Marcell Jacobs

Lamont Marcell Jacobs (El Paśo, 26 ad Setémbar dal 1994) 'l è 'n curidōr e saltadōr itagliàṅ, mdaja 'd òr in di 100 métar piàṅ a gl'ulimpìadi 'd Tokyo in dal 2021 c'n al tèmp ad 9"80, primâ européo, e in dla staféta 4x100 m (insém a Filippo Tortu, Eseosa Desalu e Lorenzo Patta), faghénd al rècord itagliàṅ cun 37"50, un sentéśum méj di britànic.

Jacobs 'l à vins anc i 60 métar piàṅ a i campiunâ européo 2021 a Toruń (Pulógna).

Al gh'à tri fiōi.

Marcell al nas in di Stat Unî in Tèxas. Sò màdar, l'itagliàna Viviana Masini, l'iva cgnusû sò pàd'r americàṅ méntar 'l éra in servìsi a la caśèrma militàra 'd Vicénsa. Dòp al trasferimènt ad chi lò in Curèa dal Sud, la còpia la s divìd e la dóna la decìd 'd andàr a star da par lē a Deśensàṅ su 'l Garda insém a 'l putèṅ ch'al gh'iva 'n an e mèś.

A déś an Jacobs al taca a impgnàr-'s in dl'atlética alśēra, faghénd cursa e salt in lung. In dal 2019 al s davśìna a cùr'r i sènt mét'r in déś secónd a Padva. Dū an dòp i rìv'n al sò primi mdaj 'd òr internasiunàli, prima a i campiunâ européo, in di ssanta métar indoor, e pò a i śōg ulìmpic in Giapòṅ quànd prima al gh la cava a ès'r al prim itagliàṅ in finàł, c'n al tèmp ad 9"84, e pò 'l è bòṅ ad bàtar tut in finàł.