Balgach

Balgach situas en la Suba Rejnvalo inter Sankt-Margreto kaj Altstätten rekte sub la apencelaj montetoj. La orientan limon de Balgach formas la kanalo Rheintaler Binnenkanal, kiu akvigas kaj senakvigas la ebenaĵon inter la apencelaj montetoj kaj la Rejno. Sur la teritorio de la komunumo Balgach situas ankaŭ parto de la municipo Heerbrugg kaj precipe la Kastelo Heerbrugg. La komunumo limas en oriento al la apencelaj komunumoj Reute AI en Kantono Apencelo Interna kaj Oberegg AI en Kantono Apencelo Ekstera. Sudoriente ĝi limas al Rebstein, sudokcidente al Oberriet SG, okcidente al Diepoldsau kaj Widnau kaj norde al Berneck.

Per lokaj aŭtobusoj kaj poŝtaŭtobusoj Balgach estas konektita kun la stacidomo de Heerbrugg, kiu situas sur la teritorio de la najbara komunumo Au-Heerbrugg kaj Altstätten SG. Ankaŭ la nacia aŭtostrato A13 facile atingeblas.

Tradicie Balgach estis vinkultivada komunumo, kion ĝi restis ĝis hodiaŭ. Post la konstruo de la fervojo en la jaro 1958 en Heerbrugg estiĝis grava industria setlejo kaj ankaŭ en Balgach mem instaliĝis pli kaj pli da industrio. Tiel ekzemple la instrumentkonstruisto Leica Geosystems AG havas sian sidejon en Balgach.

La unua skriba mencio de Balgach datiĝas el dokumento de la jaro 890 aŭ 891 kiel Palgaa. La dokumento temas pri reĝa bieno. En la jaro 1347 la Libersinjoroj von Sax transdonis siajn voktrajrojn pri la bieno Balgach al la virina Abatejo Lindau. En la jaro 1510 la Monaĥejo Sankt-Galo akiris la regadon de Balgach. Ĝis la jaro 1798 Balgach estis parto de la kamparvoktejo Rejnvalo. En la jaro 1803 Balgach fariĝis memstara politika komunumo en la nove fondita Kantono Sankt-Galo.

• Trolebusa linio Altstätten-Berneck

• Oficiala retejo de la komunumo Balgach
• Balgach en la Historia Leksikono de Svislando