Maus

Maus: Memoria de un survivente, plus note simplemente como Maus (in germano, מויז Moyz in jidisch; mus in interlingua), es un romance graphic per le autor judee aschenasita Art Spiegelman (jidisch: ארט שפּיגלמאן) que narra del Holocausto europee in Polonia. Le historia es un biographia que veni del testimonio directe de su patre Vladek Spiegelman (וולאדעק שפּיגלמאן), un survivente al campos de concentration et extermination Majdanek e Auschwitz-Birkenau. Le opera se compone de duo tomos:

Volumine I: Mi patre sanguina historia
Volumine II: E hic initiava mi guai

Le particularitate le plus evidente es un technica narrative postmoderne, in quem le personages son designate como alegorias de animales anthropomorphe: le judeos son mures (como suggere le titulo), le nazis german son cattos, le collaboratores polonese son porcos, e le alliatos son canes statunitese e ranas francese, inter alia. Affrontante sia le vicissitudes del Holocausto vivite in prime persona, sia le consequentias transfundite al generation postbellic, Maus ha devenite in pauc tempore un libro melior-vendite global, donante al autor varie decorationes litterari como le premio Pulitzer in 1992. Hodie, Maus es considerate un classico moderne del litteratura concernente le Secunde Guerra Mundial, et es inter le plus legite al mundo del litteratura del Holocausto.

Art Spiegelman parla de Maus al radio britannic BBC in 2014: «Ben, il ha multe litteratura del Holocausto que es assi, tu sape, que nasce e cresce ab un grande notion christian: le idea que sufferer redime. Ma in realitate toto lo que face le sufferentia es causar dolor. E il ha brave gente obligate a patir, mal gente obligate a patir, e pro un integre spectro, le sol cosa que on pote dicer securmente es que sufferer es horribile. Dunque il era importante pro me in Maus de non render le idea de un martyre.»