Zitè metrupulitèna ed Bulåggna

La pruvénzia ed Bulåggna, a partîr dal 2015 zitè metrupulitèna ed Bulåggna, l é na pruvénzia dl'Emégglia-Rumâgna ed 1 017 806 abitànt.

La cunféṅna ed såura cun la pruvénzia ed Frèra, a matéṅna cun la pruvénzia ed Ravänna, ed såtta cun la Tuschèna (pruvénzia ed Fiuränza, pruvénzia ed Prè e pruvénzia ed Pistòja) e ed sîra cun la pruvénzia ed Môdna. Al sô cheplôg l é la zitè ed Bulåggna.

La pruvénzia ed Bulåggna la cunprànnd l'Emégglia ed matéṅna ed såura cun la żónta ed sèt cmóṅni cäli én geograficamänt int la Rumâgna: Båurg Tusgnàn, Caṡelfiumanaiṡ, Castèl dal Rî, Dåzza, Funtanàllṡ, Iómmla e Murdàn.

Al teritòri dla pruvénzia al s estànnd såura tótt int la bâsa e int äl culénn (la muntâgna la fà al 21,3% dla pruvénzia, int al istàss tänp al valåur ed mèż l é dal 25%).

I fiómm chi travêrsen al teritòri én al Raggn, al Sèvna, l Égg'^[1] e al Santêren. I turént pió impurtànt én al Samûż, al Satta, al Séller.

Int äl culénn as trûven dåu crésst ch'äl travêrsen äl vâl pió impurtanti: al Cuntrafôrt pliocênic e la Vänna dal żass. Interesant e bî da vadder én i calànc, däl furmazión culinèr ch'äl piôv àn scavè.

I setûr dl'economî pruvinzièl én: l'agricultûra (urtâg', furmänt - famåuṡa l é la patèta ed Bûdri), l arlîv (nénn e bû) e la céna e mêdia indósstria dî setûr mecânic, dal magnèr dla zerâmica e dl'eletrònica. An s pôl gnanc dscurdèr la Fîra 'd Bulåggna e la strutûra dl Interpôrt ed Bulåggna par carghèr e dscarghèr i quî. Ai é anc al pôrt ed Ravänna ch'l è dimónndi inpurtànt par la pruvénzia ed Bulåggna.

1. ↑ Luigi Lepri, Daniele Vitali - Dizionario Bolognese Italiano / Italiano-Bolognese - 2007 - Pendragon - Toponimi in dialetto bolognese - da pag 348 a pag 354 - ISBN 978-88-8342-594-3