Susenyos

Susenyos (1572 – 7. september 1632) var Eþíópíukeisari frá 1606 til dauðadags. Hann var sonur Fasilídesar prins, eins af barnabörnum Davíðs 2. Hópur oromóa tók hann og föður hans höndum þegar hann var drengur og héldu þeim í eitt ár. Þeim var bjargað af Assebo greifa og eftir það ólst hann upp hjá Admas Mogasa, drottningu, sem var móðir Sarsa Dengel keisara.

Susenyos var talinn eiga tilkall til krúnunnar þegar synir Sarsa Dengels tóku við. Eftir lát Za Dengels var hann lýstur keisari en þurfti að berjast fyrir hásætinu gegn Jakobi. Hann varð keisari eftir að hafa sigrast á fyrst Za Sellase og síðan Jakobi í orrustunni við Gol 1607. Hann var krýndur í Axúm 18. mars 1608.

Susenyos sýndi áhuga á trúboðsstarfi jesúítans Pedro Páez og gaf því undir fótinn að taka upp kaþólska trú þar sem hann vonaðist eftir herstyrk frá Portúgal og Spáni gegn oromóum sem sóttu fram í suðri. Hann gaf jesúítum jarðir, meðal annars í höfuðborginni Gorgora á norðurströnd Tanavatns, en þrátt fyrir bréfaskipti við Filippus 3. kom aldrei neinn her.

Þrátt fyrir þetta tók Susenyos upp kaþólska trú 1622 en skömmu síðar lést hinn hófsami og umburðarlyndi Pedro Páez og í stað hans kom Afonso Mendes sem reyndist hafa mun minni skilning á siðum Eþíópíumanna. Mendes hóf þegar umbótastarf, lýsti því yfir að Róm væri höfuð kirkjunnar og bannaði eþíópíska tímatalið. Nokkrum dögum eftir að hann tók við embætti 1626 hófust óeirðir og uppreisnir. Eftir nokkur blóðug átök lét Susenyos eftir og gaf þegnum sínum frelsi til að fylgja þeim sið sem þeir vildu og endurreisti þar með eþíópísku kirkjuna.

1632 sagði Susenyos af sér og lét syni sínum Fasilídes völdin eftir.