Wp/pdt/Euroopa

Euroopa (griechisch Ευρώπη) es daut wastliche Fefftel vonne eurasische Launtmaus. Uck wan Euroopa geografisch jeseene een Subkontinent es, woona mett Asien toop eenen Kontinent bilde deit, woat Euroopa historisch en kulturell meschtens aus ejna Kontinent jeseene. Dit bediet, daut de Bejreff 'Euroopa' nich bloos daut Geografische meent, sonda sich uck opp historische, kulturelle, politische, wirtschauftliche, rajchliche en ideelle Auspatjte betratjt.

Euroopa haft tjeene geografische Jrenze soo aus Meare ooda Flisse. Dee Jrenze were emma eene opne Froag en dee Auntwode soo, aus dee Mensche daut definere.

Aules toop haft Euroopa eene Launtplak von onhefea 10,5 Miljoone Kwedrotkilomeeta en es soomet no Australien dee tweedtjlansta Kontinent. Der nodlichsta Punkt vom europeischen Faustlaunt licht en Knivskjellodden (Norwegen), dee siedlichsta en Tarifa (Spanien) und dee westlichsta en Cabo da Roca (Portugal). Dee Nod-Sied-Utdehninj bedrajcht soo bie 3.800 Kilomeeeta. En Oost-Wast-Rechtinj lote sich biem europeischen Faustlaunt ewa 6.000 Kilomeeta mete, vom Uraljebirje en Russlaunt bette Atlantikküste von Portugal.

No de Definitioon von Strahlenberg haft Euroopa mett onsjefea 680 Miljoone Ennwohna hinja Asien en Afrika dee dreddjratste Zohl von Mensche von aule Kontinente en jehet to dee dichta besiedelde Deele vonne Ed. Dee derchschnettliche Ennwohnadichte bedrajcht onsjefea 65 Ennwohna/km². Besondasch en Wast-, Meddel- en Sideuroopa es de Ennwohnadichte relativ hoch, wearent see wieda nom Node en Ooste stoatj aufnemmt.