Kashoobish

She fer jeh ny çhengaghyn Lechitagh, fo-chrouw ny çhengaghyn Slavagh, ee yn Chashoobish (Kashoobish: kaszëbsczi jãzëk, pòmòrsczi jãzëk, kaszëbskò-słowińskô mòwa; Polynnish: język kaszubski, język pomorski, język kaszubsko-słowiński). T'eh er credjal dy daase y Chashoobish magh ass y çhengey va goll er loayrt ec kynnaghyn ennagh jeh ny Pomeranee as yn ennym Kashoobee currit orroo 'syn ard Pomorze er coose yiass y Vooir Valtagh eddyr ny h-awinyn Wisła as Odra.

T'ee feer chosoylagh rish y Clovinsish, as y daa jeu nyn abbyrtyn jeh'n Phomeranish. Ta çhengoaylleeyn ennagh smooinaghtyn dy nee çhengey er lheh t'aynjee, agh ta çhengoaylleeyn elley credjal nagh vel aynjee agh abbyrt y Pholynnish.

Gollrish y Pholynnish, ta 5% jeh focklyn y Chashoobish çheet magh ass y Ghermaanish Injil, lheid as kùńszt (ellyn), as ta fir elley çheet magh ass yn Ard-Ghermaanish. Myrane lesh shen, ta'n Chashoobish goaill stiagh eeasaghtyn veih ny çhengaghyn Baltagh, veih'n Rooshish as veih'n Pholynnish.

Ayns coontey-pobble y vlein 2002 ren 53,000 deiney 'sy Pholynn fogrey magh dy vel ad jannoo ymmyd jeh'n Chashoobish da'n chooid smoo tra v'ad 'sy thie. Ta'n Pholynnish ec dagh Kashoobisheyr chammah. She çhengey oikoil t'aynjee ayns boodeeyssyn ynnydagh ayns Gmina Sierakowice as Gmina Parchowo ayns Queiggey Pomorze.