꦢꦩꦭ꧀ꦲꦺꦴꦁꦏꦏꦢꦺꦴꦱ꧀ꦠꦱꦱ꧀ꦠꦿꦄꦭꦶꦥ꧀꧈ꦏꦢꦩꦭ꧀ꦲꦺꦴꦁꦏ:꧇꧑꧇꧈ꦱꦱ꧀ꦠꦿꦧꦼꦏꦢꦩꦭ꧀ꦲꦺꦴꦁꦏ:꧇꧒꧇꧈ꦗꦶꦩ꧀:꧇꧓꧇꧈ꦢꦭ꧀:꧇꧔꧇꧈ꦲꦼꦲꦼ:꧇꧕꧇꧈ꦮꦮꦸ:꧇꧖꧇꧈ꦗꦼ:꧇꧗꧇꧈ꦮꦺꦴꦤ꧀ꦢꦼꦤꦶꦁꦤꦥ꧀ꦠꦸꦤꦶꦁꦢꦶꦤ꧀ꦠꦤ꧀ꦮꦮꦺꦴꦭꦸꦥꦸꦤꦶꦏ:꧇꧑꧇꧈꧇꧕꧇꧈꧇꧓꧇꧈꧇꧗꧇꧈꧇꧔꧇꧈꧇꧒꧇꧈꧇꧖꧇꧈꧇꧓꧇꧈ꦏꦢꦺꦴꦱ꧀ꦆꦁꦏꦁꦱꦩ꧀ꦥꦸꦤ꧀ꦏꦥꦿꦠꦼꦭꦏꦏ꦳ꦏꦤ꧀ꦲꦶꦁꦔꦗꦁ꧈ꦢꦢꦺꦴꦱ꧀ꦱꦱ꧀ꦠꦿꦄꦭꦶꦥ꧀꧈ꦲꦼ꧈ꦗꦶꦩ꧀꧈ꦗꦼ꧈ꦢꦭ꧀꧈ꦧꦼ꧈ꦗꦶꦩ꧀꧈ꦲꦶꦁꦏꦁꦥꦸꦤꦶꦏꦱꦫꦺꦃꦤꦶꦁꦮꦺꦴꦤ꧀ꦠꦤ꧀ꦠꦲꦸꦤ꧀ꦏꦏꦭꦶꦃꦲꦶꦁꦏꦁꦠꦸꦁꦒꦶꦭ꧀ꦤꦥ꧀ꦠꦸ:꧇꧓꧇꧈ꦩꦶꦭꦲꦶꦁꦏꦁꦱꦠꦸꦁꦒꦶꦭ꧀ꦏꦮꦱ꧀ꦠꦤꦤ꧀ꦗꦶꦩꦮꦭ꧀꧉ꦱꦠꦸꦁꦒꦶꦭꦶꦥꦸꦤ꧀ꦏꦮꦱ꧀ꦠꦤꦤ꧀ꦗꦶꦩꦏꦶꦂ:ꦠꦒꦱꦶꦥꦸꦤ꧀ꦗꦶꦩ꧀ꦮꦏꦱꦤ꧀꧉
ꦧꦧ꧀ꦭꦩ꧀ꦥꦃꦲꦶꦁꦥꦿꦤꦠꦩꦺꦴꦁꦱ꧉
ꦥꦿꦤꦠꦩꦺꦴꦁꦱꦥꦸꦤꦶꦏꦪꦱꦤ꧀ꦢꦭꦩ꧀ꦆꦁꦏꦁꦱꦶꦤꦸꦲꦸꦤ꧀ꦏꦔꦁꦱꦸꦱꦸꦲꦸꦤꦤ꧀ꦥꦏꦸꦧꦸꦮꦤꦲꦶꦁꦏꦁꦏꦥꦶꦁꦮ꦳:ꦲꦶꦁꦱꦸꦫꦏꦂꦠ꧈ꦏꦢꦺꦴꦱ꧀ꦲꦶꦁꦏꦁꦏꦥꦿꦠꦺꦭꦏꦏꦤ꧀ꦲꦶꦁꦱꦫꦠ꧀ꦥꦤꦁꦒꦭꦤ꧀ꦲꦶꦁꦠꦲꦸꦤ꧀꧇꧑꧘꧕꧖꧇꧈ꦮꦺꦴꦤ꧀ꦢꦺꦤꦶꦁꦭꦩ꧀ꦥꦲꦶꦁꦥꦿꦤꦠꦩꦺꦴꦁꦱꦮꦲꦸꦩꦏꦠꦤ꧀꧉
ꦏꦱꦲꦸꦩꦸꦫꦶꦥꦸꦤ꧀꧇꧔꧑꧇ꦢꦶꦤ꧀ꦠꦼꦤ꧀꧈ꦱꦸꦂꦪꦮꦶꦮꦶꦠ꧀ꦩꦔꦶꦢꦸꦭ꧀꧉
ꦏꦭꦶꦃꦲꦸꦩꦸꦫꦶꦥꦸꦤ꧀꧇꧒꧓꧇ꦢꦶꦤ꧀ꦠꦼꦤ꧀꧉
ꦏꦠꦶꦒꦲꦸꦩꦸꦫꦶꦥꦸꦤ꧀꧇꧒꧔꧇ꦢꦶꦤ꧀ꦠꦼꦤ꧀꧉
ꦏꦱꦏꦮꦤ꧀ꦲꦸꦩꦸꦫꦶꦥꦸꦤ꧀꧇꧒꧕꧇ꦢꦶꦤ꧀ꦠꦼꦤ꧀꧉
ꦒꦁꦱꦭ꧀ꦲꦸꦩꦸꦫꦶꦥꦸꦤ꧀꧇꧒꧗꧇ꦢꦶꦤ꧀ꦠꦼꦤ꧀꧉
ꦏꦤꦼꦩ꧀ꦲꦸꦩꦸꦫꦶꦥꦸꦤ꧀꧇꧔꧓꧇ꦢꦶꦤ꧀ꦠꦼꦤ꧀꧉
ꦱꦸꦂꦪꦥꦤ꧀ꦠꦺꦴꦏ꧀ꦢꦸꦩꦸꦒꦶꦮꦼꦏꦱ꧀ꦏꦶꦢꦸꦭ꧀꧉
ꦏꦥꦶꦠꦸꦲꦸꦩꦸꦫꦶꦥꦸꦤ꧀꧇꧔꧓꧇ꦢꦶꦤ꧀ꦠꦼꦤ꧀꧉ꦱꦸꦂꦪꦮꦶꦮꦶꦠ꧀ꦩꦔꦭꦺꦂ꧉
ꦏꦮꦺꦴꦭꦸꦲꦸꦩꦸꦫꦶꦥꦸꦤ꧀꧇꧒꧖꧇ꦲꦸꦠꦮꦶ꧇꧒꧗꧇ꦢꦶꦤ꧀ꦠꦼꦤ꧀꧉
ꦪꦺꦤ꧀ꦠꦲꦸꦤ꧀ꦮꦱ꧀ꦠꦸꦲꦸꦩꦸꦫꦶꦥꦸꦤ꧀꧇꧒꧖꧇ꦢꦶꦤ꧀ꦠꦼꦤ꧀꧈ꦪꦺꦤ꧀ꦮꦸꦤ꧀ꦠꦸ:꧇꧒꧗꧇ꦢꦶꦤ꧀ꦠꦼꦤ꧀꧉
ꦏꦱꦔꦲꦸꦩꦸꦫꦶꦥꦸꦤ꧀꧇꧒꧕꧇ꦢꦶꦤ꧀ꦠꦼꦤ꧀꧉
ꦏꦱꦢꦱꦲꦸꦩꦸꦫꦶꦥꦸꦤ꧀꧇꧒꧔꧇ꦢꦶꦤ꧀ꦠꦼꦤ꧀꧉
ꦝꦼꦱ꧀ꦛꦲꦸꦩꦸꦫꦶꦥꦸꦤ꧀꧇꧒꧓꧇ꦢꦶꦤ꧀ꦠꦼꦤ꧀꧉
ꦱꦝꦲꦸꦩꦸꦫꦶꦥꦸꦤ꧀꧇꧔꧑꧇ꦢꦶꦤ꧀ꦠꦼꦤ꧀꧉
ꦱꦸꦂꦪꦥꦤ꧀ꦠꦺꦴꦏ꧀ꦢꦸꦩꦸꦒꦶꦮꦼꦏꦱ꧀ꦭꦺꦂ꧉
ꦒꦸꦁꦒꦸꦔꦶꦁꦢꦶꦤ꧀ꦠꦼꦤ꧀ꦱꦊꦧꦼꦠꦶꦁꦱꦠꦲꦸꦤ꧀꧈ꦪꦺꦤ꧀ꦮꦱ꧀ꦠꦸ:꧇꧓꧖꧕꧇꧈ꦪꦺꦤ꧀ꦮꦸꦤ꧀ꦠꦸ:꧇꧓꧖꧖꧇ꦢꦶꦤ꧀ꦠꦼꦤ꧀꧉
ꦩꦼꦁꦒꦃꦥꦁꦒꦺꦤꦤꦶꦁꦠꦲꦸꦤ꧀ꦮꦸꦤ꧀ꦠꦸꦩꦼꦏꦠꦼꦤ꧀ꦲꦶꦁꦠꦲꦸꦤ꧀ꦲꦺꦴꦁꦏ:꧇꧔꧇꧈ꦲꦺꦴꦁꦏ:꧇꧘꧇꧈꧇꧑꧒꧇꧈꧇꧑꧖꧇꧈꧇꧒꧐꧇꧈ꦱꦭꦗꦼꦔꦶꦥꦸꦤ꧀ꦱꦧꦼꦤ꧀ꦲꦁꦱꦭ꧀ꦏꦮꦤ꧀ꦠꦲꦸꦤ꧀꧈ꦲꦶꦁꦒꦶꦃꦥꦸꦤꦶꦏꦠꦲꦸꦤ꧀ꦮꦸꦤ꧀ꦠꦸ꧈ꦲꦶꦁꦏꦁꦏꦛꦃꦏꦛꦃꦱꦩꦶꦮꦱ꧀ꦠꦸ꧈ꦏꦢꦺꦴꦱ꧀ꦠꦲꦸꦤ꧀ꦲꦺꦴꦁꦏ꧇꧑꧇꧈꧇꧒꧇꧈꧇꧓꧇꧈꧇꧕꧇꧈꧇꧖꧇꧈꧇꧗꧇꧈꧇꧙꧇꧈꧇꧑꧐꧇꧈ꦱꦥꦤꦸꦁꦒꦶꦭꦤꦶꦥꦸꦤ꧀ꦱꦢꦪꦲꦶꦁꦏꦁꦧꦺꦴꦠꦼꦤ꧀ꦏꦊꦧꦼꦠ꧀ꦚꦏꦮꦤꦤ꧀꧈ꦲꦶꦁꦒꦶꦃꦥꦸꦤꦶꦏꦠꦲꦸꦤ꧀ꦮꦱ꧀ꦠꦸ꧉
ꦩꦤꦮꦶꦤꦒꦫꦶꦲꦶꦁꦱꦸꦫꦏꦂꦠ:ꦠꦸꦩ꧀ꦧꦸꦏ꧀ꦏꦥꦶꦁꦱꦥꦶꦱꦤ꧀ꦱꦧꦼꦤ꧀ꦠꦲꦸꦤ꧀ꦤꦸꦗꦸꦮꦶꦮꦶꦠꦶꦥꦸꦤ꧀ꦩꦺꦴꦁꦱꦒꦁꦱꦭ꧀꧈ꦠꦸꦩ꧀ꦧꦸꦏ꧀ꦏꦥꦶꦁꦏꦭꦶꦃꦤꦸꦗꦸꦲꦶꦁꦱꦮꦶꦮꦶꦠꦶꦥꦸꦤ꧀ꦩꦺꦴꦁꦱꦏꦱꦔ꧈ꦪꦺꦤ꧀ꦲꦶꦁꦱꦤꦺꦱ꧀ꦤꦒꦫꦶꦲꦶꦁꦒꦶꦤ꧀ꦮꦺꦴꦤ꧀ꦠꦼꦤ꧀ꦏꦲꦺꦴꦠꦶꦥꦸꦤ꧀꧉
ꦩꦮꦶꦩꦮꦶꦭꦺꦂꦏꦶꦢꦸꦭꦶꦥꦸꦤ꧀꧉
ꦏꦢꦺꦴꦱ꧀ꦠꦲꦶꦁꦤꦒꦫꦶꦧꦠꦮꦶꦠꦸꦩ꧀ꦧꦸꦏ꧀ꦏꦥꦶꦁꦱꦥꦶꦱꦤ꧀ꦲꦔꦿꦸꦩꦶꦪꦶꦤꦶꦠꦸꦩ꧀ꦧꦸꦏꦶꦁꦱꦸꦫꦏꦂꦠ:ꦲꦸꦢꦏꦮꦶꦱ꧀ꦏꦮꦤ꧀ꦢꦶꦤ꧀ꦠꦼꦤ꧀꧉
ꦠꦸꦩ꧀ꦧꦸꦏ꧀ꦏꦥꦶꦁꦏꦭꦶꦃꦲꦶꦁꦒꦶꦃꦲꦔꦤ꧀ꦠꦸꦤꦶꦩꦺꦃꦏꦮꦤ꧀ꦢꦶꦤ꧀ꦠꦼꦤ꧀꧉
ꦪꦺꦤ꧀ꦲꦶꦁꦥꦕꦶꦠꦤ꧀ꦏꦺꦴꦱꦺꦴꦏ꧀ꦮꦁꦱꦸꦭ꧀꧈ꦠꦸꦩ꧀ꦧꦸꦏ꧀ꦏꦥꦶꦁꦱꦥꦶꦱꦤ꧀ꦲꦔꦤ꧀ꦠꦸꦤꦶꦠꦸꦩ꧀ꦧꦸꦏꦶꦁꦱꦸꦫꦏꦂꦠꦩꦺꦃꦏꦭꦶꦃꦢꦶꦤ꧀ꦠꦼꦤ꧀꧈ꦠꦸꦩ꧀ꦧꦸꦏ꧀ꦏꦥꦶꦁꦏꦭꦶꦃꦲꦔꦿꦸꦩꦶꦪꦶꦤꦶꦏꦭꦶꦃꦢꦶꦤ꧀ꦠꦼꦤ꧀꧉
ꦱꦼꦩꦤ꧀ꦠꦼꦤ꧀ꦥꦸꦤꦶꦏꦪꦺꦤ꧀ꦱꦊꦧꦼꦠꦶꦁꦠꦤꦃꦗꦮꦶꦥꦸꦤꦶꦏꦏꦶꦫꦁꦭꦁꦏꦸꦔꦧꦺꦴꦠꦼꦤ꧀ꦥꦠꦺꦴꦱ꧀ꦏꦛꦃ꧉
ꦥꦸꦤꦶꦏꦕꦫꦶꦪꦺꦴꦱꦶꦁꦥꦤ꧀ꦝꦮ꧈ꦏꦢꦺꦴꦱ꧀ꦲꦶꦁꦏꦁꦏꦱꦼꦧꦸꦠ꧀ꦲꦶꦁꦱꦼꦫꦠ꧀ꦩꦲꦧꦫꦠ꧉
꧇꧑꧇꧉ꦝꦤ꧀ꦝꦁꦒꦸꦭ
꧇꧑꧇꧉ꦏꦁꦥꦶꦤꦸꦂꦮꦫꦶꦤꦼꦁꦒꦺꦁꦲꦂꦠꦠꦶ/ꦏꦤ꧀ꦝꦤꦶꦫꦥꦤ꧀ꦝꦮꦏꦁꦏꦺꦴꦕꦥ꧀/ꦲꦶꦁꦱꦿꦠ꧀ꦩꦲꦧꦫꦠꦤꦺ/ꦩꦲꦧꦫꦠꦮꦲꦸ/ꦠꦼꦩ꧀ꦧꦸꦔꦶꦫꦱꦁꦏꦽꦠꦠꦸꦮꦶꦤ꧀/ꦥꦸꦤꦶꦏꦧꦧꦺꦴꦤꦶꦁꦱꦿꦠ꧀/ꦧꦿꦠꦪꦸꦢꦤꦶꦥꦸꦤ꧀/ꦩꦶꦮꦃꦥꦤꦸꦁꦒꦭꦤꦶꦫ/ꦕꦿꦶꦠꦤꦶꦁꦥꦤ꧀ꦝꦮꦩꦾꦁꦏꦺꦴꦫꦮꦠꦸꦮꦶꦤ꧀/ꦊꦭꦸꦲꦸꦫꦶꦫꦱꦁꦒ//
꧇꧒꧇꧉ꦲꦤꦔꦶꦁꦠꦠꦶꦧꦤꦺꦲꦶꦁꦗꦮꦶ/ꦏꦺꦃꦱꦭꦺꦤꦚ꧀ꦤꦶꦫꦭꦮꦤ꧀ꦱꦼꦫꦠ꧀/ꦮꦲꦸꦩꦲꦧꦫꦠꦤꦺ/ꦢꦺꦤꦺꦒꦤꦚ꧀ꦫꦺꦠꦸꦲꦸ/ꦏꦢꦶꦲꦶꦁꦏꦁꦮꦶꦤꦶꦪꦺꦴꦱ꧀ꦩꦁꦏꦶꦤ꧀/ꦫꦶꦏꦭꦏꦸꦤꦤꦶꦫ/ꦲꦶꦁꦆꦤ꧀ꦝꦸꦮꦶꦤꦸꦮꦸꦱ꧀/ꦮꦺꦴꦤ꧀ꦠꦼꦤ꧀ꦏꦁꦩꦢꦼꦒ꧀ꦤꦫꦺꦤ꧀ꦢꦿ/ꦲꦧꦶꦱꦶꦏꦤ꧀ꦥꦿꦧꦸꦧꦫꦠꦥꦸꦤꦶꦏꦶ/ꦏꦁꦤꦼꦫꦃꦏꦼꦤ꧀ꦥꦤ꧀ꦝꦮ//
꧇꧓꧇꧉ꦩꦾꦁꦤꦼꦫꦃꦏꦼꦤ꧀ꦏꦺꦴꦫꦮꦱꦏꦭꦶꦂ/ꦢꦺꦮꦱ꧀ꦠꦤꦶꦁꦏꦺꦴꦫꦮꦏꦧꦼꦏ꧀ꦠ/ꦱꦶꦁꦥꦿꦧꦸꦏꦸꦫꦸꦗꦸꦭꦸꦏꦺ/ꦏꦥꦽꦤꦃꦮꦪꦃꦧꦸꦪꦸꦠ꧀/ꦭꦮꦤ꧀ꦮꦲꦸꦧꦫꦠꦄꦗꦶ/ꦮꦸꦱ꧀ꦚꦲꦤ꧀ꦠꦫꦭꦩ/ꦮꦺꦴꦤ꧀ꦠꦼꦤ꧀ꦠꦼꦝꦏꦶꦥꦸꦤ꧀/ꦩꦭꦶꦃꦥꦿꦧꦸꦄꦱ꧀ꦠꦶꦩꦔꦿꦤ꧀/ꦏꦁꦲꦏꦂꦪꦝꦠꦸꦭꦪꦺꦁꦒꦭ꧀ꦱꦮꦶꦗꦶ/ꦮꦱ꧀ꦠꦔꦱ꧀ꦠꦶꦤꦥꦸꦫ//
꧇꧔꧇꧉ꦩꦾꦁꦮꦶꦤꦱ꧀ꦠꦤ꧀ꦒꦗꦥꦸꦫꦠꦸꦮꦶꦤ꧀/ꦒꦗꦲꦮꦾꦩꦂꦩꦫꦤ꧀ꦩꦁꦏꦤ/ꦮꦶꦠ꧀ꦲꦱ꧀ꦠꦶꦒꦗꦃꦠꦼꦒꦼꦱꦺ/ꦲꦃ꧀ꦮꦪꦠꦼꦒꦼꦱꦶꦥꦸꦤ꧀/ꦤꦩꦢꦢꦾꦮꦱ꧀ꦠꦤꦶꦁꦤꦒꦿꦶ/ꦏꦧꦼꦏ꧀ꦠꦱꦶꦁꦥꦤꦼꦔꦿꦤ꧀/ꦤꦶꦫꦥꦿꦧꦸꦤꦶꦥꦸꦤ꧀/ꦢꦺꦤꦺꦥꦽꦤꦲꦶꦫꦥꦿꦗ/ꦲꦶꦁꦔꦱ꧀ꦠꦶꦤꦮꦲꦸꦲꦤꦺꦁꦱꦏꦶꦢꦸꦭꦶꦁ/ꦥꦿꦧꦠꦲꦶꦁꦆꦩꦮꦤ꧀//
꧇꧕꧇꧉ꦢꦠꦤ꧀ꦠꦼꦧꦶꦃꦭꦤ꧀ꦒꦺꦴꦁꦒꦧꦼꦤꦮꦶ/ꦪꦠꦥꦿꦧꦸꦄꦱ꧀ꦠꦶꦱꦶꦤꦶꦭꦶꦲꦤ꧀/ꦲꦶꦁꦥꦸꦠꦿꦱꦿꦶꦥꦿꦠꦶꦥꦤꦺ/ꦱꦁꦥꦿꦠꦶꦥꦱꦼꦱꦸꦤꦸ/ꦏꦏꦸꦁꦠꦶꦒꦲꦶꦁꦏꦁꦱꦮꦶꦗꦶ/ꦢꦺꦮꦥꦶꦮꦱ꧀ꦠꦤꦶꦫ/ꦏꦥꦶꦁꦏꦭꦶꦲꦶꦥꦸꦤ꧀/ꦧꦃ꧀ꦭꦶꦏꦥꦤꦼꦔꦿꦤꦶꦫ/ꦏꦠꦿꦶꦤꦶꦫꦱꦤ꧀ꦠꦤꦸꦢꦺꦤꦺꦢꦺꦮꦥꦶ/ꦲꦤꦤ꧀ꦝꦁꦒꦼꦫꦃꦧꦫꦃ//
꧇꧖꧇꧉ꦢꦠꦤ꧀ꦧꦁꦏꦶꦠ꧀ꦮꦭꦸꦪꦱꦸꦩꦂꦩꦶ/ꦠꦶꦭꦂꦥꦸꦫꦩꦔꦸꦤ꧀ꦠꦥꦺꦁꦮꦤ/ꦮꦺꦴꦤ꧀ꦠꦼꦤ꧀ꦱꦠꦼꦔꦃꦏꦲꦺꦴꦭꦺ/ꦭꦩꦸꦤ꧀ꦢꦺꦮꦥꦶꦮꦲꦸ/ꦠꦼꦏꦺꦁꦩꦁꦏꦶꦤ꧀ꦢꦠꦤ꧀ꦔꦼꦩꦱꦶ/ꦩꦏ꧀ꦱꦶꦃꦠꦥꦤꦺꦁꦢꦺꦱ/ꦏꦭꦥꦫꦤꦶꦥꦸꦤ꧀/ꦱꦭꦺꦫꦶꦁꦲꦂꦢꦶꦆꦩꦮꦤ꧀/ꦲꦫꦶꦤꦶꦫꦧꦃ꧀ꦭꦶꦏꦕꦏꦂꦥꦿꦶꦧꦢꦶ/ꦔꦸꦥꦪꦥꦿꦗꦲꦺꦁꦒꦭ꧀//
꧇꧗꧇꧉ꦢꦢꦾꦱꦁꦱꦤ꧀ꦠꦤꦸꦏꦁꦮꦸꦫꦒꦶꦭ꧀/ꦱꦸꦩꦶꦭꦶꦃꦲꦶꦁꦏꦥꦿꦧꦺꦴꦤ꧀ꦔꦱ꧀ꦠꦶꦤ/ꦱꦼꦱꦸꦤꦸꦗꦸꦒꦥꦿꦶꦪꦤꦺ/ꦩꦶꦗꦶꦭ꧀ꦱꦏꦶꦁꦢꦾꦃꦄꦪꦸ/ꦢꦺꦮꦶꦒꦺꦴꦁꦒꦠꦸꦮꦶꦗꦃꦤꦮꦶ/ꦱꦶꦤꦸꦁꦧꦶꦱꦶꦏꦤ꧀ꦧꦶꦱ꧀ꦩ/ꦔꦗꦿꦶꦲꦶꦭꦶꦫꦶꦥꦸꦤ꧀/ꦢꦸꦥꦶꦱꦶꦫꦮꦸꦱ꧀ꦢꦶꦮꦱ/ꦮꦶꦤꦶꦱꦸꦝꦩꦿꦶꦁꦱꦸꦢꦂꦩꦤꦶꦫꦢꦢꦶ/ꦱꦿꦶꦤꦫꦤꦠꦩꦸꦝ//
꧇꧘꧇꧉ꦏꦱꦸꦱꦿꦩ꧀ꦧꦼꦏ꧀ꦮꦶꦕꦏ꧀ꦱꦤꦔꦢꦶꦭ꧀/ꦲꦥꦿꦠꦩꦲꦶꦁꦥꦔꦸꦭꦃꦪꦺꦴꦢ/ꦩꦾꦁꦩꦿꦶꦁꦥꦏꦼꦩ꧀ꦲꦒꦩꦤꦺ/ꦱꦩꦤꦏꦁꦮꦶꦤꦸꦮꦸꦱ꧀/ꦲꦶꦁꦩꦒꦢꦮꦺꦴꦤ꧀ꦠꦼꦤ꧀ꦩꦤ꧀ꦝꦶꦫꦶ/ꦤꦫꦺꦤ꧀ꦢꦿꦲꦧꦶꦱꦶꦏꦤ꧀/ꦱꦁꦄꦥꦿꦧꦸꦮꦱꦸ/ꦏꦼꦏꦭꦶꦃꦲꦠ꧀ꦩꦗꦤꦶꦫ/ꦩꦶꦪꦺꦴꦱ꧀ꦏꦼꦩ꧀ꦧꦂꦥꦠꦸꦠꦤ꧀ꦱꦏꦶꦁꦲꦥ꧀ꦱꦫꦶ/ꦮꦱ꧀ꦠꦢꦺꦮꦶꦄꦢꦿꦶꦏ//
꧇꧙꧇꧉ꦲꦥ꧀ꦱꦫꦺꦏꦸꦲꦱꦭꦃꦏꦢꦢꦶꦤ꧀/ꦮꦂꦤꦶꦩꦶꦤꦩꦂꦩꦱꦸꦠꦤꦶꦫ/ꦏꦁꦥꦿꦶꦪꦩꦠ꧀ꦱꦾꦮꦱ꧀ꦠꦤꦺ/ꦠꦼꦒꦼꦱꦺꦲꦸꦭꦩ꧀ꦫꦤꦸ/ꦢꦸꦏ꧀ꦢꦶꦮꦱꦗꦸꦩꦼꦤꦼꦁꦲꦗꦶ/ꦲꦤꦺꦁꦥꦿꦗꦮꦶꦫꦛ/ꦲꦗꦼꦗꦸꦭꦸꦏ꧀ꦥꦿꦧꦸ/ꦩꦠ꧀ꦱꦾꦤꦠꦲꦸꦠꦮꦶꦱꦁ/ꦩꦠ꧀ꦱꦾꦥꦠꦶꦢꦺꦲꦫꦶꦤꦶꦫꦥꦮꦺꦱ꧀ꦠꦿꦶ/ꦱꦠꦾꦮꦠꦶꦩꦔꦫꦤ꧀//
꧇꧑꧐꧇꧉ꦠꦸꦮꦶꦤ꧀ꦩꦠ꧀ꦱꦾꦒꦺꦴꦤ꧀ꦢꦲꦮꦶꦠ꧀ꦢꦺꦤꦶꦁ/ꦮꦤ꧀ꦢꦤꦶꦫꦲꦩꦶꦱ꧀ꦏꦢꦶꦩꦶꦤ/ꦤꦸꦭꦾꦥꦶꦤꦿꦕꦪꦏꦏꦺ/ꦩꦿꦶꦁꦱꦗꦸꦒꦤꦶꦁꦫꦠꦸ/ꦥꦿꦧꦸꦢꦱꦲꦶꦁꦏꦁꦮꦼꦮꦔꦶ/ꦢꦢꦾꦥꦶꦤꦺꦠ꧀ꦲꦠ꧀ꦩꦗ/ꦫꦺꦃꦤꦶꦁꦒꦤ꧀ꦢꦤꦶꦥꦸꦤ꧀/ꦲꦩꦶꦱ꧀ꦢꦠꦤ꧀ꦮꦒꦼꦢ꧀ꦱꦶꦂꦤ/ꦠꦶꦤꦸꦢꦸꦃꦲꦶꦁꦤꦠꦥꦶꦤꦿꦶꦃꦲꦤꦩ꧀ꦧꦔꦶ/ꦮꦺꦴꦤ꧀ꦠꦼꦤ꧀ꦲꦶꦁꦭ꧀ꦮꦃꦗꦩꦸꦤ//
꧇꧑꧑꧇꧉ꦩꦺꦴꦁꦏꦠꦥꦤꦶꦫꦱꦁꦱꦸꦢꦺꦮꦶ/ꦢꦸꦥꦶꦱꦩ꧀ꦥꦸꦤ꧀ꦭꦩꦤ꧀ꦠꦫꦤꦶꦫ/ꦤꦸꦭꦾꦲꦤ꧀ꦠꦸꦏ꧀ꦥꦶꦠꦸꦭꦸꦔꦺ/ꦲꦠ꧀ꦩꦗꦺꦁꦱꦏ꧀ꦠꦿꦶꦮꦶꦏꦸ/ꦥꦫꦱꦫꦲꦶꦁꦏꦁꦮꦼꦮꦔꦶ/ꦪꦺꦏꦸꦲꦶꦁꦏꦁꦲꦩ꧀ꦧꦺꦁꦏꦱ꧀/ꦒꦺꦴꦤ꧀ꦢꦲꦩꦶꦱ꧀ꦮꦲꦸ/ꦩꦭꦃꦩꦭꦃꦱꦤ꧀ꦠꦸꦤ꧀ꦒꦺꦴꦤ꧀ꦢ/ꦭꦁꦏꦸꦁꦲꦫꦸꦩ꧀ꦩꦂꦩꦮꦺꦴꦤ꧀ꦠꦼꦤ꧀ꦏꦁꦩꦱ꧀ꦠꦤꦶ/ꦒꦺꦴꦤ꧀ꦢꦮꦠꦶꦱꦁꦉꦠ꧀ꦤ//
꧇꧑꧒꧇꧉ꦤꦸꦭꦾꦱꦶꦫꦉꦠ꧀ꦤꦒꦺꦴꦤ꧀ꦢꦮꦠꦶ/ꦒꦶꦤꦂꦮꦩꦿꦶꦁꦉꦱꦶꦥꦫꦱꦫ/ꦢꦠꦤ꧀ꦲꦤ꧀ꦠꦫꦭꦩꦶꦤꦺ/ꦱꦁꦉꦠ꧀ꦤꦲꦱꦼꦱꦸꦤꦸ/ꦤꦺꦁꦤꦸꦱ꧀ꦮꦤꦺꦗꦩꦸꦤꦏꦭꦶ/ꦩꦶꦪꦺꦴꦱ꧀ꦗꦭꦸꦱꦶꦤꦸꦁꦫꦤ꧀/ꦢꦺꦫꦩꦱꦁꦮꦶꦏꦸ/ꦏꦽꦱ꧀ꦤꦢ꧀ꦮꦺꦥꦪꦤꦮꦾꦱ/ꦢꦸꦥꦶꦭꦲꦶꦂꦢꦾꦤ꧀ꦲꦒꦼꦁꦱꦏꦭꦤꦸꦭꦶ/ꦥꦩꦶꦠ꧀ꦩꦿꦶꦁꦲꦶꦧꦸꦤꦶꦫ//
꧇꧑꧓꧇꧉ꦠꦸꦩꦸꦠꦸꦂꦲꦶꦁꦱꦸꦢꦂꦩꦲꦸꦩꦸꦭꦶꦃ/ꦩꦿꦶꦁꦥꦠꦥꦤ꧀ꦠꦸꦫꦶꦫꦲꦶ[
꧇꧑꧇]ꦫꦺꦤ/ꦭꦩꦸꦤ꧀ꦏꦁꦲꦶꦧꦸꦲꦶꦁꦠꦼꦩ꧀ꦧꦺ/ꦢꦂꦧꦺꦏꦂꦱꦲꦥꦁꦒꦸꦃ/ꦕꦶꦤꦶꦥ꧀ꦠꦴꦏꦺꦮꦭꦥꦿꦥ꧀ꦠꦶ/ꦫꦶꦮꦸꦱ꧀ꦚꦤ꧀ꦠꦫꦭꦩ/ꦮꦲꦸꦲꦶꦁꦏꦁꦏꦤ꧀ꦠꦸꦤ꧀/ꦢꦺꦮꦶꦱꦠꦾꦮꦠꦶꦱꦶꦫ/ꦏꦠꦽꦚ꧀ꦗꦸꦃꦲꦶꦁꦱꦤ꧀ꦠꦤꦸꦱꦿꦶꦤꦫꦥꦠꦶ/ꦤꦠꦮꦔ꧀ꦮꦁꦏꦱ꧀ꦩꦫꦤ꧀//
꧇꧑꧔꧇꧉ꦢꦾꦤ꧀ꦥꦶꦤꦶꦤ꧀ꦠꦩꦿꦶꦁꦢꦱꦤꦽꦥꦠꦶ/ꦱꦁꦢꦾꦃꦮꦲꦸꦪꦸꦤ꧀ꦲꦶꦔꦁꦏꦃꦒꦂꦮ/ꦱꦿꦶꦤꦠꦥꦼꦛꦸꦏ꧀ꦲꦶꦁꦠꦾꦱꦺ/ꦔꦶꦁꦩꦶꦤ꧀ꦠꦗꦚ꧀ꦗꦶꦭꦩꦸꦤ꧀/ꦢꦺꦮꦶꦱꦠꦾꦮꦠꦶꦲꦶꦁꦧꦺꦚ꧀ꦗꦶꦁ/ꦥꦼꦥꦸꦠꦿꦱꦸꦩꦶꦭꦶꦲ/ꦥꦚ꧀ꦗꦼꦤꦼꦔꦤꦶꦥꦸꦤ꧀/ꦮꦺꦴꦤ꧀ꦠꦼꦤ꧀ꦲꦶꦁꦔꦱ꧀ꦠꦶꦤꦥꦸꦫ/ꦱꦿꦶꦱꦤ꧀ꦠꦤꦸꦢꦠꦤ꧀ꦗꦸꦩꦸꦫꦸꦁꦲꦶꦁꦏꦥ꧀ꦠꦶ/ꦲꦮꦶꦠ꧀ꦠꦤꦪꦤꦶꦫ//
꧇꧑꧕꧇꧉ꦲꦶꦁꦏꦁꦤꦩꦧꦶꦱ꧀ꦩꦮꦸꦱ꧀ꦏꦶꦤꦂꦢꦶ/ꦥꦿꦧꦸꦲꦤꦺꦴꦩ꧀ꦱꦏ꧀ꦱꦤꦱꦁꦤꦠ/ꦏꦺꦴꦤ꧀ꦢꦸꦂꦱꦿꦸꦱꦸꦤ꧀ꦠꦿꦸꦠ꧀ꦤꦶꦠꦾꦤꦺ/ꦢꦺꦏꦕꦸꦮꦤ꧀ꦲꦶꦁꦭꦸꦭꦸꦠ꧀/ꦱꦥꦿꦥ꧀ꦠꦤ꧀ꦠꦲꦶꦁꦢꦊꦩ꧀ꦥꦸꦫꦶ/ꦤꦶꦠꦾꦩꦱ꧀ꦩꦸꦠꦸꦫꦶꦢ/ꦉꦱꦶꦧꦶꦱ꧀ꦩꦱꦩ꧀ꦥꦸꦤ꧀/ꦲꦁꦒꦂꦗ꧀ꦶꦠꦲꦶꦁꦏꦁꦢꦢꦾ/ꦊꦏꦶꦁꦢꦿꦶꦪꦤꦶꦫꦫꦩꦱꦿꦶꦧꦸꦥꦠꦶ/ꦱꦸꦩꦂꦩꦱꦶꦒꦿꦩꦺꦤ꧀ꦠꦂ//
꧇꧑꧖꧇꧉ꦩꦸꦁꦥꦿꦶꦧꦢꦶꦱꦸꦩꦼꦢꦾꦏꦥꦁꦒꦶꦃ/ꦭꦮꦤ꧀ꦮꦲꦸꦤꦫꦤꦠꦢꦱ/ꦱꦥꦿꦥ꧀ꦠꦤꦶꦫꦺꦁꦔꦂꦱꦤꦺ/ꦲꦥꦿꦱꦼꦠꦾꦏꦭꦩꦸꦤ꧀/ꦢꦠꦤ꧀ꦲꦂꦱꦲꦸꦩꦢꦼꦒ꧀ꦲꦗꦶ/ꦩꦭꦃꦠꦤ꧀ꦲꦂꦱꦏꦿꦩ/ꦱꦭꦩꦶꦠꦸꦩꦸꦮꦸꦃ/ꦥꦿꦧꦸꦢꦱꦢꦸꦏ꧀ꦩꦶꦪꦂꦱ/ꦠꦸꦂꦩꦁꦏꦤꦤꦸꦭꦾꦢꦺꦮꦶꦱꦠꦾꦮꦠꦶ/ꦲꦶꦔꦸꦭꦸꦁꦏꦼꦤ꧀ꦩꦿꦶꦁꦧꦶꦱ꧀ꦩ//
꧇꧑꧗꧇꧉ꦫꦶꦱꦏ꧀ꦱꦤꦧꦶꦤꦼꦏ꧀ꦠꦲꦸꦩꦸꦭꦶꦃ/ꦩꦿꦶꦁꦔꦱ꧀ꦠꦶꦤꦝꦶꦤꦲꦸꦥ꧀ꦏꦼꦤ꧀ꦭꦮꦤ꧀/ꦏꦁꦫꦩꦱꦿꦶꦱꦤ꧀ꦠꦤꦸꦤꦺ/ꦢꦸꦥꦶꦲꦭꦩꦱꦩ꧀ꦥꦸꦤ꧀/ꦢꦺꦮꦶꦱꦠꦾꦮꦠꦶꦱꦼꦱꦶꦮꦶ/ꦏꦼꦏꦭꦶꦃꦩꦶꦪꦺꦴꦱ꧀ꦥꦿꦶꦪ/ꦢꦺꦤꦺꦲꦶꦁꦏꦁꦱꦼꦥꦸꦃ/ꦕꦶꦠꦿꦁꦒꦢꦮꦱ꧀ꦠꦤꦶꦫ/ꦏꦁꦠꦫꦸꦤꦮꦶꦕꦶꦠꦿꦮꦶꦂꦪꦮꦼꦮꦔꦶ/ꦮꦲꦸꦱꦁꦉꦱꦶꦧꦶꦱ꧀ꦩ//
꧇꧑꧘꧇꧉ꦲꦶꦁꦏꦁꦩꦺꦴꦁꦏꦱꦺꦴꦒꦠꦤꦶꦁꦱꦶꦮꦶ/ꦏꦭꦶꦲꦶꦫꦪꦠꦢꦸꦏ꧀ꦱꦁꦤꦠ/ꦱꦤ꧀ꦠꦤꦸꦥꦿꦥ꧀ꦠꦺꦁꦭꦭꦶꦱꦺ/ꦒꦶꦤꦤ꧀ꦠꦾꦤ꧀ꦲꦶꦁꦏꦁꦱꦸꦤꦸ/ꦕꦶꦠꦿꦁꦒꦢꦩꦢꦼꦒ꧀ꦤꦂꦥꦠꦶ/ꦕꦶꦠꦿꦁꦒꦢꦒꦶꦤꦤ꧀ꦠꦾꦤ꧀/ꦲꦶꦁꦮꦲꦸꦫꦶꦤꦶꦥꦸꦤ꧀/ꦏꦁꦮꦱ꧀ꦠꦮꦶꦕꦶꦠꦿꦮꦶꦂꦪ/ꦪꦺꦏꦸꦢꦂꦧꦺꦥꦩꦶꦤ꧀ꦠꦩꦿꦶꦁꦧꦶꦱ꧀ꦩꦥꦶꦤꦿꦶꦃ/ꦲꦔꦸꦥꦪꦏ꧀ꦏꦼꦤ꧀ꦒꦂꦮ//
꧇꧑꧙꧇꧉ꦧꦶꦱ꧀ꦩꦱꦶꦒꦿꦚ꧀ꦗꦸꦗꦸꦒ꧀ꦥꦿꦗꦺꦁꦏꦱꦶ/ꦲꦔꦢꦼꦒꦶꦱꦪꦼꦩ꧀ꦧꦫꦤꦶꦫ/ꦥꦸꦠꦿꦶꦠꦼꦠꦶꦒꦮꦱ꧀ꦠꦤꦺ/ꦲꦺꦴꦩ꧀ꦧꦥꦶꦁꦏꦭꦶꦲꦶꦥꦸꦤ꧀/ꦄꦩ꧀ꦧꦶꦏꦢꦺꦲꦶꦁꦏꦁꦏꦥꦶꦁꦠꦿꦶ/ꦫꦤ꧀ꦢꦺꦮꦶꦎꦩ꧀ꦧꦭꦶꦏ/ꦱꦲꦢꦪꦤꦶꦥꦸꦤ꧀/ꦏꦁꦔ꧀ꦭꦩꦂꦥꦸꦠꦿꦶꦠꦼꦠꦶꦒ/ꦏꦱꦺꦴꦂꦲꦶꦁꦥꦿꦁꦢꦺꦤꦶꦁꦉꦱꦶꦧꦶꦱ꧀ꦩꦱꦩꦶ/ꦤꦸꦭꦾꦮꦤꦺꦴꦢꦾꦠꦶꦒ//
꧇꧒꧐꧇꧉ꦠꦶꦤꦮꦤꦤ꧀ꦩꦿꦶꦁꦱꦁꦧꦶꦱ꧀ꦩꦉꦱꦶ/ꦤꦔꦶꦁꦏꦁꦥꦩ꧀ꦧꦪꦸꦤ꧀ꦢꦺꦮꦶꦲꦺꦴꦩ꧀ꦧ/ꦠꦶꦤꦶꦭꦂꦱꦶꦁꦥꦩꦶꦤ꧀ꦠꦤꦺ/ꦲꦶꦁꦏꦁꦏꦼꦏꦭꦶꦃꦩꦸꦲꦸꦁ/ꦢꦾꦃꦄꦩ꧀ꦧꦶꦏꦩꦶꦮꦃꦏꦁꦲꦫꦶ/ꦎꦩ꧀ꦧꦭꦶꦏꦧꦶꦤꦼꦏ꧀ꦠ/ꦩꦿꦶꦁꦔꦱ꧀ꦠꦶꦤꦩꦤ꧀ꦠꦸꦏ꧀/ꦗꦶꦤꦼꦤꦼꦁꦏꦼꦤ꧀ꦫꦠꦸꦤꦸꦭꦾ/ꦢꦸꦥꦶꦱꦩ꧀ꦥꦸꦤ꧀ꦲꦤ꧀ꦠꦫꦲꦶꦁꦱꦥ꧀ꦠꦮꦂꦱꦶ/ꦥꦿꦧꦸꦮꦶꦕꦶꦠꦿꦮꦶꦂꦪ//
꧇꧒꧑꧇꧉ꦲꦔꦼꦩꦱꦶꦢꦠꦤ꧀ꦠꦶꦭꦂꦱꦶꦮꦶ/ꦩꦂꦩꦲꦶꦧꦸꦤꦶꦫꦱꦿꦸꦠꦸꦫꦶꦢ/ꦲꦮꦶꦠ꧀ꦢꦺꦤꦶꦁꦠꦤꦪꦤꦺ/ꦮꦸꦱ꧀ꦥꦸꦥꦸꦠ꧀ꦮꦶꦗꦶꦤꦶꦥꦸꦤ꧀/ꦲꦶꦁꦮꦸꦱꦤꦱꦁꦱꦠꦾꦮꦠꦶ/ꦏꦪꦠ꧀ꦤꦤ꧀ꦩꦿꦶꦁꦠꦤꦪ/ꦏꦁꦠꦥꦫꦸꦩꦸꦲꦸꦤ꧀/ꦤꦼꦁꦒꦶꦃꦱꦁꦄꦉꦱꦶꦮꦾꦱ/ꦢꦾꦤ꧀ꦕꦶꦤꦶꦥ꧀ꦠꦱꦏꦼꦝꦥ꧀ꦏꦺꦮꦭꦥꦿꦥ꧀ꦠꦶ/ꦩꦸꦁꦒꦶꦁꦔꦂꦱꦤꦶꦁꦫꦺꦤ//
꧇꧒꧒꧇꧉ꦉꦱꦶꦮꦾꦱꦱꦶꦤꦧ꧀ꦢꦤ꧀ꦲꦶꦁꦧꦶꦧꦶ/ꦥꦶꦤꦿꦶꦃꦤꦩ꧀ꦧꦸꦔꦤꦮꦶꦗꦶꦩꦸꦮꦃ/ꦤꦁꦏꦂꦤꦠꦼꦝꦏ꧀ꦠꦼꦝꦏꦺ/ꦱꦸꦩꦒꦸꦃꦲꦠꦸꦫꦶꦥꦸꦤ꧀/ꦝꦶꦤꦲꦸꦥ꧀ꦏꦼꦤ꧀ꦱꦶꦫꦠꦸꦩꦸꦭꦶ/ꦭꦤ꧀ꦠꦶꦭꦫꦤꦺꦒꦂꦮ/ꦤꦠꦏꦁꦮꦸꦱ꧀ꦱꦸꦫꦸꦢ꧀/ꦏꦺꦴꦕꦥꦢꦺꦮꦶꦄꦩ꧀ꦧꦶꦏ/ꦢꦸꦏ꧀ꦏꦥꦁꦒꦶꦃꦏꦭꦮꦤ꧀ꦱꦁꦮꦾꦱꦉꦱꦶ/ꦢꦲꦠ꧀ꦒꦶꦫꦶꦱ꧀ꦠꦸꦩꦶꦔꦭ꧀//
꧇꧒꧓꧇꧉ꦢꦺꦤꦶꦁꦒꦭꦏ꧀ꦲꦸꦭꦠꦶꦫꦠꦸꦮꦶꦤ꧀/ꦤꦺꦠꦿꦲꦤ꧀ꦢꦶꦏ꧀ꦗꦺꦁꦒꦺꦴꦠ꧀ꦮꦺꦃꦏꦠꦽꦱꦤ꧀/ꦱꦁꦢꦺꦮꦶꦮꦲꦸꦩꦂꦩꦤꦺ/ꦫꦶꦏꦭꦤ꧀ꦠꦥꦸꦭꦁꦲꦾꦸꦤ꧀/ꦠꦤ꧀ꦱꦃꦩꦼꦉꦩ꧀ꦲꦩꦂꦒꦶꦢꦺꦤꦶꦁ/ꦠꦤ꧀ꦠꦲꦤ꧀ꦤꦺꦴꦤ꧀ꦲꦶꦁꦥꦿꦶꦪ/ꦢꦢꦾꦠꦼꦩꦲꦶꦥꦸꦤ꧀/ꦮꦮꦿꦠꦤ꧀ꦚꦩꦶꦗꦶꦭ꧀ꦮꦸꦠ/ꦱꦶꦤꦸꦁꦲꦫꦤ꧀ꦢꦽꦠꦫꦱ꧀ꦛꦿꦲꦶꦁꦒꦶꦃꦲꦸꦒꦶ/ꦩꦔꦿꦤ꧀ꦢꦽꦠꦤꦒꦫ//
꧇꧒꧔꧇꧉ꦲꦠꦤꦥꦶꦢꦽꦠꦥꦸꦫꦠꦸꦮꦶꦤ꧀/ꦢꦽꦠꦫꦢꦾꦠꦼꦒꦼꦱꦶꦫꦱꦩꦾ/ꦲꦔꦱ꧀ꦠꦏꦱꦿꦶꦤꦠꦤꦺ/ꦎꦩ꧀ꦧꦭꦶꦏꦏꦁꦏꦤ꧀ꦠꦸꦤ꧀/ꦢꦸꦥꦶꦲꦂꦱꦥꦶꦤꦂꦢꦾꦺꦁꦉꦱ꧀ꦩꦶ/ꦢꦺꦤꦶꦁꦱꦁꦉꦱꦶꦮꦾꦱ/ꦱꦿꦸꦏꦥꦶꦠꦺꦁꦏꦭ꧀ꦧꦸ/ꦏꦺꦴꦁꦱꦶꦏꦥꦪꦸꦱ꧀ꦏꦁꦤꦶꦠꦾ/ꦩꦂꦩꦤꦶꦫꦩꦮꦼꦏꦗꦏꦸꦭꦶꦠ꧀ꦥꦸꦠꦶꦃ/ꦥꦤ꧀ꦝꦸꦥꦤꦼꦔꦿꦤꦶꦫ//
꧇꧒꧕꧇꧉ꦥꦿꦢꦶꦏꦤꦶꦁꦥꦤ꧀ꦝꦸꦲꦶꦏꦸꦥꦸꦠꦶꦃ/ꦢꦾꦃꦄꦩ꧀ꦧꦶꦏꦫꦶꦏꦭꦲꦶꦔꦠꦒ꧀/ꦲꦶꦁꦲꦶꦧꦸꦩꦉꦏꦩꦭꦺꦃ/ꦩꦿꦶꦁꦉꦱꦶꦮꦾꦱꦮꦲꦸ/ꦲꦶꦁꦠꦾꦱꦶꦫꦲꦺꦮꦏꦥꦠꦶ/ꦤꦔꦶꦁꦗꦿꦶꦃꦊꦁꦒꦤꦴ/ꦱꦸꦩꦂꦩꦱꦁꦲꦪꦸ/ꦲꦤꦤ꧀ꦢꦸꦏꦏꦼꦤ꧀ꦲꦸꦥꦪ/ꦲꦤꦶꦩ꧀ꦧꦭꦶꦥꦮꦺꦴꦔꦤꦶꦫꦱꦮꦶꦗꦶ/ꦱꦶꦤꦭꦶꦤꦤ꧀ꦧꦸꦱꦤ//
꧇꧒꧖꧇꧉ꦤꦼꦁꦒꦶꦃꦧꦸꦱꦤꦤꦶꦫꦥꦿꦶꦧꦢꦶ/ꦢꦾꦤ꧀ꦲꦶꦔꦒ꧀ꦚꦤ꧀ꦲꦸꦩꦉꦏ꧀ꦱꦁꦮꦾꦱ/ꦩꦶꦤ꧀ꦝꦢꦺꦮꦶꦄꦩ꧀ꦧꦶꦏꦤꦺ/ꦢꦸꦥꦶꦱꦶꦫꦕꦸꦩꦸꦤ꧀ꦝꦸꦏ꧀/ꦱꦺꦱ꧀ꦠꦸꦱꦶꦫꦱꦁꦮꦾꦱꦉꦱꦶ/ꦏꦱꦩꦫꦤ꧀ꦲꦶꦁꦠꦶꦔꦭ꧀/ꦥꦚꦤꦤꦶꦁꦏꦭ꧀ꦧꦸ/ꦱꦠꦸꦲꦸꦢꦺꦮꦶꦄꦩ꧀ꦧꦶꦏ/ꦱꦶꦤꦁꦒꦩꦤ꧀ꦥꦮꦺꦴꦔꦤ꧀ꦮꦲꦸꦠꦸꦩꦸꦭꦶ/ꦲꦁꦒꦂꦧꦶꦤꦶꦠꦤ꧀ꦠꦫ//
꧇꧒꧗꧇꧉ꦲꦥꦼꦥꦸꦠꦿꦗꦭꦸꦢꦺꦤ꧀ꦗꦸꦭꦸꦏꦶ/ꦮꦶꦢꦸꦫꦠꦼꦒꦼꦱꦺꦮꦶꦕꦏ꧀ꦱꦤ/ꦮꦔ꧀ꦮꦁꦱꦁꦉꦱꦶꦮꦾꦱꦤꦺ/ꦥꦩꦶꦠ꧀ꦝꦠꦼꦁꦏꦁꦲꦶꦧꦸ/ꦲꦸꦩꦤ꧀ꦠꦸꦏ꧀ꦩꦿꦶꦁꦥꦠꦥꦤ꧀ꦩꦭꦶꦃ/ꦫꦺꦃꦤꦶꦁꦱꦁꦢꦽꦠꦫꦱ꧀ꦛꦿ/ꦮꦸꦠꦕꦕꦢꦶꦥꦸꦤ꧀/ꦩꦂꦩꦥꦤ꧀ꦝꦸꦲꦫꦶꦤꦶꦫ/ꦩꦢꦼꦒ꧀ꦥꦿꦧꦸꦲꦤꦺꦴꦩ꧀ꦧꦶꦱ꧀ꦩꦏꦁꦔꦼꦩ꧀ꦧꦤꦶ/ꦲꦩꦼꦁꦏꦸꦏꦥꦩꦱꦤ꧀//
꧇꧒꧘꧇꧉ꦱꦭꦩꦶꦤꦺꦮꦲꦸꦕꦭꦺꦴꦤ꧀ꦲꦗꦶ/ꦩꦏ꧀ꦱꦶꦃꦠꦶꦩꦸꦂꦔꦶꦫꦱ꧀ꦩꦺꦴꦩꦺꦴꦁꦥꦸꦠꦿ/ꦠꦶꦒꦠꦤ꧀ꦠꦫꦭꦩꦶꦤꦺ/ꦫꦗꦥꦸꦠꦿꦠꦿꦶꦮꦲꦸ/ꦩꦶꦗꦶꦭ꧀ꦏꦒꦸꦤꦤꦶꦫꦱꦩꦶ/ꦏꦁꦠꦤ꧀ꦏꦥꦿꦃꦏꦭꦮꦤ꧀/ꦱꦩꦶꦤꦶꦁꦠꦸꦩꦸꦮꦸꦃ/ꦢꦽꦠꦫꦱ꧀ꦛꦿꦭꦁꦏꦸꦁꦫꦺꦴꦱ/ꦥꦤ꧀ꦝꦸꦥꦸꦠꦸꦱ꧀ꦲꦶꦁꦥꦔꦸꦭꦃꦩꦿꦶꦁꦗꦼꦩ꧀ꦥꦫꦶꦁ/ꦢꦺꦤꦺꦱꦶꦫꦮꦶꦢꦸꦫ//
꧇꧒꧙꧇꧉ꦭꦶꦩ꧀ꦥꦢ꧀ꦲꦶꦁꦧꦸꦢꦶꦩꦶꦮꦃꦩꦸꦩ꧀ꦥꦸꦤꦶ/ꦏꦱꦸꦱꦱ꧀ꦠꦿꦤ꧀ꦠꦸꦮꦶꦤ꧀ꦱꦶꦭꦏꦿꦩ/ꦮꦱꦤꦥꦸꦠꦿꦠꦶꦒꦤꦺ/ꦱꦶꦁꦫꦩꦤ꧀ꦠꦸꦏ꧀ꦥꦶꦠꦸꦢꦸꦃ/ꦏꦶꦤꦺꦤ꧀ꦱꦩꦶꦲꦩꦮꦏꦿꦩꦶ/ꦱꦁꦢꦽꦠꦫꦱ꧀ꦛꦿꦏꦿꦩ/ꦲꦤ꧀ꦠꦸꦏ꧀ꦥꦸꦠꦿꦤꦶꦥꦸꦤ꧀/ꦱꦿꦶꦱꦸꦧꦭꦲꦶꦁꦒꦤ꧀ꦢꦫ/ꦤꦩꦢꦺꦮꦶꦒꦤ꧀ꦢꦫꦶꦥꦤ꧀ꦝꦤ꧀ꦠꦸꦏ꧀ꦏꦸꦤ꧀ꦠꦶ/ꦠꦸꦮꦶꦫꦤ꧀ꦢꦺꦮꦶꦥꦽꦠ//
꧇꧓꧐꧇꧉ꦢꦸꦏ꧀ꦲꦶꦁꦔꦸꦤꦶꦮꦲꦸꦢꦺꦮꦶꦏꦸꦤ꧀ꦠꦶ/ꦥꦶꦤꦺꦠ꧀ꦥꦸꦠꦿꦢꦺꦱꦿꦶꦏꦸꦤ꧀ꦠꦶꦧꦺꦴꦗ/ꦢꦺꦱꦸꦢꦂꦩꦤ꧀ꦠꦪꦼꦏ꧀ꦠꦶꦤꦺ/ꦥꦿꦧꦸꦱꦸꦫꦗꦼꦗꦸꦭꦸꦏ꧀/ꦲꦶꦁꦪꦢꦮꦪꦠꦮꦶꦤꦂꦤꦶ/ꦢꦺꦮꦶꦏꦸꦤ꧀ꦠꦶꦫꦶꦏꦭ/ꦩꦏ꧀ꦱꦶꦃꦏꦼꦚꦤꦶꦥꦸꦤ꧀/ꦠꦶꦤꦸꦫꦸꦤꦤ꧀ꦲꦶꦁꦲꦾꦁꦱꦸꦂꦪ/ꦠꦼꦩꦃꦮꦮꦿꦠ꧀ꦲꦩ꧀ꦧꦧꦂꦗꦭꦸꦱꦮꦶꦗꦶ/ꦱꦶꦤꦸꦔꦤ꧀ꦲꦫꦤ꧀ꦏꦂꦤ//
꧇꧓꧑꧇꧉ꦠꦸꦮꦶꦱꦸꦂꦪꦥꦸꦠꦿꦏꦁꦮꦼꦮꦔꦶ/ꦭꦲꦶꦫꦶꦫꦮꦸꦱ꧀ꦔꦿꦱꦸꦏ꧀ꦏꦮꦕ/ꦏꦁꦠꦤ꧀ꦠꦩꦺꦁꦒꦼꦒꦩꦤꦺ/ꦩꦾꦁꦲꦤ꧀ꦠꦶꦁꦲꦤ꧀ꦠꦶꦁꦠꦠꦸꦂ/ꦱꦏꦶꦁꦫꦩꦲꦾꦁꦱꦸꦂꦪꦱꦩꦶ/ꦢꦺꦮꦶꦏꦸꦤ꧀ꦠꦶꦢꦾꦤ꧀ꦔꦒ꧀ꦚ/ꦩꦺꦠ꧀ꦏꦤ꧀ꦝꦒꦤꦶꦥꦸꦤ꧀/ꦧꦪꦶꦥꦶꦤꦿꦶꦃꦲꦔ꧀ꦊꦧꦼꦠ꧀ꦤ/ꦲꦶꦁꦏꦤ꧀ꦝꦒꦭꦶꦤꦧꦸꦃꦲꦶꦁꦄꦱ꧀ꦮꦤꦢꦶ/ꦏꦺꦤ꧀ꦠꦶꦂꦲꦸꦩꦿꦥ꧀ꦠꦺꦁꦒꦺꦴꦁꦒ//
꧇꧓꧒꧇꧉ꦏꦺꦴꦁꦱꦶꦠꦼꦏꦺꦁꦗꦗꦲꦤꦶꦁꦤꦒꦿꦶ/ꦲꦺꦴꦁꦒꦢꦠꦤ꧀ꦠꦼꦧꦶꦃꦥꦽꦤꦲꦶꦫ/ꦱꦶꦁꦱꦮꦔꦤ꧀ꦱꦩꦸꦢꦿꦤꦺ/ꦥꦿꦗꦲꦶꦁꦲꦺꦴꦁꦒꦮꦲꦸ/ꦢꦸꦏ꧀ꦱꦩꦤꦮꦶꦤꦼꦁꦏ꧀ꦮꦺꦁꦲꦗꦶ/ꦗꦼꦗꦸꦭꦸꦏ꧀ꦄꦢꦶꦫꦠ/ꦥꦮꦺꦴꦁꦩꦶꦠꦿꦤꦶꦥꦸꦤ꧀/ꦮꦲꦸꦫꦶꦱꦁꦢꦽꦠꦫꦱ꧀ꦛꦿ/ꦏꦤ꧀ꦝꦒꦺꦏꦸꦲꦤꦸꦭꦾꦱꦶꦤꦫꦃꦢꦺꦤꦶꦁ/ꦒꦂꦮꦺꦁꦱꦁꦄꦢꦶꦫꦠ//
꧇꧓꧓꧇꧉ꦢꦺꦮꦶꦫꦝꦲꦶꦁꦏꦁꦲꦮꦼꦮꦔꦶ/ꦝꦱꦂꦱꦶꦫꦢꦺꦫꦺꦁꦲꦮꦮꦼꦏ/ꦩꦂꦩꦱꦁꦥꦿꦩꦺꦱ꧀ꦮꦫꦶꦤꦺ/ꦢꦲꦠ꧀ꦠꦸꦱ꧀ꦛꦲꦶꦁꦏꦭ꧀ꦧꦸ/ꦢꦺꦤ꧀ꦚꦩꦁꦒꦶꦃꦫꦫꦺꦱꦮꦶꦗꦶ/ꦤꦸꦭꦾꦲꦶꦔꦁꦏꦃꦥꦸꦠꦿ/ꦲꦶꦁꦥꦔꦽꦁꦏꦸꦲꦶꦥꦸꦤ꧀/ꦢꦺꦤꦶꦫꦲꦔꦸꦥꦢꦿꦮ/ꦱꦏ꧀ꦱꦠ꧀ꦏꦢꦶꦠꦤꦪꦤꦶꦫꦥꦿꦶꦧꦢꦶ/ꦩꦂꦩꦮꦲꦸꦱꦁꦏꦂꦤ//
꧇꧓꧔꧇꧉ꦥꦼꦥꦫꦧ꧀ꦫꦝꦺꦪꦥꦿꦢꦶꦏꦤꦶꦁ/ꦥꦸꦠꦿꦺꦁꦫꦝꦤꦼꦁꦤꦏꦁꦮꦶꦤꦂꦤ/ꦱꦿꦶꦥꦤ꧀ꦝꦸꦩꦺꦠ꧀ꦒꦂꦮꦩꦭꦺꦃ/ꦢꦺꦮꦶꦩꦢꦿꦶꦫꦤꦶꦥꦸꦤ꧀/ꦏꦢꦔꦶꦫꦱꦭꦾꦤꦽꦥꦠꦶ/ꦫꦠꦸꦥꦿꦗꦺꦁꦩꦢꦿꦏ/ꦢꦺꦮꦶꦢꦸꦫꦮꦲꦸ/ꦏꦿꦩꦧꦺꦴꦁꦱꦭꦶꦠ꧀ꦏꦺꦮꦭ/ꦏꦺꦴꦕꦥ꧀ꦏꦿꦠꦺꦴꦤꦶꦫꦥꦤ꧀ꦝꦸꦤꦫꦥꦠꦶ/ꦥꦿꦱꦶꦢꦲꦶꦁꦫꦲꦂꦗ꧀//
꧇꧓꧕꧇꧉ꦏꦶꦤꦺꦫꦶꦔꦤ꧀ꦩꦾꦁꦥꦶꦤꦸꦤ꧀ꦝꦶꦥꦸꦤ꧀ꦝꦶ/ꦢꦺꦱꦱꦩꦺꦁꦫꦠꦸꦩꦺꦴꦤꦚ꧀ꦥꦿꦗ/ꦤꦸꦗ꧀ꦮꦺꦁꦱꦗꦸꦒꦲꦫꦶꦤꦺ/ꦱꦿꦶꦤꦫꦤꦠꦥꦤ꧀ꦝꦸ/ꦲꦩ꧀ꦧꦼꦧꦼꦝꦒ꧀ꦝꦠꦼꦁꦮꦤꦢꦿꦶ/ꦲꦩꦿꦁꦒꦸꦲꦶꦲꦫꦶꦤ/ꦲꦺꦱ꧀ꦠꦿꦶꦭꦮꦤ꧀ꦗꦭꦸ/ꦭꦒꦾꦊꦭꦏꦺꦤ꧀ꦱꦏ꧀ꦱꦤ/ꦲꦶꦁꦏꦁꦗꦭꦸꦕꦶꦤꦸꦥꦤ꧀ꦮꦫꦱ꧀ꦠꦿꦏꦼꦤꦶ/ꦥꦸꦂꦤꦗꦠꦶꦧꦿꦃꦩꦤ//
꧇꧓꧖꧇꧉ꦔꦸꦥꦠꦤꦶꦩꦿꦶꦁꦥꦤ꧀ꦝꦸꦤꦽꦥꦠꦶ/ꦠꦼꦩ꧀ꦧꦺꦭꦭꦶꦱꦶꦫꦲꦶꦁꦤꦭꦶꦏ/ꦱꦉꦱ꧀ꦩꦶꦭꦤ꧀ꦮꦤꦺꦴꦢꦾꦤꦺ/ꦱꦿꦸꦤꦭꦺꦴꦁꦱꦱꦿꦶꦥꦤ꧀ꦝꦸ/ꦢꦺꦤ꧀ꦚꦱꦩ꧀ꦥꦸꦤ꧀ꦲꦔ꧀ꦭꦏ꧀ꦱꦤꦤꦶ/ꦢꦺꦴꦱꦒꦼꦁꦲꦗꦭꦫꦤ꧀/ꦩꦝꦼꦩ꧀ꦧꦿꦃꦩꦤꦺꦏꦸ/ꦩꦂꦩꦲꦱꦺꦭꦺꦃꦏꦥꦿꦧ꧀ꦮꦤ꧀/ꦩꦿꦶꦁꦏꦁꦫꦏꦢꦾꦤ꧀ꦩꦺꦤ꧀ꦠꦂꦭꦤ꧀ꦒꦂꦮꦏꦭꦶꦃ/ꦩꦔꦸꦤ꧀ꦠꦥꦩꦿꦶꦁꦮꦤ//
꧇꧓꧗꧇꧉ꦲꦸꦩꦸꦁꦒꦸꦃꦲꦶꦁꦱꦠꦱꦽꦁꦒꦮꦸꦏꦶꦂ/ꦢꦺꦤꦺꦮꦲꦸꦠꦼꦩ꧀ꦧꦸꦁꦱꦠꦱꦽꦁꦒ/ꦥꦼꦥꦸꦕꦸꦏ꧀ꦱꦠꦸꦱ꧀ꦠꦼꦒꦼꦱꦺ/ꦠꦤ꧀ꦭꦩꦤ꧀ꦠꦫꦤꦶꦥꦸꦤ꧀/ꦭꦲꦶꦫꦶꦫꦥꦤ꧀ꦝꦮꦱꦩꦶ/ꦥꦿꦢꦶꦏꦤꦶꦁꦥꦤ꧀ꦝꦮ/ꦥꦸꦠꦿꦤꦶꦥꦸꦤ꧀ꦥꦤ꧀ꦝꦸ/ꦢꦺꦤꦺꦠꦱꦠꦸꦲꦸꦤꦶꦫ/ꦢꦺꦮꦒꦁꦱꦭ꧀ꦲꦶꦁꦏꦁꦱꦩꦾꦲꦱꦼꦱꦶꦮꦶ/ꦱꦫꦤꦩꦺꦴꦤ꧀ꦠꦿꦗꦸꦒ//
꧇꧒꧇꧉ꦱꦶꦤꦺꦴꦩ꧀
꧇꧑꧇꧉ꦏꦁꦢꦂꦧꦺꦩꦺꦴꦤ꧀ꦠꦿꦥꦸꦤꦶꦏ/ꦢꦺꦮꦶꦏꦸꦤ꧀ꦠꦶꦲꦤ꧀ꦠꦸꦏ꧀ꦱꦏꦶꦁ/ꦧꦛꦫꦱꦸꦂꦪꦲꦶꦁꦏꦸꦤ/ꦏꦭꦸꦮꦶꦲꦤꦶꦫꦧꦶꦭꦶꦃ/ꦮꦶꦤꦠꦼꦏ꧀ꦲꦶꦏꦸꦧꦁꦏꦶꦠ꧀/ꦲꦤ꧀ꦝꦠꦼꦁꦏꦼꦤ꧀ꦢꦺꦮꦤꦶꦥꦸꦤ꧀/ꦱꦝꦺꦔꦃꦏꦁꦕꦶꦤꦶꦥ꧀ꦠ/ꦲꦶꦁꦒꦶꦃꦭꦭꦸꦲꦤꦸꦫꦸꦤꦶ/ꦢꦢꦾꦱꦁꦲꦾꦁꦢꦂꦩꦲꦶꦁꦏꦁꦲꦥꦼꦥꦸꦠꦿ//
꧇꧒꧇꧉ꦥꦩ꧀ꦧꦪꦸꦤ꧀ꦫꦤ꧀ꦪꦸꦝꦶꦱ꧀ꦛꦶꦫ/ꦠꦼꦒꦼꦱꦺꦩꦤ꧀ꦠꦼꦥ꧀ꦲꦶꦁꦗꦸꦫꦶꦠ꧀/ꦥꦁꦒꦸꦭꦸꦤꦶꦫꦫꦤ꧀ꦧꦶꦩ/ꦠꦼꦒꦼꦱꦺꦲꦁꦒꦼꦒꦶꦫꦶꦱꦶ/ꦲꦶꦁꦒꦶꦃꦲꦸꦒꦶꦲꦤꦩꦶ/ꦧꦶꦩꦱꦺꦤꦠꦼꦒꦼꦱꦶꦥꦸꦤ꧀/ꦲꦧꦭꦮꦺꦃꦏꦠꦽꦱꦤ꧀/ꦠꦸꦮꦶꦤ꧀ꦮꦽꦏꦺꦴꦢꦫꦤꦩꦶ/ꦥꦿꦢꦶꦏꦤꦺꦲꦸꦢꦫꦤꦶꦁꦱꦺꦴꦤꦲꦗꦒ꧀//
꧇꧓꧇꧉ꦏꦤꦁꦮꦮꦼꦏꦱꦁꦧꦶꦩ/ꦧꦛꦫꦮꦪꦸꦏꦁꦢꦢꦶ/ꦢꦺꦮꦢꦺꦮꦤꦶꦁꦩꦫꦸꦠ/ꦥꦤꦼꦔꦲꦶꦫꦮꦼꦮꦔꦶ/ꦄꦂꦗ꧀ꦸꦤꦲꦶꦁꦒꦶꦃꦲꦸꦒꦶ/ꦥꦂꦠꦥꦤꦼꦔꦼꦫꦤꦶꦥꦸꦤ꧀/ꦏꦧꦼꦏ꧀ꦠꦱꦏꦶꦁꦫꦺꦤ/ꦢꦺꦮꦶꦥꦽꦠꦭꦮꦤ꧀ꦩꦭꦶꦃ/ꦱꦁꦄꦂꦗ꧀ꦸꦤꦲꦗꦼꦗꦸꦭꦸꦏ꧀ꦢꦤꦚ꧀ꦗꦪ//
꧇꧔꧇꧉ꦥꦿꦢꦶꦏꦤꦺꦢꦤꦚ꧀ꦗꦪ/ꦏꦁꦫꦸꦩꦼꦧꦸꦠ꧀ꦫꦗꦥꦺꦤꦶ/ꦠꦸꦮꦶꦤ꧀ꦏꦶꦫꦶꦛꦶꦲꦤꦩ/ꦲꦩꦏꦸꦛꦥꦿꦢꦶꦏꦤꦶꦁ/ꦄꦂꦗ꧀ꦸꦤꦏꦁꦱꦼꦱꦶꦮꦶ/ꦲꦾꦁꦆꦤ꧀ꦢꦿꦲꦶꦁꦏꦁꦱꦶꦤꦼꦧꦸꦠ꧀/ꦫꦠꦸꦤꦶꦁꦥꦫꦢꦺꦮ/ꦮꦲꦸꦫꦶꦱꦁꦢꦺꦮꦶꦩꦢꦿꦶ/ꦤꦩ꧀ꦧꦸꦠ꧀ꦩꦺꦴꦤ꧀ꦠꦿꦱꦏꦶꦁꦢꦺꦮꦶꦏꦸꦤ꧀ꦠꦶꦤꦸꦭꦾ//
꧇꧕꧇꧉ꦮꦮꦿꦠ꧀ꦲꦮꦮꦼꦏꦏꦼꦩ꧀ꦧꦂ/ꦱꦩꦶꦗꦭꦸꦢꦺꦤ꧀ꦮꦱ꧀ꦠꦤꦶ/ꦤꦏꦸꦭꦭꦤ꧀ꦱꦲꦢꦺꦮ/ꦥꦸꦠꦿꦤꦺꦢꦺꦮꦏꦼꦏꦭꦶꦃ/ꦱꦩꦶꦲꦤꦩꦄꦱ꧀ꦮꦶ/ꦏꦭꦶꦲꦶꦫꦢꦢꦾꦝꦸꦏꦸꦤ꧀/ꦮꦺꦴꦤ꧀ꦠꦼꦤ꧀ꦲꦶꦁꦱꦸꦫꦭꦪ/ꦱꦩꦤꦢꦺꦮꦶꦒꦤ꧀ꦢꦫꦶ/ꦲꦶꦁꦔꦱ꧀ꦠꦶꦤꦲꦩ꧀ꦧꦧꦂꦢꦒꦶꦁꦠꦸꦒꦼꦭꦤ꧀//
꧇꧖꧇꧉ꦲꦠꦺꦴꦱꦶꦫꦏꦢꦶꦱꦺꦭ/ꦱꦏ꧀ꦱꦤꦱꦁꦮꦾꦱꦉꦱꦶ/ꦲꦶꦔꦸꦤ꧀ꦢꦁꦩꦾꦁꦥꦶꦤꦶꦤ꧀ꦠꦤꦤ꧀/ꦥꦶꦠꦸꦭꦸꦁꦲꦤꦸꦭꦾꦥꦿꦥ꧀ꦠꦶ/ꦱꦶꦁꦥꦶꦠꦸꦢꦸꦃꦱꦁꦉꦱꦶ/ꦔ꧀ꦭꦺꦮꦃꦢꦒꦶꦔꦶꦥꦸꦤ꧀ꦮꦲꦸ/ꦲꦸꦩꦶꦗꦶꦭ꧀ꦫꦫꦺꦥꦿꦶꦪ/ꦢꦸꦂꦪꦺꦴꦢꦤꦢꦺꦤ꧀ꦮꦱ꧀ꦠꦤꦶ/ꦥꦿꦢꦶꦏꦤꦺꦥꦸꦤꦶꦏꦥꦿꦗꦸꦫꦶꦠ꧀ꦲꦭ//
꧇꧗꧇꧉ꦲꦶꦁꦒꦶꦃꦤꦩꦱꦸꦪꦺꦴꦢꦤ/ꦠꦼꦒꦼꦱꦺꦥꦿꦗꦸꦫꦶꦠ꧀ꦧꦼꦕꦶꦏ꧀/ꦭꦲꦶꦫꦶꦫꦭꦤ꧀ꦱꦁꦧꦶꦩ/ꦥꦼꦥꦉꦔꦤ꧀ꦲꦶꦁꦱꦴꦫꦶ/ꦫꦶꦮꦸꦱꦶꦫꦲꦤꦸꦭꦶ/ꦮꦺꦴꦤ꧀ꦠꦼꦤ꧀ꦩꦭꦶꦃꦲꦶꦁꦏꦁꦩꦼꦠꦸ/ꦫꦫꦺꦫꦤ꧀ꦢꦸꦱꦱꦤ/ꦮꦔ꧀ꦮꦁꦢꦸꦭꦸꦂꦩꦶꦗꦶꦭ꧀ꦩꦭꦶꦃ/ꦒꦤ꧀ꦠꦾꦒꦤ꧀ꦠꦾꦏꦺꦴꦁꦱꦶꦱꦠꦸꦱ꧀ꦲꦺꦠꦸꦔꦶꦫ//
꧇꧘꧇꧉ꦩꦂꦩꦫꦤ꧀ꦱꦠꦏꦺꦴꦫꦮ/ꦢꦺꦤꦺꦭꦲꦶꦫꦶꦫꦱꦩꦶ/ꦱꦉꦤ꧀ꦠꦶꦗꦿꦺꦴꦤꦶꦁꦱꦕꦺꦴꦤ꧀ꦢꦿ/ꦲꦮꦤꦺꦃꦱꦏꦶꦁꦥꦸꦤꦶꦏꦶ/ꦱꦁꦢꦽꦠꦫꦱ꧀ꦛꦿꦄꦗꦶ/ꦲꦢꦂꦧꦺꦲꦠ꧀ꦩꦗꦏꦏꦸꦁ/ꦩꦶꦪꦺꦴꦱ꧀ꦱꦏꦶꦁꦲꦩ꧀ꦥꦺꦪꦤ꧀/ꦪꦸꦪꦸꦠ꧀ꦱꦸꦢꦶꦥꦸꦤ꧀ꦤꦩꦤꦶ/ꦲꦠꦤꦥꦶꦥꦸꦠꦿꦮꦤꦺꦴꦢꦾꦱꦗꦸꦒ//
꧇꧙꧇꧉ꦲꦤꦩꦢꦺꦮꦶꦢꦸꦱꦭ/ꦥꦸꦠꦿꦱꦢꦪꦮꦶꦤꦂꦤꦶ/ꦱꦩꦶꦠꦶꦠꦶꦱꦶꦁꦫꦏ꧀ꦱꦱ/ꦏꦸꦤꦼꦁꦮꦸꦱ꧀ꦚꦤ꧀ꦠꦫꦭꦩꦶ/ꦲꦸꦥꦠꦤꦶꦫꦔꦸꦤꦶ/ꦫꦶꦱꦁꦧꦿꦃꦩꦤꦏꦠꦸꦲꦸꦤ꧀/ꦤꦺꦁꦥꦤ꧀ꦝꦸꦱꦺꦢꦤꦶꦫ/ꦢꦸꦥꦶꦔꦪꦸꦃꦢꦺꦮꦶꦩꦢꦿꦶ/ꦢꦺꦱꦁꦉꦠ꧀ꦤꦲꦧꦺꦭꦊꦧꦸꦠꦸꦩꦔꦤ꧀//
꧇꧑꧐꧇꧉ꦥꦉꦁꦭꦤ꧀ꦏꦸꦤꦂꦥꦺꦁꦫꦏ/ꦢꦺꦮꦶꦏꦸꦤ꧀ꦠꦶꦢꦾꦤ꧀ꦲꦸꦩꦸꦭꦶꦃ/ꦝꦸꦩꦠꦼꦁꦔꦱ꧀ꦠꦶꦤꦥꦸꦫ/ꦥꦤ꧀ꦝꦮꦒꦁꦱꦭ꧀ꦲꦸꦩꦶꦫꦶꦁ/ꦢꦸꦥꦶꦥꦿꦥ꧀ꦠꦺꦁꦤꦒꦫꦶ/ꦮꦺꦴꦤ꧀ꦠꦼꦤ꧀ꦲꦶꦁꦏꦁꦠꦤ꧀ꦲꦁꦒꦸꦒꦸ/ꦪꦺꦤ꧀ꦥꦸꦠꦿꦺꦁꦥꦤ꧀ꦝꦸꦩꦂꦒ/ꦏꦶꦤꦶꦫꦮꦸꦱ꧀ꦭꦩꦭꦭꦶꦱ꧀/ꦱꦸꦥꦿꦤ꧀ꦢꦺꦤꦺꦥꦶꦤꦸꦥꦸꦩꦿꦶꦁꦢꦽꦠꦫꦱ꧀ꦛꦿ//
꧇꧑꧑꧇꧉ꦥꦶꦤꦱꦿꦲꦏꦼꦤ꧀ꦩꦿꦶꦁꦧꦶꦱ꧀ꦩ/ꦥꦶꦤꦿꦶꦃꦲꦔꦼꦩꦺꦴꦔꦱꦩꦶ/ꦭꦤ꧀ꦥꦸꦠꦿꦢꦊꦩ꧀ꦥꦿꦶꦪꦺꦴꦁꦒ/ꦪꦠꦠꦤ꧀ꦲꦤ꧀ꦠꦫꦭꦩꦶ/ꦱꦠꦾꦮꦠꦶꦮꦶꦤꦁꦱꦶꦠ꧀/ꦢꦺꦉꦱꦶꦮꦾꦱꦏꦁꦱꦸꦤꦸ/ꦲꦠꦸꦫꦶꦫꦲꦶꦁꦫꦺꦤ/ꦲꦶꦁꦠꦼꦩ꧀ꦧꦺꦮꦺꦴꦤ꧀ꦠꦼꦤ꧀ꦧꦶꦭꦲꦶ/ꦲꦒꦼꦁꦲꦤ꧀ꦝꦠꦼꦔꦶꦥꦿꦗꦲꦶꦁꦄꦱ꧀ꦠꦶꦤ//
꧇꧑꧒꧇꧉ꦏꦁꦢꦢꦶꦮꦼꦮꦶꦤꦶꦲꦶꦫ/ꦲꦶꦁꦧꦼꦧꦪꦱꦶꦁꦥꦿꦢꦺꦴꦤ꧀ꦢꦶ/ꦥꦤ꧀ꦝꦮꦭꦮꦤ꧀ꦏꦺꦴꦫꦮ/ꦩꦂꦩꦢꦺꦮꦶꦱꦠꦾꦮꦠꦶ/ꦱꦏ꧀ꦱꦤꦠꦶꦭꦂꦥꦸꦫꦶ/ꦢꦶꦤꦸꦭꦸꦂꦲꦶꦁꦥꦸꦠꦿꦩꦤ꧀ꦠꦸ/ꦢꦺꦮꦶꦄꦩ꧀ꦧꦶꦏꦩꦶꦮꦃ/ꦎꦩ꧀ꦧꦭꦶꦏꦢꦠꦤ꧀ꦏꦫꦶ/ꦲꦺꦤ꧀ꦠꦫꦶꦫꦲꦂꦱꦩꦔꦸꦤ꧀ꦠꦥꦺꦁꦮꦤ//
꧇꧑꧓꧇꧉ꦢꦫꦥꦺꦴꦤ꧀ꦪ꧀ꦮꦩꦼꦤꦔꦤ/ꦏꦫꦸꦱꦏꦤꦶꦁꦤꦒꦫꦶ/ꦢꦸꦏ꧀ꦮꦸꦱ꧀ꦭꦩꦥꦸꦠꦿꦶꦠꦶꦒ/ꦩꦸꦫꦸꦢ꧀ꦩꦿꦶꦁꦏꦱꦶꦢꦤ꧀ꦱꦩꦶ/ꦉꦱꦶꦧꦶꦱ꧀ꦩꦮꦶꦤꦂꦤꦶ/ꦱꦸꦁꦒꦸꦫꦸꦏꦼꦏꦭꦶꦃꦱꦩ꧀ꦥꦸꦤ꧀/ꦩꦫꦁꦩꦺꦴꦩꦺꦴꦔꦤꦶꦫ/ꦥꦤ꧀ꦝꦮꦊꦭꦶꦩꦠꦸꦮꦶꦤ꧀/ꦩꦿꦶꦁꦏꦺꦴꦫꦮꦢꦺꦱꦺꦴꦒꦠꦤꦶꦫꦩꦔꦿꦤ꧀//
꧇꧑꧔꧇꧉ꦥꦤ꧀ꦝꦶꦠꦢꦿꦺꦴꦤꦏꦭꦮꦤ꧀/ꦏꦽꦥꦥꦿꦱꦩꦶꦥꦶꦤꦸꦫꦶꦃ/ꦲꦩꦸꦭꦁꦥꦔꦸꦭꦃꦪꦺꦴꦢ/ꦢꦺꦢꦿꦺꦴꦤꦲꦶꦁꦏꦁꦱꦼꦱꦶꦮꦶ/ꦱꦁꦧꦫꦠ꧀ꦮꦗꦉꦱꦶ/ꦭꦲꦶꦫꦶꦫꦱꦏꦶꦁꦲꦼꦗꦸꦤ꧀/ꦗꦸꦤ꧀ꦲꦶꦁꦧꦱꦱꦁꦏꦽꦠ/ꦢꦿꦺꦴꦤꦲꦫꦤꦺꦭꦤ꧀ꦩꦭꦶꦃ/ꦲꦼꦗꦸꦤ꧀ꦲꦶꦁꦒꦶꦃꦲꦸꦒꦶꦮꦶꦤꦱ꧀ꦠꦤꦤ꧀ꦏꦸꦩ꧀ꦧ//
꧇꧑꧕꧇꧉ꦩꦂꦩꦤꦩꦭꦶꦃꦮꦱ꧀ꦠꦤ꧀ꦠ/ꦏꦸꦩ꧀ꦧꦪꦺꦴꦤꦶꦲꦮꦶꦠ꧀ꦱꦏꦶꦁ/ꦪꦺꦴꦤꦶꦲꦸꦮꦼꦭ꧀ꦠꦼꦒꦼꦱꦶꦫ/ꦢꦢꦾꦲꦫꦤ꧀ꦏꦸꦩ꧀ꦧꦪꦺꦴꦤꦶ/ꦥꦿꦢꦶꦏꦤꦶꦫꦭꦲꦶꦂ/ꦱꦏꦶꦁꦗꦸꦤ꧀ꦪꦠꦮꦶꦤꦸꦮꦸꦱ꧀/ꦢꦸꦏ꧀ꦢꦿꦺꦴꦤꦩꦏ꧀ꦱꦶꦃꦠꦿꦸꦤ/ꦲꦢꦂꦧꦺꦩꦶꦠꦿꦱꦮꦶꦗꦶ/ꦫꦤ꧀ꦢꦿꦸꦥꦢꦪꦺꦏꦸꦲꦠꦸꦁꦒꦭ꧀ꦱꦺꦴꦒꦠ//
꧇꧑꧖꧇꧉ꦫꦶꦏꦭꦤꦺꦥꦸꦫꦠ/ꦝꦠꦼꦁꦧꦫꦝꦗꦉꦱꦶ/ꦫꦶꦮꦸꦱ꧀ꦚꦲꦤ꧀ꦠꦫꦭꦩ/ꦢꦿꦸꦥꦢꦗꦸꦩꦼꦤꦼꦁꦲꦗꦶ/ꦲꦶꦁꦥꦤꦚ꧀ꦭꦤꦒꦫꦶ/ꦉꦱꦶꦢꦿꦺꦴꦤꦏꦸꦩꦕꦺꦭꦸ/ꦥꦁꦒꦶꦃꦭꦤ꧀ꦩꦶꦠꦿꦭꦩ/ꦢꦸꦥꦶꦠꦸꦩꦩꦲꦶꦁꦲꦠꦶ/ꦱꦿꦶꦢꦿꦸꦥꦢꦲꦩꦶꦠꦩ꧀ꦧꦸꦲꦶꦏꦺꦮꦭ//
꧇꧑꧗꧇꧉ꦩꦭꦂꦠꦶꦤꦸꦤ꧀ꦝꦸꦁꦱꦶꦤꦶꦪ/ꦢꦿꦺꦴꦤꦠꦤ꧀ꦏꦼꦤꦮꦶꦤꦂꦤꦶ/ꦫꦸꦤ꧀ꦠꦶꦏꦶꦫꦲꦶꦁꦗꦿꦺꦴꦤꦭ/ꦢꦾꦤ꧀ꦩꦺꦤ꧀ꦠꦂꦲꦚ꧀ꦗꦸꦗꦸꦒ꧀ꦩꦫꦶꦁ/ꦔꦱ꧀ꦠꦶꦤꦥꦸꦫꦲꦩꦿꦶꦃ/ꦩꦂꦒꦶꦤꦶꦁꦥꦩꦊꦱꦶꦥꦸꦤ꧀/ꦏꦕꦫꦶꦠꦱꦁꦢꦿꦺꦴꦤ/ꦏꦿꦩꦲꦤ꧀ꦠꦸꦏ꧀ꦢꦺꦮꦶꦏꦽꦥꦶ/ꦥꦽꦤꦃꦏꦢꦔꦶꦫꦮꦲꦸꦉꦱꦶꦏꦽꦥ//
꧇꧑꧘꧇꧉ꦏꦽꦥꦠꦼꦒꦼꦱꦶꦫꦮꦼꦭꦱ꧀/ꦩꦂꦩꦫꦤ꧀ꦩꦁꦏꦤꦲꦮꦶꦠ꧀/ꦢꦸꦏ꧀ꦏꦽꦥꦶꦏꦭꦮꦤ꧀ꦏꦽꦥ/ꦏꦭꦶꦲꦶꦫꦩꦏ꧀ꦱꦶꦃꦲꦭꦶꦠ꧀/ꦥꦶꦤꦁꦒꦶꦃꦤꦺꦁꦮꦤꦢꦿꦶ/ꦢꦺꦤꦶꦁꦤꦫꦺꦤ꧀ꦢꦿꦱꦤ꧀ꦠꦤꦸ/ꦲꦶꦁꦤꦒꦫꦶꦔꦱ꧀ꦠꦶꦤ/ꦲꦤꦸꦭꦾꦥꦶꦤꦸꦥꦸꦱꦩꦶ/ꦲꦮꦶꦠ꧀ꦱꦏꦶꦁꦏꦩꦶꦮꦼꦭꦱꦼꦤ꧀ꦲꦶꦁꦢꦿꦶꦪ//
꧇꧑꧙꧇꧉ꦪꦼꦏ꧀ꦠꦶꦤꦶꦫꦏꦁꦥꦼꦥꦸꦠꦿ/ꦱꦫꦢ꧀ꦮꦠ꧀ꦭꦮꦤ꧀ꦲꦥ꧀ꦱꦫꦶ/ꦗꦤꦥꦢꦶꦮꦱ꧀ꦠꦤꦶꦫ/ꦉꦱꦶꦏꦽꦥꦮꦲꦸꦲꦶꦁꦒꦶꦃ/ꦏꦥꦽꦤꦃꦮꦺꦴꦁꦱꦏꦭꦶꦃ/ꦢꦿꦸꦥꦢꦱꦿꦶꦤꦫꦥꦿꦧꦸ/ꦲꦶꦁꦤꦒꦫꦶꦥꦤꦚ꧀ꦭ/ꦪꦠꦏꦁꦮꦶꦤꦸꦮꦸꦱ꧀ꦩꦭꦶꦃ/ꦥꦤ꧀ꦝꦮꦭꦤ꧀ꦏꦺꦴꦫꦮꦢꦸꦏ꧀ꦮꦸꦱ꧀ꦏꦽꦠꦂꦠ//
꧇꧒꧐꧇꧉ꦩꦿꦶꦁꦱꦭꦶꦫꦶꦁꦏꦮꦿꦸꦃꦤꦸꦭꦾ/ꦱꦁꦢꦽꦠꦫꦱ꧀ꦛꦿꦤꦽꦥꦠꦶ/ꦔꦢꦼꦒꦏꦼꦤ꧀ꦒꦸꦁꦏꦱꦸꦏꦤ꧀/ꦏꦂꦱꦤꦶꦫꦱꦿꦶꦧꦸꦥꦠꦶ/ꦩꦶꦤ꧀ꦠꦺꦴꦤ꧀ꦏꦼꦤ꧀ꦒꦸꦤꦠꦸꦮꦶꦤ꧀/ꦱꦏ꧀ꦠꦶꦤꦺꦥꦸꦠꦿꦱꦢꦫꦸꦩ꧀/ꦱꦏꦺꦲꦶꦁꦥꦫꦤꦠ/ꦱꦶꦤꦸꦫꦸꦲꦤ꧀ꦏꦁꦱꦸꦥꦢꦶ/ꦱꦩꦶꦔꦢꦼꦒꦤꦥꦿꦁꦠꦤ꧀ꦝꦶꦁꦱꦢꦪ//
꧇꧒꧑꧇꧉ꦲꦶꦁꦏꦁꦠꦸꦩꦸꦠꦸꦂꦱꦺꦮꦏ/ꦏꦂꦤꦥꦸꦠꦿꦺꦁꦢꦺꦮꦶꦏꦸꦤ꧀ꦠꦶ/ꦢꦸꦥꦶꦔꦗꦏ꧀ꦥꦿꦁꦄꦂꦗ꧀ꦸꦤ/ꦏꦂꦱꦤ꧀ꦠꦠꦤ꧀ꦢꦺꦤ꧀ꦠꦸꦫꦸꦠꦶ/ꦩꦂꦩꦩꦁꦏꦤꦢꦺꦤꦶꦁ/ꦏꦂꦤꦢꦺꦢꦺꦠꦿꦲꦶꦁꦫꦠꦸ/ꦱꦁꦢꦸꦂꦪꦺꦴꦢꦤꦤꦼꦢꦾ/ꦲꦩ꧀ꦧꦤ꧀ꦠꦺꦴꦤꦶꦏꦂꦤꦤꦸꦭꦶ/ꦗꦶꦤꦼꦤꦼꦁꦏꦼꦤ꧀ꦤꦫꦺꦤ꧀ꦢꦿꦲꦶꦁꦤꦒꦿꦶꦲꦺꦴꦁꦒ//
꧇꧒꧒꧇꧉ꦥꦿꦥꦤ꧀ꦝꦮꦩꦏ꧀ꦱꦶꦃꦥꦁꦒꦃ/ꦢꦠꦤ꧀ꦲꦂꦱꦲꦥꦿꦁꦠꦤ꧀ꦝꦶꦁ/ꦭꦤ꧀ꦏꦂꦤꦠꦼꦩꦲꦤ꧀ꦧꦸꦧꦂ/ꦏꦺꦴꦁꦱꦶꦲꦧꦸꦱꦼꦏꦤ꧀ꦱꦩꦶ/ꦏꦮꦂꦤꦢꦿꦺꦴꦤꦉꦱꦶ/ꦲꦩꦶꦤ꧀ꦠꦥꦶꦠꦸꦭꦸꦔꦶꦥꦸꦤ꧀/ꦥꦤ꧀ꦝꦮꦩꦾꦁꦏꦺꦴꦫꦮ/ꦥꦶꦤꦿꦶꦃꦩꦶꦏꦸꦠ꧀ꦢꦿꦸꦥꦢꦱꦿꦶ/ꦩꦶꦤꦺꦴꦁꦏꦮꦼꦮꦊꦱꦶꦫꦢꦺꦤ꧀ꦚꦩꦸꦭꦁ//
꧇꧒꧓꧇꧉ꦱꦏ꧀ꦱꦤꦱꦠꦏꦺꦴꦫꦮ/ꦭꦸꦩꦸꦫꦸꦒ꧀ꦢꦿꦺꦴꦤꦏꦁꦔꦶꦫꦶꦢ꧀/ꦥꦿꦥ꧀ꦠꦺꦁꦗꦗꦲꦤꦶꦁꦥꦿꦗ/ꦥꦤꦚ꧀ꦭꦱꦩꦶꦏꦭꦶꦤ꧀ꦝꦶꦃ/ꦲꦶꦁꦥꦿꦁꦭꦤ꧀ꦮꦢꦾꦲꦗꦶ/ꦲꦤꦸꦭꦾꦱꦩꦶꦲꦸꦩꦸꦤ꧀ꦢꦸꦂ/ꦲꦔꦸꦁꦱꦶꦩꦿꦶꦁꦥꦤ꧀ꦝꦮ/ꦄꦂꦗ꧀ꦸꦤꦠꦤ꧀ꦢꦾꦔꦪꦺꦴꦤꦶ/ꦠꦤ꧀ꦲꦤ꧀ꦠꦫꦏꦥꦶꦏꦸꦠ꧀ꦥꦿꦧꦸꦢꦿꦸꦥꦢ//
꧇꧒꧔꧇꧉ꦲꦶꦔꦠꦸꦂꦏꦼꦤ꧀ꦩꦫꦶꦁꦢꦿꦺꦴꦤ/ꦱꦁꦲꦉꦱꦶꦲꦤ꧀ꦢꦂꦧꦺꦤꦶ/ꦥꦩꦸꦤ꧀ꦝꦸꦠ꧀ꦩꦿꦶꦁꦱꦿꦶꦢꦿꦸꦥꦢ/ꦲꦶꦁꦄꦲꦶꦕꦏꦿꦤꦒꦫꦶ/ꦧꦮꦃꦥꦤꦚ꧀ꦭꦤꦒꦿꦶ/ꦢꦢꦥꦤꦼꦧꦸꦱꦶꦥꦸꦤ꧀/ꦱꦫꦶꦫꦤꦺꦱꦁꦤꦠ/ꦢꦿꦸꦥꦢꦠꦤ꧀ꦤꦸꦮꦭꦤꦶ/ꦤꦸꦭꦾꦱꦶꦫꦲꦶꦔꦤ꧀ꦠꦸꦏ꧀ꦏꦼꦤ꧀ꦩꦿꦶꦁꦏꦿꦗꦤ꧀ꦠ//
꧇꧒꧕꧇꧉ꦱꦏꦺꦴꦤ꧀ꦢꦸꦫꦺꦱꦿꦶꦢꦿꦸꦥꦢ/ꦏꦩꦤ꧀ꦠꦾꦤ꧀ꦢꦺꦤ꧀ꦚꦲꦫꦸꦤ꧀ꦠꦶꦏ꧀/ꦝꦸꦩꦠꦼꦁꦱꦁꦉꦱꦶꦢꦿꦺꦴꦤ/ꦠꦤ꧀ꦱꦸꦫꦸꦢ꧀ꦫꦲꦺꦴꦱꦶꦁꦒꦭꦶꦃ/ꦭꦩꦸꦤ꧀ꦢꦺꦫꦺꦁꦲꦩꦁꦒꦶꦃ/ꦱꦫꦤꦮꦼꦮꦊꦱꦶꦥꦸꦤ꧀/ꦩꦂꦩꦱꦿꦸꦲꦩꦼꦩꦸꦗ/ꦲꦶꦁꦗꦮꦠꦏꦁꦱꦸꦥꦢꦶ/ꦮꦺꦴꦤ꧀ꦠꦼꦤꦱꦶꦲꦶꦫꦭꦸꦩꦸꦤ꧀ꦠꦸꦂꦩꦿꦶꦁꦤꦠ//
꧇꧒꧖꧇꧉ꦏꦠꦿꦶꦩꦥꦩꦶꦤ꧀ꦠꦤꦶꦫ/ꦱꦶꦁꦲꦒ꧀ꦤꦶꦥꦢꦸꦥꦤ꧀ꦩꦶꦗꦶꦭ꧀/ꦠꦤꦪꦗꦭꦸꦱꦗꦸꦒ/ꦮꦸꦱ꧀ꦒꦼꦁꦱꦏꦥꦿꦧꦺꦴꦤ꧀ꦗꦸꦫꦶꦠ꧀/ꦏꦥꦫꦶꦔꦤ꧀ꦮꦼꦮꦔꦶ/ꦢꦽꦱ꧀ꦛꦢꦾꦸꦩ꧀ꦤꦠꦼꦒꦼꦱꦶꦥꦸꦤ꧀/ꦢꦲꦠ꧀ꦏꦫꦺꦴꦱꦤꦶꦫ/ꦪꦺꦏꦸꦏꦁꦱꦩ꧀ꦥꦸꦤ꧀ꦥꦶꦤꦱ꧀ꦛꦶ/ꦲꦶꦁꦗꦮꦠꦲꦸꦩꦝꦼꦩ꧀ꦱꦁꦉꦱꦶꦢꦿꦺꦴꦤ//
꧇꧒꧗꧇꧉ꦧꦺꦚ꧀ꦗꦶꦁꦲꦶꦁꦥꦿꦁꦧꦿꦠꦪꦸꦢ/ꦤꦸꦭꦾꦮꦺꦴꦤ꧀ꦠꦼꦤ꧀ꦩꦭꦶꦃꦩꦶꦗꦶꦭ꧀/ꦥꦸꦠꦿꦮꦤꦺꦴꦢꦾꦱꦗꦸꦒ/ꦫꦤ꧀ꦢꦺꦮꦶꦏꦽꦱ꧀ꦤꦶꦲꦸꦠꦮꦶ/ꦮꦶꦤꦱ꧀ꦠꦤꦤ꧀ꦢꦿꦺꦴꦥꦢꦶ/ꦏꦮꦂꦤꦱꦁꦉꦠ꧀ꦤꦮꦲꦸ/ꦠꦶꦠꦶꦱꦶꦁꦥꦸꦠꦿꦤꦶꦫ/ꦲꦺꦱ꧀ꦠꦿꦶꦥꦤ꧀ꦝꦶꦠꦱꦮꦶꦗꦶ/ꦔꦸꦤꦶꦩꦔꦸꦤ꧀ꦠꦥꦩꦼꦩꦶꦤ꧀ꦠꦲꦶꦁꦢꦺꦮ//
꧇꧒꧘꧇꧉ꦩꦸꦒꦶꦱꦶꦤꦸꦔꦤꦭꦏꦾ/ꦲꦶꦁꦏꦁꦲꦸꦠꦩꦲꦶꦁꦧꦸꦢꦶ/ꦏꦠꦿꦶꦩꦥꦩꦶꦤ꧀ꦠꦤꦶꦫ/ꦔꦶꦁꦫꦺꦃꦤꦺꦥꦩꦶꦤ꧀ꦠꦏꦺꦴꦁꦱꦶ/ꦫꦩ꧀ꦧꦃꦥꦶꦁꦒꦁꦱꦭ꧀ꦩꦂꦩꦶ/ꦥꦚ꧀ꦗꦤ꧀ꦩꦤ꧀ꦠꦩꦭꦾꦺꦁꦧꦺꦱꦸꦏ꧀/ꦥꦶꦤꦱ꧀ꦛꦶꦭꦏꦶꦒꦁꦱꦭ꧀/ꦪꦠꦢꦿꦸꦥꦢꦤꦽꦥꦠꦶ/ꦲꦥꦼꦥꦸꦠꦿꦩꦭꦶꦃꦮꦤꦺꦴꦢꦾꦱꦗꦸꦒ//
꧇꧒꧙꧇꧉ꦱꦶꦏꦤ꧀ꦝꦶꦤꦶꦮꦱ꧀ꦠꦤꦶꦫ/ꦥꦸꦤꦶꦏꦲꦭꦶꦫꦺꦴꦤ꧀ꦥꦂꦗ꧀ꦶ/ꦏꦭꦮꦤ꧀ꦢꦶꦠꦾꦱꦗꦸꦒ/ꦱꦼꦠꦸꦤꦏꦂꦤꦏꦁꦤꦩꦶ/ꦢꦢꦾꦱꦶꦫꦱꦁꦢꦺꦮꦶ/ꦲꦩꦤꦚ꧀ꦭꦮꦂꦤꦗꦭꦸ/ꦤꦸꦭꦾꦲꦩꦭꦶꦃꦲꦫꦤ꧀/ꦱꦶꦏꦤ꧀ꦝꦶꦪꦺꦏꦸꦥꦶꦤꦱ꧀ꦛꦶ/ꦠꦼꦩ꧀ꦧꦺꦲꦶꦁꦏꦁꦲꦸꦩꦝꦼꦩ꧀ꦱꦁꦉꦱꦶꦧꦶꦱ꧀ꦩ//
꧇꧓꧐꧇꧉ꦒꦤ꧀ꦠꦾꦏꦺꦴꦕꦥꦥꦤ꧀ꦝꦮ/ꦏꦛꦃꦱꦺꦴꦭꦲꦶꦫꦱꦩꦶ/ꦩꦶꦤ꧀ꦠꦺꦴꦤ꧀ꦏꦼꦤ꧀ꦏꦥꦿꦮꦶꦫꦤ꧀ꦠ/ꦩꦶꦮꦃꦠꦤ꧀ꦏꦼꦤ꧀ꦝꦠ꧀ꦲꦏꦂꦢꦶ/ꦏꦢꦂꦩꦤ꧀ꦩꦿꦶꦁꦮꦺꦴꦁꦲꦭꦶꦠ꧀/ꦱꦸꦩꦂꦩꦏꦺꦴꦁꦱꦶꦩꦶꦱꦸꦮꦸꦂ/ꦩꦾꦁꦱꦶꦤꦶꦲꦤ꧀ꦲꦶꦁꦏꦛꦃ/ꦱꦶꦫꦪꦸꦝꦶꦱ꧀ꦛꦶꦫꦤꦸꦭꦶ/ꦗꦶꦤꦼꦤꦼꦁꦏꦼꦤ꧀ꦥꦿꦧ꧀ꦮꦤꦺꦴꦩ꧀ꦢꦺꦢꦽꦠꦫꦱ꧀ꦛꦿꦕꦤ꧀ꦝꦏꦶꦥꦸꦤ꧀ꦕꦫꦶꦪꦺꦴꦱ꧀ꦥꦸꦤꦶꦏꦧꦝꦺꦩꦼꦢꦭ꧀ꦲꦶꦁꦠꦲꦸꦤ꧀ꦔꦗꦼꦁ꧉ꦱꦱꦩ꧀ꦥꦸꦤꦶꦁꦥꦔꦼꦕꦥꦶꦥꦸꦤ꧀ꦱꦼꦫꦠ꧀ꦥꦤꦁꦒꦭꦤ꧀ꦔꦗꦼꦁꦥꦸꦤꦶꦏ꧈ꦏꦔꦁꦥꦔꦺꦫꦤ꧀ꦄꦢꦶꦥꦠꦶꦄꦂꦪꦥꦿꦧꦸꦥꦿꦔ꧀ꦮꦢꦤꦲꦶꦁꦤꦒꦫꦶꦱꦸꦫꦏꦂꦠꦏꦴꦁꦏꦠ꧀ꦢꦢꦺꦴꦱ꧀ꦏꦺꦴꦭ꧀ꦤꦺꦭ꧀ꦲꦶꦁꦭꦺꦱꦶꦪꦸꦤꦶꦥꦸꦤ꧀ꦥꦶꦪꦩ꧀ꦧꦏ꧀꧉ꦱꦂꦠꦏꦥꦠꦼꦝꦤ꧀ꦤꦩꦏꦔꦁꦥꦔꦺꦫꦤ꧀ꦄꦢꦶꦥꦠꦶꦄꦂꦪꦩꦁꦏꦸꦤꦒꦫ꧈ꦮꦺꦴꦤ꧀ꦢꦺꦤꦶꦁꦥꦔꦁꦏꦠꦶꦥꦸꦤ꧀ꦲꦶꦁꦢꦶꦤ꧀ꦠꦼꦤ꧀ꦉꦧꦺꦴꦏꦥꦶꦁ:
꧇꧑꧖꧇ꦮꦸꦭꦤ꧀ꦱꦺꦥ꧀ꦠꦺꦩ꧀ꦧꦼꦂꦠꦲꦸꦤ꧀ꦮꦼꦭꦤ꧀ꦢꦶ
꧇꧑꧘꧕꧗꧇꧈ꦲꦸꦠꦮꦶꦠꦁꦒꦭ꧀ꦏꦥꦶꦁ:꧇꧒꧗꧇ꦮꦸꦭꦤ꧀ꦱꦸꦫꦠꦲꦸꦤ꧀ꦗꦶꦩꦏꦶꦂꦲꦺꦴꦁꦏ:꧇꧑꧗꧘꧖꧇꧉
ꦱꦥꦺꦫꦔꦤ꧀ ꦲꦸꦠꦮ ꦏꦧꦺꦃ ꦠꦸꦭꦶꦱꦤ꧀ ꦱꦶꦁ ꦏꦲꦩꦺꦴꦠ꧀ ꦲꦤ ꦲꦶꦁ ꦏꦕ ꦲꦶꦏꦶ ꦢꦶꦗꦸꦥꦸꦏ꧀ ꦱꦏ Sastra.org