E@I

 

La vizio de E@I estas paca kaj harmonia mondo en kiu ĉiuj civitanoj povas facile kaj rapide komuniki tutmonde. La ĉefaj celoj por atingi tion estas:

• instigi interkulturan lernadon kaj internaciajn kunlaboron kaj komunikadon;
• subteni lernadon pri kaj uzadon de interretaj teknologioj kaj lingvoj;
• helpi validigadon de la Ĉarto de la Unuiĝintaj Nacioj kaj de ties Deklaracio de homaj rajtoj.

Por atingi la celojn E@I iniciatas kaj subtenas projektojn pri internacia kunlaboro de junuloj, organizas klerigajn kaj kulturajn aranĝojn, rilatajn al la celoj, informas pri graveco kaj utileco de senbara internacia komunikado.

Unu el kernaj kampoj de E@I-agado estas seminarioj. En tiuj seminarioj jamaj aktivuloj trejniĝas kaj spertiĝas pri diversaj manieroj kunlabori kaj uzi la interreton, aperas novaj aktivuloj. Dum la seminarioj renkontiĝas kaj ofte freŝiĝas per novaj membroj teamoj de aktualaj E@I-projektoj, naskiĝas ideoj por novaj projektoj kaj aktiviĝas novaj homoj.

La litero "E" en la nomo E@I montras ke la organizo okupiĝas pri Edukado. En pli vasta kunteksto ĝi reprezentas ankaŭ aliajn vortojn: Efikeco, Esperanto, Evoluo, Eŭropo.

La litero "I" en la nomo E@I indikas ke la organizo okupiĝas pri komunikiloj kiel Interreto. En pli vasta kunteksto ĝi reprezentas ankaŭ aliajn vortojn: Interkulturo, Informo, Ideo, Inspiro.

La signo "@" indikas la sinergian efikon de tiuj ĉi du konceptoj, kiu necesas por atingi facilan kaj rapidan internacian komunikadon.

Ofte uzataj liberaj tradukoj de la mallongigo estas "Edukado@Interreto" aŭ "Esperanto@Interreto", sed pro la plursignifeco de la literoj E kaj I oni ekde la memstariĝo de la organizo en la jaro 2005 oficiale uzas nur la mallongigan formon de la nomo "E@I".

 

La ideo pri E@I ekestis la 12-an aŭ la 13-an de novembro 1999, kiam dum neesperantista seminario de junularaj organizoj el landoj ĉe la Balta maro kun kvindeko da partoprenantoj kunvenis la esperantistoj Hokan Lundberg (Svedio), Nastja Koĵevnikova (Rusio) kaj Dovilė Dimindavičiūtė (Litovio). Jam tiam elpensiĝis la nomo "Esperanto@Interreto" kaj ekestis ideo pri esperantista seminario kiu portu tiun nomon. Ĝi okazis de la 16-a ĝis la 22-a de aprilo 2000 en popolaltlernejo Tollare apud Stokholmo en ĉeesto de 21 partoprenantoj el 6 landoj^[1][2] kaj dum ĝi fondiĝis internacia laborgrupo kiu elektis por si la saman nomon. Tiam ankaŭ elektiĝis la retregiono "ikso.net".^[3] Henning von Rosen kaj Hokan Lundberg prezentis la vizion de E@I dum la 56-a IJK en Honkongo. Jam tiam ĝi enhavis la proklamon ke "ne eblas tro emfazi la gravecon de ekesto de enretaj, vere funkciantaj lernmedioj, celantaj subteni kaj peri la ekutiligon de la planeda lingvo", kaj ankaŭ deziron ke aliro al kaj interreto kaj planeda lingvo fariĝu homaj rajtoj.^[4] La fruan historion de E@I priskribis Hokan Lundberg en aŭgusto de 2003^[5] kaj denove okaze de ĝia 10-jara jubileo.^[6]

En 2001 E@I aĉetis la retregionojn ikso.net kaj tejo.org, kreis retpaĝarojn por TEJO, ties Komisiono por Eksteraj Rilatoj (KER) kaj la 58-a IJK (Pato Branco), kaj ankaŭ starigis propran fonduson "E@I" kadre de UEA/TEJO.^[7][8] Dua seminario Esperanto@Interreto, okazigita de la 27-a de oktobro ĝis la 4-a de novembro 2001 en Upsalo (en la gimnazio Katedralskolan^[9]), jam estis multe pli granda kaj profesia kaj gajnis al la organizo novajn kunlaborantojn (rete aliĝis al ĝi 58 personoj^[10], partoprenis 41 el 18 landoj^[7]). La trian seminarion en Ĉaĉak (2002) oni pro kunlaboro kun neesperantistoj faris dulingva (estis uzata Esperanto kaj la angla lingvo).^[11]

Dum la jaroj 2002-2004 okazis grandaj laboroj pri interretaj projektoj, precipe lernu!, Lingva Prismo kaj Interkulturo. Unua skizo de lernu! prezentiĝis dum la konferenco CALICO 2002^[12] en Davis (Usono) kie de la 26-a ĝis la 31-a de marto 2002^[13][14] kunsidis la laborteamo de tiu "kurseja projekto de ESF".^[15] En aprilo 2003 dum la seminario en Bostono la laborgrupo pliformaliĝis: formiĝis la unua estraro (kvinkapa)^[16] kaj verkiĝis unua statuto.^[17] Sekve de tio, la 25-an de julio 2003 dum la 59-a IJK en Lesjöfors E@I akceptiĝis kiel faka sekcio de TEJO^[18] kaj la saman someron E@I starigis kunlaboron kun ILEI.^[5] Dum la sesa seminario en Sarajevo en 2004 ligiĝis kontakto kun ILEI kiu rezultis en serio de seminarioj Flugiloj de Malfacila Vento.

 

Pro bezono de plia kresko kaj pli facila aliro al eksteraj subvencioj oni decidis doni al E@I juran personecon kaj ĝi estis la 14-an de novembro 2005 registrita kiel civitana asocio ĉe la Ministerio de internaj aferoj de la Slovaka respubliko. En la statuto, kiun verkis la tiamaj gvidantoj kaj aprobis ĝin la membroj de la laborgrupo, pro strategiaj kialoj oni kiel oficialan nomon de la organizo uzis la mallongigon E@I.^[19] La 18-an de junio 2005 du aktivuloj de E@I, Hokan Lundberg (tiam ĝenerala sekretario) kaj Sonja Petrović geedziĝis en Beogrado.

Okaze de la 91-a UK en Florenco (2006) produktis E@I en rekorda kvanto de 9.000 ekzempleroj (la posta dua eldono ampleksis pliajn 3.000) la DVD-n Esperanto Elektronike.

La 1-an de aŭgusto 2007 estis inaŭgurita nova estraro^[20] en kiu kiel prezidanto figuris tiama afergvidanto Peter Baláž. Ankaŭ inter la ceteraj novaj estraranoj troviĝis neniu el la fondintoj kaj fruaj aktivuloj. Du novaj estraranoj, Jevgenij Gaus kaj Peter Baláž, vizitis inter la 2-a kaj la 13-a de aŭgusto laŭ invito de ESF Japanion kaj reklamis tie la agadon de la organizo dum la 92-a UK en Jokohamo.^[21] En septembro de 2007 E@I estis akceptita kiel membra organizaĵo de la Eŭropa Junulara Fondumo (European Youth Foundation, EYF).

 

Dum kelkaj lastaj jaroj E@I pli kaj pli okupiĝas pri grandaj interretaj projektoj, sed fojfoje efektiviĝas ankaŭ grandskala eldona agado. Tiel la 10-an de septembro 2008 aperis kiel senpaga aldonaĵo al la pola tagĵurnalo Gazeta Wyborcza kompaktdisko titolita "Esperanto", mendita de la urbo Bjalistoko (tiam organizonto de la sekva, 94-a UK) kaj produktita de E@I en rekorda kvanto de 364.000 ekzempleroj.^[22]. E@I foje okupiĝas ankaŭ pri projektoj ne unuavice esperantistaj sed proksimaj al celoj de la Esperanto-movado, ĉiam kun partopreno de esperantistoj kaj favore al aliaj malpli grandaj projektoj esperantistaj. Tiel ekzemple efektiviĝis en la jaroj 2009-2011 projekto por instrui la slovakan lingvon per interreto, por kiu E@I ricevis subvencion de 256.000 eŭroj de EACEA, la eduka agentejo de la Eŭropa komisiono. Pro siaj projektoj kiuj antaŭenigas lingvolernadon kaj multlingvecon, E@I helpe de EEU fine de la jaro 2012 fariĝis membro de la Civitana Platformo por Multlingveco de la Eŭropa Komisiono kaj ekde la jaro 2013 ĝia reprezentanto partoprenas en ties kunsidoj inter delegitoj de la 29 partoprenantaj eŭropnivelaj civitanaj organizoj.^[23]

Kiel bona maniero ricevi novajn laborfortojn kaj kreskigi aktivulojn montriĝis organizado de laborstaĝoj por universitataj studentoj per la programo Erasmus. Post la unuaj spertoj akiritaj de Marek Blahuš en Francio en 2010-2011, dum la somero de 2011 faris sian staĝon en E@I samtempe tri junaj esperantistoj. Tiuj laboris jam en la unua fizika oficejo de E@I, kiun la organizo posedas ekde la 1-a de julio 2011 en Partizánske, laŭ kunlaboro kun ĝiaj urbaj instancoj. Sekvis pliaj staĝantoj, tiel ke ĝis marto 2013 la staĝantoj sume kontribuis al la agado de E@I per proksimume 600 labortagoj. Eksa staĝantino Dorota Rodzianko du monatojn post sia staĝo fariĝis en februaro 2013 salajrata dungito de E@I, jam la dua post Katarína Novotníčková kiu eklaboris en novembro de 2009 lige kun la projekto Slovake.eu. La 29-an de aprilo 2013 E@I estis akceptita kiel gastiganta (kaj sendanta) organizo de Eŭropa Volontula Servo en Partizánske, pro kio ĝi ricevis la ŝancon akceptadi krom staĝantoj ankaŭ stipendiatajn volontulojn (ĝis 30 jarojn aĝajn).

Dum februaro 2012, Peter Baláž, Indrė Pileckytė, Jevgenij Gaus kaj Neringa Gaus entreprenis esploran vojaĝon al Ĉinio kiel reagon al la kreskanta nombro de ĉinaj uzantoj ĉe lernu! kaj por esplori la eblon organizadi tie estonte aranĝon similan al SES.^[24] La 15-an de decembro 2012 la E@I-kunordiganto Peter Baláž estis proklamita Esperantisto de la Jaro, ĉefe pro lia agado entreprenita kadre de la organizo (interretaj projektoj, eŭropuniaj projektoj, SES kaj KAEST, eldonaĵoj kaj atento al talentitaj junaj Esperantistoj).^[25] Marek Blahuš, okupiĝanta pri komputila lingvistiko en kelkaj E@I-projektoj, elektiĝis la 25-an de aprilo 2013 kiel membro de la Akademio de Esperanto por naŭjara periodo.^[26] Meze de majo 2013 E@I prezentiĝis samtempe dum Poliglota konferenco en Budapeŝto^[27] kaj kiel invititoj ĉe la 90-a Germana Esperanto-Kongreso en Nurenbergo (aliaj invititaj gast-prelegantoj estis Humphrey Tonkin kaj Martin Haase).

 

La funkciado de E@I estas regulata de statuto, laŭ kiu la organizon estras tri- ĝis naŭkapa estraro. Aliaj organoj estas la elekta komisiono, la financa komisiono, kaj fine la membraro.

Membro de E@I rajtas esti ĉiu persono kiu konsentas kun la statuto kaj montras sian intereson liverante necesajn datumojn per interreta formularo aŭ retmesaĝo. Personoj en la aĝo inter 15 kaj 35 jaroj (inkluzive) estas regulaj membroj. Ceteraj personoj estas subtenantoj kaj ne havas voĉdonrajton. Membreco en E@I estas senpaga. Laŭ statistikoj en la retpaĝaro de E@I^[28] estas nun ĉirkaŭ 20 mil membroj, kio plejparte ŝuldiĝas al la fakto ke uzantoj de lernu! per sia registriĝo en la paĝaro fariĝas ankaŭ E@I-membroj. En 40 landoj de la mondo nun ekzistas pli ol 100 membroj.

  Pli detalaj informoj troveblas en artikolo Kategorio:Estraranoj de E@I.

 

 

 

La nuna estraro de E@I (en Marto 2015) konsistas el la jenaj personoj:^[29]

• Peter Baláž - kunordiganto, projektplanado
• Marek Blahuš - ĝenerala sekretario
• Yves Nevelsteen - kasisto

Origine en tiu ĉi estraro membris ankaŭ Judith Meyer, kiu poste demisiis, kaj Jevgenij Gaus.

La unuan estraron de E@I, elektitan en aprilo 2003 dum la seminario en Bostono, konsistigis Chuck Smith, Hokan Lundberg, Nastja Koĵevnikova, Ralf Gion Fröhlich kaj Sonja Petrović.^[16] En postaj estraroj, dum E@I ankoraŭ estis Faka Sekcio de TEJO, membris ankaŭ interalie Slavik Ivanov kaj Heming Welde Thorbjørnsen.

Kvankam la agado de E@I dekomence dependas de volontuloj kaj finance la organizo estas plene dependa de subvencioj kaj donacoj, la kurantaj projektoj ebligas al ĝi teni kelkajn plentempajn salajratajn dungitojn, kiuj zorgas precipe pri kunordigo de la laboro kaj administrado.

Jen listo de ĝisnunaj dungitoj de E@I:

#	Nomo	Lando	Laborloko	Komenco	Fino	Salajro	Ĉefaj respondecoj
1	Peter Baláž	Slovakio	Partizánske	2007-08-01	daŭras	malfiksa	kunordigado de la aktivaĵoj de E@I
2	Katarína Novotníčková (antaŭe Nosková)	Slovakio	Trnava	2009-11-01	daŭras	fiksa	subteno de projektoj, verkado de monpetoj, korespondado, enhavo de projektoj, projekta mastrumado
3	Dorota Rodzianko	Pollando	Partizánske	2013-02-01	2016-01-31	fiksa	administrado de EU-projektoj, administrado de Esperanto-aranĝoj kaj financa mastrumado
4	Veronika Matušková	Slovakio	Partizánske	2014-04	2015-08-31	fiksa	eksteraj rilatoj, verkado de monpetoj
5	Matthieu Desplantes	Francio	Partizánske	2015-01-16	daŭras	fiksa	tradukado kaj programado
6	Katarína Krutá	Slovakio		2015-09-23	daŭras	fiksa	publikaj kaj eksteraj rilatoj

Helpe de stipendiaj programoj, E@I komencis en 2010 akcepti staĝantojn – universitatajn studentojn, kiuj en la daŭro de kelkaj monatoj spertiĝas laborante por la organizo, kutime plentempe. Samtempe ilia staĝo enkalkuliĝas ankaŭ kiel parto de ilia universitata studo. Aldone ekde 2013 E@I gastigas ankaŭ volontulojn pere de EVS-programo.

Jen listo de ĝisnunaj staĝantoj kaj volontuloj de E@I:

#	Nomo	Studo				Staĝo
		Universitato	Urbo	Lando	Fako	Komenco	Fino	Urbo	Lando	Formo	Stipendio
1	Marek Blahuš	Masaryk-Universitato	Brno	Ĉeĥio	informadiko	2010-09-01	2011-05-09	Nancio	Francio	plentempe	Erasmus
2	Salomé Hug	Universitato Nancio 2	Nancio	Francio	kognaj sciencoj	2011-03-07	2011-04-22	Nancio	Francio	partatempe	neniu
3	Matthieu Desplantes	ESIEA	Ivry-sur-Seine	Francio	informadiko	2011-06-13	2011-09-02	Bratislavo, Partizánske	Slovakio	plentempe	Erasmus
4	Juan Diego Díaz Bautista	Universitato de Granado	Granado	Hispanio	politologio, administraj sciencoj kaj filozofio	2011-07-01	2011-10-31	Partizánske, Granado	Slovakio,   Hispanio	plentempe	Erasmus
5	Miroslav Hruška	Mendel-Universitato	Brno	Ĉeĥio	regiona evoluo kaj publika administrado	2011-07-01	2011-10-01	Partizánske	Slovakio	plentempe	Erasmus
6	Konstantin Tiĥomirov	Vroclava Universitato	Vroclavo	Pollando	ĉeĥa filologio	2012-07-01	septembre 2012	Partizánske	Slovakio	partatempe	volontulado, neniu
7	Mateusz Kulka	Vroclava Universitato	Vroclavo	Pollando	pola filologio / rusa filologio	2012-07-01	septembre 2012	Partizánske	Slovakio	partatempe	volontulado, neniu
8	Anna Liszewska	Vroclava Universitato	Vroclavo	Pollando	pola filologio	2012-07-01	2012-08-01	Partizánske	Slovakio	partatempe	volontulado, neniu
9	Jiří Galuška	Masaryk-Universitato	Brno	Ĉeĥio	juro	2012-07-01	2012-07-20	Partizánske	Slovakio	plentempe	stipendio nesukcesinta
10	Dorota Rodzianko	Universitato en Bjalistoko	Bjalistoko	Pollando	ekonomio	2012-07-23	2012-11-30	Partizánske	Slovakio	plentempe	Erasmus
11	John Bauer[30]	Universitato de Tours	Tours	Francio	lingvoj kaj internacia komerco	2012-11-05	2013-02-05	Partizánske	Slovakio	plentempe	Erasmus
12	Zsófia Pataki	Universitato de Szeged	Szeged	Hungario	kultura mediacio	2013-05-01	2013-09-24	Partizánske	Slovakio	plentempe	Campus Hungary
13	Romualda Jeziorowska	Vroclava Universitato	Vroclavo	Pollando	ĉeĥa filologio, pola filologio, kulturscienco	2013-07-01	2013-09-30	Partizánske	Slovakio	plentempe	Erasmus
14	Václav Zouzalík	Masaryk-Universitato	Brno	Ĉeĥio	informadiko	2013-07-08	2013-10-08	Partizánske	Slovakio	plentempe	Erasmus
15	Matthieu Desplantes[31]	ESIEA	Ivry-sur-Seine	Francio	informadiko	2013-10-09	2014-10-05	Partizánske	Slovakio	plentempe	Eŭropa volontula servo
16	Kaan Kızılgün[31]	Universitato Yeditepe	Istanbulo	Turkio	grafiko	2013-10-09	2014-09-29	Partizánske	Slovakio	plentempe	Eŭropa volontula servo
17	Rasmus Åkerlund[31]	Universitato de Lund	Lund	Svedio	komputika scienco	2014-09-16	2015-08-25	Partizánske	Slovakio	plentempe	Eŭropa volontula servo
18	Matthias von Laer[31]	Ruprecht-Karls-Universitato	Heidelberg	Germanio	matematiko	2014-09-30	2015-09-29	Partizánske	Slovakio	plentempe	Eŭropa volontula servo
19	Anna Liszewska[31]	Vroclava Universitato	Vroclavo	Pollando	pola filologio	2014-10-20	2015-09-30	Partizánske	Slovakio	plentempe	Eŭropa volontula servo
20	Alberto Muzzu[31]	Universitato de Cagliari	Sassari	Italio		2014-10-21	2015-09-06	Partizánske	Slovakio	plentempe	Eŭropa volontula servo
21	Elena Ĥusanova		Jekaterinburgo	Rusio		2015-03-22	2016-02-27	Partizánske	Slovakio	plentempe	Eŭropa volontula servo
22	Oleh Rohalskij		Kievo	Ukrainio		2015-04-04	2016-02-27	Partizánske	Slovakio	plentempe	Eŭropa volontula servo
23	Robert Nielsen	Universitato Kolegio de Dublino	Dublino	Irlando	Ekonomiko kaj politiko	2015-09-29	2016-09-30	Partizánske	Slovakio	plentempe	Eŭropa volontula servo
24	Michael Dubery			Britio		2016-02-01	2016-11-30	Partizánske	Slovakio	plentempe	Eŭropa volontula servo
25	Dorota Rodzianko			Pollando		2016-02-10	2017-	Partizánske	Slovakio	plentempe	Eŭropa volontula servo
26	Edoardo Nannotti			Italio		2016-03-06	2017-	Partizánske	Slovakio	plentempe	Eŭropa volontula servo
27	Ilja Gnusarev			Rusio		2016-07-02	2017-	Partizánske	Slovakio	plentempe	Eŭropa volontula servo
28	Jana Janovyĉ			Ukrainio		2016-07-16	2017-	Partizánske	Slovakio	plentempe	Eŭropa volontula servo
29	Laŝa Ĉaĥunaŝvili			Kartvelio		2016-11-05	2017-	Partizánske	Slovakio	plentempe	Eŭropa volontula servo
30	David Mamsch			Germanio		2017-	2018-	Partizánske	Slovakio	plentempe	Eŭropa volontula servo
31	Sofja Zareckaja		Moskvo	Rusio		2017-	2018-	Partizánske	Slovakio	plentempe	Eŭropa volontula servo
32	Ekaterina Lozina		Moskvo	Rusio		2017-	2018-	Partizánske	Slovakio	plentempe	Eŭropa volontula servo
33	Kryštof Klestil			Ĉeĥio		2017-	2018-	Partizánske	Slovakio	plentempe	Eŭropa volontula servo
34	Salomé Hug		Metz	Francio		2018-	2019-	Partizánske	Slovakio	plentempe	Eŭropa volontula servo

Ekde la 1-a de julio 2011, danke al subteno de la urbo Partizánske kaj ties urbestro Jozef Božik, E@I disponas pri propra oficejo en ĝia urbocentro kontraŭ la simbola luo de 1 eŭro jare. La unua oficejo havis la surfacon de 60 m² kaj laborlokojn por 5 personoj. En junio de 2013 estis ŝanĝita loko de oficejo ene de la sama konstruaĵo, la oficejo iĝis pli granda kun 100 m² kaj du ĉambroj. Ekde ĝia stariĝo ĉiuj staĝantoj kaj surlokaj aktivuloj de E@I komune laboras tie.

  Pli detalaj informoj troveblas en artikolo Kategorio:Aranĝoj de E@I.

Organizado de edukaj aranĝoj estas grava parto de la agado de E@I ekde ĝia fondiĝo - ĝi ja mem en la jaro 2000 ekestis ĝuste dum seminario, kiu portis la titolon "Esperanto@Interreto" kaj estis organizita de TEJO en Stokholmo.

 

Precipe en la unuaj jaroj de la funkciado de E@I, trejnseminarioj pri temoj rilataj al edukado kaj interreto havis gravan rolon en la disvolviĝo de la asocio kaj trovado de novaj aktivuloj. En la tempo kiam E@I estis Faka Sekcio de TEJO, ĝiaj seminarioj estis samtempe ankaŭ TEJO-seminarioj.

Jen la listo de ĉiuj seminarioj organizitaj de E@I, kun titoloj, lokoj kaj datoj:

• E@I-2000 - Esperanto@Interreto – Stokholmo (Svedio)^[32][33] – 16-a ĝis 22-a de aprilo 2000
• E@I-2001 - Rete Kunlabori – Upsalo (Svedio) – 27-a de oktobro ĝis 4-a de novembro 2001^[34]
• E@I-2002 - Rete Lingvumi – Ĉaĉak (Jugoslavio) – 28-a de aprilo ĝis 5-a de majo 2002^[35]
• E@I-4 - Rete Informadi – Lesjöfors (Svedio) – 26-a de oktobro ĝis 3-a de novembro 2002^[36]
• E@I-5 - Rete Lerni – Bostono (Usono) – 19-a ĝis 26-a de aprilo 2003^[16][37] (Masaĉuseca Instituto de Teknologio)
• E@I-6 - Rete Interkulturumi – Sarajevo (Bosnio kaj Hercegovino) – 21-a ĝis 27-a de marto 2004^[38]
• E@I-7 - Ni sciigu aliajn pri ni – Partizánske (Slovakio) – 4-a ĝis 11-a de junio 2005^[39]
  (antaŭe planita por Sankt-Peterburgo en oktobro 2005 kun temo Rete Teknikumi)
• E@I-8 - Lingvoj en interreto – Brno (Ĉeĥio) – 4-a ĝis 12-a de novembro 2006

  Pli detalaj informoj troveblas en artikolo Somera Esperanto-Studado.

Ekde la jaro 2007 E@I ĉiujare aranĝas la renkontiĝon SES. En 2007 ĝi portis la titolon "Slava Esperanto-Studado", ekde 2008 ĝi estas nomata "Somera Esperanto-Studado".

  Pli detalaj informoj troveblas en artikolo Konferenco pri Aplikoj de Esperanto en Scienco kaj Tekniko.

En novembro de 2010 unuafoje sub gvido de E@I en Modra okazis la konferenco pri faka uzo de Esperanto KAEST, aranĝo kun tradicio en Ĉeĥoslovakio ekde 1978, kies organizadon E@I transprenis de KAVA-PECH. Ĝi estis senpere sekvita de unika komputillingvistika kolokvo, organizita de E@I kaj kunfinancita de IEI kaj ESF.

E@I kunorganizas aŭ alimaniere kontribuas al la kleriga programo de aliaj Esperanto-aranĝoj, ekzemple al la ĉiujara seminario Sabla Printempo okazanta en Ĉeĥio aŭ la Esperanta Vikimanio (okazinta en 2011 en Svitavy). Ankaŭ en la programo de la Universalaj Kongresoj de Esperanto laste aperas kontribuoj de E@I (propraj prelegoj dum la 93-a UK; propra salono dum la 94-a UK; du kontribuoj al la Kleriga lundo kaj organizo de la Terminologia forumo dum la 96-a UK).

  Pli detalaj informoj troveblas en artikolo Kategorio:Interretaj projektoj de E@I.

E@I kreis kaj funkciigas plurajn retpaĝarojn, kiuj rilatas al edukado en interreto kaj havas rilaton al Esperanto aŭ lingvoj ĝenerale. Pluraj el la retpaĝaroj estas konstante prizorgataj, kelkaj funkcias sen aktiva prizorgo, kaj kelkaj estis transdonitaj al aliaj organizoj. E@I ankaŭ kiel partnero subtenas personajn iniciatojn de siaj membroj, ekzemple per disponigo de rethotela loko.

• lernu! - [1]
• Slovake.eu - [2]
• Deutsch.info - [3]
• Mluvtecesky.net - [4]^{[rompita ligilo]}
• Tokipona.info - [5] Arkivigite je 2021-02-09 per la retarkivo Wayback Machine
• Lingvo.info - [6]
• Komputeko - [7]
• reta PIV - [8] (kunlabore kun SAT)
• Monda.eu - [9] Arkivigite je 2020-12-30 per la retarkivo Wayback Machine
• E@I-blogo - [10]
• Ridejo - [11] - retejo por ŝercoj en Esperanto
• Vikipediaj projektoj - (el Retarkivo 2013) (ekde 2013 kunlabore kun ELiSo)
• Artista Datenbazo - [12] (kunlabore kun EUROKKA)

• Lingva Prismo (malnova versio) - [13] Arkivigite je 2014-10-11 per la retarkivo Wayback Machine
• Aktuale.info - [14] Arkivigite je 2015-03-12 per la retarkivo Wayback Machine
• Nitobe-centro - [15] Arkivigite je 2008-07-08 per la retarkivo Wayback Machine
• Interkulturo - [16]
• Reta Informado-Centro (RIC) - [17] Arkivigite je 2010-12-30 per la retarkivo Wayback Machine
• Esperanto-aktuale - [18] Arkivigite je 2011-03-19 per la retarkivo Wayback Machine (lanĉo prokrastita)

• Edukado.net - [19] (en 2001^[7] starigita de E@I,^[40] nun mastrumata de Katalin Kováts)
• iama TEJO-paĝaro - [20] (arĥiva kopio, TEJO nun uzas novan paĝaron)

• Kantaro-Vikio - [21]
• Esperanto novosti - [22]
• Mozaiko - [23] Arkivigite je 2012-02-15 per la retarkivo Wayback Machine

  Pli detalaj informoj troveblas en artikolo Kategorio:Eldonaĵoj de E@I.

E@I efektivigas ankaŭ propran eldonan agadon, ofte pere de la eldonejo Espero aŭ kunlabore kun aliaj asocioj. Jen la listo de la libroj, kompaktdiskoj kaj DVD-j eldonitaj de E@I:

1. KD lernu! (2003)
2. libro Manlibro pri instruado de Esperanto (2005, kunlabore kun ILEI)
3. DVD Esperanto Elektronike (2006, 2011)
4. libro Vikipedio – praktika manlibro (2007, aŭtoro Yves Nevelsteen)
5. libro Komputeko (2008, aŭtoro Yves Nevelsteen)
6. KD Esperanto (2008, 400 000 ekzempleroj aperis en Gazeta Wyborcza antaŭ la 94-a UK)
7. libro Vikipedio por vi (2008, aŭtoro Ziko van Dijk)
8. DVD-video Esperanto estas... (2008, reĝisoro Rogener Pavinski)
9. broŝuro Malkovru Esperanton (2009, iniciatita de Hokan Lundberg)
10. libro Detala gramatiko de Esperanto (2010, aŭtoro Bertilo Wennergren)
11. libro Modernaj teknologioj por Esperanto (2011, prelegkolekto de la konferenco KAEST 2010)
12. libro Modernaj edukaj metodoj kaj teknologioj (2013, prelegkolekto de la konferenco KAEST 2012)
13. libro Arkivoj kaj bibliotekoj – kiel protekti kaj konservi nian heredaĵon (2015, prelegkolekto de la konferenco KAEST 2014)

Por kelkaj jaroj E@I preparis ankaŭ disdoneblajn kalendaretojn – enpoŝigeblajn kartojn kun sur unu flanko la demando “Esperanto?” kaj la respondo “www.lernu.net” kaj sur la dua flanko Esperanta kalendareto.

• Oficiala retejo
• Filmeta prezento de la oficejo de E@I okaze de la Virtuala Movada Foiro (ViMF), kiu okazis kadre de la Virtuala Kongreso de Esperanto en la somero de 2020.
• Parodia artikolo pri E@I en Neciklopedio
• (en) European Youth Foundation (Eŭropa Junulara Fonduso)