Jörundur Ragnarsson

Jörundur Ragnarsson (f. 9. júlí 1979) er íslenskur leikari. Jörundur útskrifaðist með B.F.A. gráðu frá Listaháskóla Íslands árið 2006. Hann hefur bæði leikið á sviði (t.d. Footloose, Lík í óskilum og Killer Joe) sem og í sjónvarpsþáttum og kvikmyndum.

Fyrsta kvikmynd sem Jörundur lék í var Köld slóð sem Björn Br. Björnsson leikstýrði. Hann fékk svo hlutverk misþroska drengs í kvikmynd Guðnýjar Halldórsdóttur Veðramót og fyrir það hlutverk fékk hann Edduverðlaun árið 2007. Haustið 2007 lék hann Daníel Sævarsson í Næturvaktinni, persónu sem hefur flosnað upp úr læknisfræði vegna prófkvíða og þunglyndis og tekið að sér starf á bensínstöð. Í framhaldi af velgengni þáttaraðarinnar lék hann einnig í sjónvarpsþáttaröðunum Dagvaktinni og Fangavaktinni, sem síðar ólu af sér kvikmyndina Bjarnfreðarson. Hann lék einnig galdrakarl í Astrópíu og Margeir í Heimsenda.