Corru

U corru (o cornu) hè un appendici osseu, o d'altru matiriali, chì ni sò dutati monda animali, è chì assumi parichji funzioni.

I spezii dutati di corra ni ani guasgi sempri un paghju postu nantu à u capu, in a parti fruntali. Certi sò di solidu ossu, inveci altri, com'è quiddi di u rinuciaronti, sò fatti di cheratina, listessa sustanza ch'è i capiddi. Nonustanti quissa sò rubustissimi.

In guasgi tutti l'animali i corra ani una funzioni cumunicativa intraspecifica. I corra sò infatti usati in u duminiu di i lotti chì succedini trà individui di listessa spezia par ditarminà a ierarchia suciali trà i dui cumbattenti. À spissu soli l'individui di sessu maschili sò pruvvisti di corra è quissa diventa tandu un carattaru sissuali, chì hè analizatu da i femini in u mumentu in u quali volini scedda si un cumpagnu. Accadi à spissu ch'è l'incurratura fussi menu sviluppata ind'ì i femini ch'è ind'ì i masci, com'idda accadi pà a muvra. I corra poni dinò essa imprudati à scopu difensivu, com'è ind'ì u cervu.

In parichji animali, com'è a capra di muntagna, i corra sò curti è rivolti in davanti.

In i caprini, è in i stambecchi in particulari, i corra sò spissu ritorti à daretu è prisentani parichji solca.

In i cervidi i corra poni essa ramificati. I corra di i cervidi sò ditti palchi è i pussedini solu i masci, incù l'eccezzioni di a renna (Rangifer tarandus). Frà i Cervidi, i corra più spiciali è impunenti sò quiddi di l'alci, chì sò monda sviluppati è poni suparà u metru di larghezza.

Frà i buvidi, i gazeddi sò dutati di corra chjuchi è appuntiti, rivolti in altu, mentri i bufala ani corra maiori è incurvati. I buvini dumestichi sò spissu dutati di corra, chì i so formi è diminsioni poni varià sicondu a razza. Ancu parichji insetti, com'è u maldipedi (bufonu rinuceronti), sò dutati di corra.

Frà l'animali preistorichi si pò ricurdà un antinatu di i cervidi, u megaceru, vicutu in u Pleistoceni, chì aia i corra chì l'apartura suparaia i 3 metri. À l'ebbica di i dinusauri i più cunnisciuti rettili dutati di corra erani i ceratopsidi, frà i quali sò famosi u Triceratops, u Torosaurus, u Styracosaurus.