Dominikaanske Republyk

Nei de ûntdekking fan it kontinint Amearika troch Kolumbus, wie Hispanjoala ynearsten besit fan Spanje en yn de 18e iuw fan Frankryk. Op 22 augustus 1791 kamen de slaven op Hispanjoala yn opstân tsjin de Frânsken. De troepen dy't Napoleon nei it eilân ta stjoerde waarden yn jannewaris 1804 ferslein. Dêrnei waard it eilân ûnôfhinklik ûnder de namme Haïty. Op 27 febrewaris 1844 makke it eastlik diel fan Hispanjoala har los fan Haïty en rôp de Dominikaanske Republyk út.

Juan Pablo Duarte, Francisco del Rosario en Sanchez Ramón Matías Mella wurde beskôge as de stifters fan de Republyk.

De Dominikaanske Republyk is 48.730 km² grut en foarmet tegearre mei it yn it westen lizzende Haïty it eilân Hispanjoala. Eastlik leit it eilân Puerto Riko.

De haadstêd Santo Domingo leit yn it suden. In oare bekende stêd is Puerto Plata dat yn it noarden leit en in protte toeristen lûkt. Krekt bûten dizze stêd leit it park Playa Dorada mei in soad lúkse hotels. Doarpen wat fierder nei it easten wêr't ek in soad toeristen komme binne Sosúa en Cabarete.

De grutste mar fan de Dominikaanske republyk is Lago Enriquillo dat 250 km² grut is. It heechste punt is Pico Duarte mei 3175 meter en it leechste punt is Lago Enriquillo dat -46 meter djip is.

De Dominikaanske befolking is foar 73 persint in griemmank fan minsken mei Afrikaanske, Jeropeeske en Yndiaanske foarâlden. Om-ende-by 16 persint fan de befolking binne fan blanke Jeropeeske, foaral Spaanske komôf en 11 persint fan swart Afrikaanske komôf.

It meastepart fan de befolking, sa'n 95 persint, is Roomsk-Katolyk.