Boris Johnson
|
C'l artìcul chè 'l è scrit in
Miranduléś |
Alexander Boris de Pfeffel Johnson, cgnusû méj cuma Boris Johnson (New York, 19 ad Śugn dal 1964) 'l è 'n pulìtig, stòrig e giurnalìsta ingléś nâ in di Stat Unî. Da 'l 24 ad Luj dal 2019 'l è dvintâ 'l prim minìstar dal Régn Unî.
Cuma espunènt dal partî cunservadōr 'l è stâ par dū mandâ sìndig ad Lóndra da 'l 4 ad Maǵ dal 2008 a 'l 9 ad Maǵ dal 2016. Dū méś dòp 'l è dvintâ minìstar par 'l èstar in dal guèran dla Theresa May. Al gh'à i cavìi rós.
Biugrafìa
Studióś dla stòria dla Róma antìga a Oxford e scritōr ad lìbar, Boris al taca a lauràr cuma giurnalìsta prima a The Times, ma i al càsan via p'r avér scrit 'n artìcul farlòc, e pò cuma curispundènt a Bruxelles p'r al The Daily Telegraph in du al dà adòs da spés a l'Ugnòṅ Européa. In séguit al s unìs a i cunservadōr vgnénd elèt deputâ in dal 2001 e in dal 2015.
In dal 2016, dand un daspiaśēr a la sò famìja[1], al taca na campàgna par dastacàr al Régn Unî da l'Ugnòṅ Européa in dal referendum par la Brexit miténd-as cónt'r a 'l prim minìstar dal sò partî David Cameron ch'invéci al gh vliva armàgnar dèntar. A séguit dal riśultâ negatìṿ dal vōt ch'l à vlû lò, Cameron al lasa la pulìtica ma a 'l sò pòst, quànd tut i pinsàvan ch'al fus ad Boris, a gh và la Theresa May.
Nòti
- ↑ Mesàǵ c'n al magòṅ a Johnson, 'l óm dla Brexit - Scurtlàda a 'l cōr, cuśa la gh diś sò surèla Libero, 27 ad Śugn dal 2016