Azotobacteráceas

A familia das bacterias azotobacteráceas (Azotobacteraceae) comprende dous xéneros de bacterias aerobioas diazótrofas chamados Azomonas e Azotobacter, que se caracterizan pola súa capacidade de formar quistes. A familia tamén se caracteriza pola súa forma variable; a forma típica é ovoide, pero moitas son pleomórficas. Se dispoñen de suficiente cantidade de molibdeno (Mo), as Azotobacteraceae poden fixar polo menos 10 mg de nitróxeno molecular por gramo de carbohidrato consumido baixo condicións aerobias. Igual que a maioría das Pseudomonadaceae, as Azotobacteraceae poden utilizar unha ampla variedade de fontes de carbono, incluíndo a sacarosa.^[1]

Unhas análises recentes do xenoma non anotado de Azotobacter vinelandii indicaron que é máis apropiado agrupar esta bacteria na familia das Pseudomonadaceae. A distinción orixinal entre as dúas familias, Pseudomonadaceae e Azotobacteraceae, estaba baseada na capacidade de fixar o nitróxeno típica das Azotobacteraceae, pero agora sábese que algunhas Pseudomonadaceae tamén poden fixar o nitróxeno.^[2] A relación entre estas familias non é sorprendente dada a capacidade de moitas Azotobacteraceae de fluorescer debido á produción de pioverdina, un péptido non ribosómico sideróforo típico de moitas Pseudomonadaceae.^[3][4] Con estes descubrimentos a posición das Azotobacteraceae en taxonomía é controvertida.

En 2004, un estudo filoxenético indicou que Azotobacter vinelandii pertencía ao mesmo clado que a bacteria Pseudomonas aeruginosa,^[2] e pouco despois mesmo se suxeriu que os xéneros Azotobacter, Azomonas e Pseudomonas están relacionados e poderían ser sinónimos.^[5]