Twm Morys

Twm Morys
Twm Morys yng Ngŵyl Werin y Smithsonian 2013
Ganwyd	1961  Rhydychen
Dinasyddiaeth	Cymru
Alma mater	Prifysgol Aberystwyth
Galwedigaeth	canwr, bardd
Tad	Jan Morris
Mam	Elizabeth Morris

Bardd a cherddor o Gymru yw Twm Morys (ganwyd Hydref 1961). Enillodd gadair Eisteddfod Genedlaethol Cymru Maldwyn a'r Gororau 2003 ym Meifod am yr awdl Drysau.

Ganwyd Morys yn Rhydychen, mae'n fab i'r awdures Jan Morris. Magwyd yn Llanystumdwy, a mynychodd Ysgol y Llan, ac yn saith oed aeth i Ysgol Fonedd yn Amwythig. Dychwelodd i Gymru i astudio Lefel A yn y Gymraeg yn Ysgol Gyfun Aberhonddu.^[1]

Graddiodd o Goleg Prifysgol Aberystwyth gyda gradd mewn Astudiaethau Celtaidd ac enillodd gadair yr Eisteddfod Ryng-Golegol. Wedi dechrau gwaith ymchwil ar Ganu Dychan Llyfr Coch Hergest, cafodd Morys swydd fel ymchwilydd gyda Radio Cymru, cyn dod yn glerwr. Symudodd i Lydaw yn ddiweddarach a bu yno am ddegawd.^[1] Bu hefyd yn ddarlithydd ym Mhrifysgol Rennes yn Llydaw.^[2]

Twm Morys oedd sylfaenydd y grŵp Bob Delyn a'r Ebillion, gyda'r gitarydd Gorwel Roberts. Bu'r gantores o Lydawes Nolwenn Korbell yn gyd-leisydd gydag ef am gyfnod.

Mae Morys wedi troi ei law at olygu barddoniaeth Cymraeg Canol. Golygodd waith Yr Ustus Llwyd (14g) mewn cyfrol yng Nghyfres Beirdd yr Uchelwyr (2007).

Twm Morys oedd Bardd Plant Cymru o 2009 hyd 2010.^[3] Cafodd ei olynu gan Dewi 'Pws' Morris.

Mae Morys yn olygydd cylchgrawn y Gymdeithas Gerdd Dafod, Barddas.

• Ofn Fy Het, Barddas (1995)
• Mymryn Bach o Hon (1998)
• 2, Cyhoeddiadau Barddas (2002)

• Grwyne Fawr, cyfres 'Y Man a’r Lle', Gwasg Gregynog (1998)

• Wales, the First Place, Random House (1982)
• A Machynlleth Triad, Penguin (1994)
• Ein Llyw Cyntaf, Gomer (2001)

Eginyn erthygl sydd uchod am Gymro neu Gymraes. Gallwch helpu Wicipedia drwy ychwanegu ato.