Smáralind

Smáralind er verslunarmiðstöð að Hagasmára 1 í Smáranum, Kópavogi og jafnframt sú stærsta á Íslandi, með yfir 70 verslanir og veitingastaði, auk annarrar þjónustu. Smáralind var formlega opnuð tíu mínútur yfir tíu þann 10. október, 2001 sem er stundum skrifað 10:10, 10. 10. '01.

Byggingin er 62.200 m² og er stærsta bygging sem opin er almenningi á landinu. Í Smáralind eru verslanir, veitingastaðir og þjónustuaðilar, meðal annars kvikmyndahúsið Smárabíó, barnaskemmtistaður og fleira. Þar er einnig Vetrargarðurinn sem er afþreyingarmiðstöð Smáralindar. Hann er samtals 9.000 m² að stærð og innan hans er 1750 m² sýningarsvæði þar sem meðal annars hafa verið haldnir ýmsir tónleikar, sýningar, keppnir og ráðstefnur. Í dag er þar skemmtigarður/tívolí.

Hönnun Smáralindar var samstarfsverkefni breska arkitekta- og verkfræðifyrirtækisins BDP og ASK arkitekta. Byrjað var að byggja Smáralind í mars árið 2000 og tók 19 mánuði að byggja hana. ÍSTAK var verktaki við bygginguna. Eignarhaldsfélagið Smáralind ehf. sér um eignarhald og rekstur Smáralindar og er öll eignin í eigu félagsins. Félagið leigir út verslana- og þjónusturými. Fjöldi gesta sem leggur leið sína í þangað á hverju ári er yfir 4 milljónir samkvæmt vefsíðu Smáralindar.