Stanisław Tilich

Stanisław Tilich (němsce Stanislaw Tillich; * 10. apryla 1959 w Nowej Wjesce) je politikar Křesćansko-demokratiskeje unije Němskeje, kiž bě wot 2008 do 2017 ministerski prezident Swobodneho stata Sakskeje. Nimo toho bě wot 1. nowembra 2015 hač do 31. oktobra 2016 tež 70. předsyda Zwjazkoweje rady. Dnja 18. oktobra 2017 připowědźi swój wotstup ze zastojnstwa za december samsneho lěta a předstaji Michaela Kretschmera jako naslědnika.

Žiwjenje

Stanisław Tilich pochadźa ze serbskeje swójby katolskeje konfesije. Po swojim šulskim wukubłanju a abiturje na Serbskim gymnaziju w Budyšinje studowaše na Techniskej uniwersiće Drježdźany z wotzamknjenjom diplomoweho inženjera za konstrukciju a kolesynowu techniku a započa w lěće 1984 jako konstrukter w předewzaću za elektroniku w Kamjencu w Hornjej Łužicy.^[1] Wot 1987 do 1989 běše přistajeny wokrjesneho zarjadnistwa Kamjenc a wot 1989 do 1995 samostatny srjedźostawski předewzaćel.

Politika

Hišće před přewrótom bu Tilich w lěće 1987 čłon CDU w NDR, w lěće 1990 čłon cyłoněmskeje CDU. 18. měrca 1990 je so ze zapósłancom prěnjeje swobodnje wuzwoleneje Ludoweje komory stał. Po jeje rozpušćenju w běhu němskeho zasozjednoćenja dźěłaše hač do lěta 1994 jako wobkedźbowar w Europskim parlamenće. W 4. Europskim parlamenće (1994-1999) běše wuzwoleny čłon za Němsku a fungowaše jako zastupowacy předsyda etatoweho wuběrka a generalny roprawjer za etat Europskeje unije. ^[2] ^[3] ^[4] Wot 1992 do 1999 běše čłon předsydstwa Europskeje ludoweje strony.

W lěće 1999 powoła jeho tehdyši ministerski prezident Sakskeje Kurt Biedenkopf do swojeho kabineta, hdźež běše hač do 2002 statny minister za zwjazkowe a europske naležnosće.

W kabineće Georga Milbradta wuzwoleneho w lěće 2002 za ministerskeho prezidenta dźěłaše Tilich najprjedy hač do 2004 jako statny minister a šef statneje kenclije a wot 2004 jako Sakski statny minister za wobswět a ratarstwo. W tym času staraše so wosebje wo wutwar škita přećiwo powodźenju po łobjowym powodźenju w awgusće 2002.

W lěće 2007 bu Sakski statny minister za financy a naslědnik Horsta Metza wotstupjeneho dla krizy sakskeje krajneje banki a wjedźeše jednanja wo naražanu krajnu banku na stronje Georga Milbradta. ^[5]

14. apryla 2008 namjetowaše jeho Georg Milbradt w swojim wotstupnym wozjewjenju jako naslědnika za zastojnstwo ministerskeho prezidenta a jako krajneho předsydu strony.^[6] 24. meje 2008 je strona jeho na stronskim zjězdźe w Šwikawje za krajneho předsydu sakskeje CDU wuzwoliła. Wot 28. meje 2008 je wón ministerski prezident Swobodneho stata Sakskeje. Tilich je z tym prěni ministerski prezident Swobodneho stata w stawiznach po přewróće, kiž je so w Sakskej narodźił a zdobom prěni katolski Serb w zastojnstwje ministerskeho prezidenta.

Wón bu w lěće 2009 jako direktny kandidat swojeje strony we wólbnym wokrjesu 54 (Kamjenc 2) z 58,6 % hłosow znowa do krajneho sejma woleny. 2014 dósta w samsnym wokrjesu 57,2 % hłosow.

Stanisław Tilich bydli w Pančicach-Kukowje, je woženjeny a ma dwě dźěsći.

Hlej tež

Žórła

Wotkazy

Commons: Stanislaw Tillich – Zběrka wobrazow, widejow a awdiodatajow

Ministerscy prezidenća Swobodneho stata Sakskeje

Kurt Biedenkopf (1990–2002) | Georg Milbradt (2002–08) | Stanisław Tilich (2008–17) | Michael Kretschmer (2017–)

Sakscy ministrojo za wobswět a ratarstwo

Sakscy ministrojo za financy

Kabinet Biedenkopf III – 26. oktobra 1999 hač do 17. apryla 2002

Kabinet Milbradt I – 17. apryla 2002 hač do 11. nowembra 2004

Kabinet Milbradt II – 11. nowembra 2004 hač do 17. junija 2008

Kabinet Tilich I – 18. junija 2008 hač do 30. septembra 2009

Kabinet Tilich II – 30. septembra 2009 hač do 12. nowembra 2014

Kabinet Tilich III – wot 12. nowembra 2014 hač do 12. decembra 2017

[1] FTD 14. apryla 2008: Profil: Stanislaw Tillich

[2] FAZ.net 14. apryla 2008: Naslědnik. Stanislaw Tillich – Serb w Sakskej (němsce)

[3] Frakcija CDU sakskeho krajneho sejma (němsce)

[4] Přehlad wo funkcijach/činitosćach w Europskim parlamenće (němsce)

[5] Süddeutsche Zeitung 14. apryla 2008 Stanislaw Tillich. Zurückhaltend, souverän, loyal

[6] Milbradt stürzt über Landesbank-Affäre – Finanzminister wird Nachfolger Spiegel Online, 14. apryla 2008

[1]

[2]

[3]

[4]

[5]

[6]