Virðisföngun
Virðisföngun er aðferð við opinbera fjármögnun sem gengur út á að „fanga“ hluta þess virðis sem opinber fjárfesting skapar fyrir einkaaðila. Þar sem opinberar fjárfestingar í til dæmis innviðum fyrir almenningssamgöngur auka virði fasteigna í nágrenninu skapa þær óinnleystar tekjur fyrir landeigendur. Með virðisföngun er reynt að fanga þessar tekjur, til dæmis með sérstöku innviðagjaldi á lóðir. Þannig verða jákvæð ytri áhrif framkvæmdanna að opinberum tekjum.
Segja má að í fasteignagjöldum felist virðisföngun þar sem hækkun fasteignaverðs sem leiðir af opinberum framkvæmdum leiðir til hærri fasteignagjalda og lóðaskatta og þar með aukinna opinberra tekna.
