La 10-a Internacia Junulara Kongreso (IJK), tiam ankoraŭ nomata Internacia Junular-Kunveno, de TEJO okazis dum somero 1954 en la urbo Hilversum de Nederlando. La kongreson partoprenis nur 90 junaj esperantistoj - grandparte studentoj, lernejanoj kaj junaj laboristoj sub 30 jaroj. Kiel la tiama TEJO-bulteno La juna vivo indikas, la junulara Esperanto-movado tiujare troviĝis en krizo, kion respegulas la malgranda nombro de IJK-anoj en tiu kaj la antaŭa jaro. Tamen ankaŭ en la IJK de 1954, kiel en aliaj junularaj Esperanto-kongresoj, okazis variaj prelegoj kaj diskutrondoj pri la kongresa temo, kulturaj eventoj kaj organizaj kunvenoj de TEJO. Kaj abundis ekskursoj: Al Amsterdamo, Roterdamo kaj la registara urbo Hago, kie la kongresanoj interalie vizitis la miniaturan urbeton Madurodam, sed ankaŭ al la bordo de la Norda Maro en Scheveningen.
Nederlando
