Parsoic

Aonad faid é an parsoic, arb ionann é agus timpeall ar 30.9 trilliún ciliméadar (nó, le bheith beacht, 30,856,775,814,671,900 méadar), nó 3.26 solasbhliain (níos cruinne, 3.261564 solasbhliain). Tá an focal féin, parsec as Béarla, bunaithe ar parallax second, is é sin saobhdhiallas-soicind nó soicind saobhdhiallais. Is é is saobhdhiallas ann ná gluaiseacht na réalta trasna na spéire, mar stua, nó mar uillinn. Is iad na céimeanna, na stuanóiméid agus na stuashoicindí aonaid thomhaiste an tsaobhdhiallais. Má chuireann an réalta aon stuashoicind amháin di trasna na spéire, agus an stuashoicind sin ag freagairt d'aon aonad réalteolaíoch amháin gluaiseachta, glacfar leis go bhfuil an réalta suite faoi aon pharsoic amháin dínn. Is ionann an t-aonad réalteolaíoch agus meánfhad an Domhain ón nGrian. De réir mar a bhíonn an Domhan ag dul timpeall na Gréine, bíonn mionathruithe saobhdhiallais le haithint ar áit na réaltaí ar an spéir, agus is féidir a aithint ar an saobhdhiallas seo cé chomh fada is atá na réaltaí sin suite uainn. Mar sin, is aonad praiticiúil é an parsoic, nó ceadaíonn sé dúinn an stua a chlaochlú go fad gan aon fhoirmle matamaitice ar leith.

Parsoic

Cineál	aonad faid agus aonad díorthaithe UCUM
Aonad de	fad
Tiontuithe aonad
In aonaid SI	30,856,775,814,914,000 m
In aonaid caighdeánacha	3.2615637771674 ly 206,264.806247 AU 206,264.8 AU 30,856,775,814,914 km 19,174,000,000,000 mi 101,236,140,949,180,000 ft 33,745,380,316,395,000 yd

Ba é an réalteolaí Sasanach Herbert Hall Turner a mhol an t-ainm sin "parsoic" chun úsáide sa bhliain 1913. Praiticiúil is uile mar atá an parsoic, dealraíonn sé nach bhfuil gach réalteolaí sásta leis mar aonad. Is é an rud a dúirt an fisiceoir Fionlannach Kari Enqvist ná gur "aonad gránna faid é an parsoic, ar chóir pionós dian a ghearradh do na réalteolaithe a cheap é".^[1]