A Citatella di Bastia

 

A citatella di Bastia hè fundata à u XIVu seculu da i Ghjenuvesi. Tandu, a capitale di a Corsica hè Biguglia, induv'ellu stanu i guvernatori. Ma i Ghjenuvesi cunsideranu chì u locu hè pocu siguru. Hè cusì chì in u 1380 u guvernatore Leonello Lomellini decide a custruzzione d'una furtificazione nova, chjamata Fortino o Castello della Bastìa.

Hè sta prima torre chì diventerà u sìmbulu di a cità. Oghje ùn esiste più. Si truvava induv'ellu ci hè u bastione San Gerolamo, vale à dì sopr'à u giardinu Romieu.

Sta torra figura sempre avà cum'è stemma di Bastia^[1].

In u 1475, un ghjenuvese, Antonio Tagliacarne face custruisce una vintina di case. Hè cusì ch'ellu nasce u quartieru di Terra Nova, oppostu à Terra Vechja, chì currisponde à u quartieru di U Vechju Portu, chjamatu prima Portu Cardu. Diventerà u primu podestà di Bastia.

 

Durante i seculi, cù e guerre trà Corsi, Francesi è Ghjenuvesi, e muraglie di a cità sò sempre distrutte è ricustruite, è furtificazione nove sò create : u Palazzu di i Guvernatori, differenti bastioni (bastione San Giovanni, bastione San Carlo, bastione Santa Maria).^[2][3]

 

Di a prima furtificazione di a Citatella, in talianu Castello della Bastia o dinù Fortino ùn ferma più nunda. Era situatu in locu è piazza di u bastione San Carlu, sopr'à u giardinu Romieu.

U bastimentu attuale di u Palazzu di i Guvernatori hè statu custruitu à partesi da u 1448 è finitu in u primu quartu di u XVIu seculu^[4].

U palazzu ghjova di locu di residenza principale pè i guvernatori da a fine di u seculu XV sin'à a fine di a duminazione ghjenuvese, à u XVIIIu seculu. Ghjuvava dinù di locu di ghjustizia è di prigiò.

Cù a duminazione francese, ghjuvava di caserna pè l'armata. Tandu hà pigliatu u nome di Caserne Watrin.

Diventa un museu in u 1908. Durante a seconda guerra mundiale, l'Alemani feranu saltà i lochi nanzu di parte è certi bastimenti distrutti. In u 1952, u Statu hà datu stu locu à a municipalità di Bastia.

• U Palazzu di i Guvernatori
•  
•  
•  

 

U Palazzu di i Nobili Dodeci hè statu creatu versu u 1703. Era un'istituzione riservata à i Corsi, è sopr'à tuttu à e grande famiglie corse. I dodeci cunsiglieri eranu eletti per dui anni. Avianu cum'è funzione d'aiutà u guvernatore. Ponu esse cunsiderati cum'è i deputati di e pieve. Cù a duminazione francese u bastimentu hè ricuperatu da l'armata chì ci mette i so scagni. Oghje sò quelli di u serviziu di u patrimoniu di a municipalità di Bastia.

Si trova Piazza di Corte, chjamata in francese Place du Donjon.

U corpu di guardia hè u bastimente militare chì hè à l'entrata di a citatella, sopr'à a porta d'entrata. Ci stavanu i suldati. Hè statu custruitu à u XVIu seculu, à l'epuca ghjenuvese, è dopu hè statu mudificatu à l'epuca francese. Ci sò stati travagli di rinnuvazione in u 2021^[5].

 

E muraglie e più antiche sò state edificate à u XVu seculu. Cù e guerre è e destruzzione successive, sò state fatte è rifatte parechje volte, trà 1575 è 1626.

• E muraglie di a Citatella
•  
•  
•  

Si francanu duie porte per entre in Citatella. L'entrata si face si trova corsu Favale. A prima hè chjamata Porte Louis XVI. A porta hè stata cumplettamente rifatta in u 1775. U locu si chjama "E Loghje". Si pò vede una petra cù u stemma (in gattivu statu) di a cità di Ghjenuva (dui griffoni) sopr'à una di ste porte.

 

 

Si pò vede una petra in gattivu statu cù u stemma di a Republica di Ghjenuva sopr'à una di ste porte. S'induvinanu dui grifoni è una curona.

 

 

In u 1570, a sede di u viscuvatu di Mariana hè trasferitu in Bastia. A catedrale Santa Maria hè stata custruita nant'à u locu d'una chjesa più antica, chjamata Santa Maria della Consolazione. Era appughjata nant'à un scogliu, è hè per quessa ch'ella chjamata dinù Santa Maria l'Arrembata.

I travagli principianu in u 1604 è duranu quindeci anni.

A chjesa hè di stile baroccu. A facciata principale, rifatta à u seculu XIX hè di stile neoclassicu. Ci sò trè nave. I decori barocchi sò ricchi assai.

 

L'organi sò di u XIXu sò stati fatti da i fratelli Serassi, di Bergamu.
U campanile hè statu custruitu in u 1620.

A catedrale hè stata classata monumentu storicu in u 1999.

I guatri i più belli sò quelli di l'ultima cena (XVIu seculu) è Santa Maria Assunta (di Leonoro d'Aquila, 1512). L'altare hè fattu di serpentina di u Bivincu.

 

Ci si pò vede dinù una statua d'argentu di a Madonna, fatta à u XIXu. Hè l'opera d'un artistu di Siena à u XIXu seculu, Gaetano Macchi. Hè stata fatta grazia à i doni di i Bastiacci. Hè purtata in prucessione ogni quindeci d'agostu pè i carrughji di a cità.

 

A cuntraterna di Santa Croce hè a più antica di a cità. A so origine ricolla à u principiu di u seculu XV. Hè ella chì face custruisce l'oratoriu in u 1542, nant'à u terrenu chì appartene à a Basilica rumana di San Giovanni in Laterano.

L'edifiziu attuale hè statu custruitu in u 1600.

U riccu decoru ch'ellu si pò vede nentru hè di stile barocchetto.

•  
  L'entrata sud
•  
  L'entrata nord
•  
  A corte
•  
  A catedra
•  
  A cappella di u Cristu Negru

À l'orìgine hè una casa di a famiglia Tagliacarne. Antonio Tagliacarne hè originariu di Lèvanto in Ligùria. In u 1480 dumanda l'autorizazione à a Republica di Ghjenuva di custruisce unepoche di case in citatella. Diventerà u primu podestà di Bastia, da u 1488 à u 1498.

Si chjama "A Casetta" per via di a taglia di u bastimentu. À l'iniziu era più chjuca, dopu sò stati aghjustati parechji piani. Durante l'epica ghjenuvese, A Casetta ghjova di merrìa. Hè quì ch'ella s'addunisce a "Magnifica Comunità della Bastia", l'equivalente di u cunsigliu municipale.

 

À l'origine hè a casa di u vicariu di u guvernatore ghjenuvese. Era dinù a corte di ghjustizia. Hà datu u so nome à u locu : Piazza di Corte. U vicariu era u segondu persunagiu u più impurtante di l'amministrazione ghjenuvese. A casa hè stata custruita da u 1490 à u 1495. Una volta chì u vicariatu hè statu trasferitu in u Palazzu di i Guvernatori, a casa hè diventata pruprietà di a famiglia Centurione. Paulu Zerbi (1582-1635) chì era podestà, a cumprò più tardi. A cullerà d'un pianu è a furtificò. Aghjustò una torra, una cisterna. Da tandu hè cunnisciuta sott'à u nome di "Casa Zerbi".

 

In u 1570 u viscuvatu di Mariana hè trasferitu in Bastia. In u 1660, u vescu Monsignore Giustiniani compra stu palazzu chì appartenia à e sore di e Turchine. Ingranda è imbellisce u cunventu. Oghje si pò vede solu a facciata, i carrughji sò stati tuppati. Si cuntavanu 32 pezze.

A facciata era decurata. C'era un fruntone di màrmeru cun l'arme di a famiglia Giustiniani. Ma hè statu rottu à a Revuluzione. Si pò vede à u museu di Bastia.

Dopu à a rivuluzione, u palazzu hè abbandunatu. Serà ricuperatu da l'armata chì ne ferà scagni.

 

Si pò sempre vede una di e forche di a citatella induv'elli eranu impiccati i cundannati à morte. Si trova vicinu di a porta d'entrata, sopr'à e butteghe corsu Favale.

 

I Ghjenuvesi anu custruitu e prime furtificazione di a citatella in u 1480. Dopu sò stati rifatti parechje volte, trà u 1575 è u 1626. I rampalli sò stati classificati munumenti storichi in u 1935^[6]. Si cuntava sei bastioni : U bastione San Ghjuvanni, U bastione Santa Maria, U bastione San Carlu, U Chjostru, U Tragone, U bastione San Gerolamo.

 

Hè u principale bastione di a citatella. Hè statu ricustruitu cumplettamente in l'anni 1575-1576.

 

Hè situatu da u cantu levante è sud. Hè statu cumplettamente rifattu in u 1596.

 

 

Rifattu in u 1596. Porta u nome di San Carlu per via d'una cappella dedicata à San Carlu chì era situata sott'à u bastione, induve ci hè oghje u giardinu Romieu. Sta cappella hè stata distrutta.

 

Hè situatu da u latu di u Vechju Portu.

 

Hè u bastione chì hè situatu da u latu sud. U bastimentu situatu nentru à U Chjostru era a pulverera.

 

 

Hè u bastione chì supraneghja u Vechju Portu, sopr'à u molu chì porta anch'ellu u nome di Molu di u Tragone. Dop'à a cunquista francese "U Tragone" hè diventatu "Le Dragon".

 

U caminu di ronda era u caminu di surveglianza di a citatella, chì face u giru di e muraglie.

•  
  Una garitta di u bastione San Ghjuvanni
•  
  Longu à u bastione San Ghjuvanni
•  
  Longu à u bastione San Ghjuvanni
•  
  À u sud, trà u bastione Santa Maria è u Chjostru

In u 2010 a municipalità di Bastia principia à stabilisce una tupunimia bislingua corsu è francese pè i carrughji di a citatella^[7]. I nomi antichi sò ristabiliti. Per esempiu :

• A Pulverera (La Poudrière)
• U Giardinè (Place Guasco)
• Piazza di Corte (Place du Donjon)
• Carrughju di A Chjappa (rue Saint-Michel)
• Stretta di Calabraghe (rue de l'Esplanade)
• Carrughju di a frutta (rue de la paroisse)
• U Tragone (rue du Dragon)
• E Loghje

 

• Bastia
• A Catedrale Santa Maria
• Santa Croce
• San Carlu
• San Ghjuvà
• A Cuncezziò
• San Roccu

1. ↑ Copia di archiviu [archiviu 2022-02-06; Ritruvatu 2022-02-06].
2. ↑ Almanach Bastiais, Tradizione viva di Bastia è di u so circondu, Comité des fêtes de de l'animation du patrimoine de Bastia (2007)
3. ↑ Bastia : le guide, dirigé par Jean-Baptiste Raffalli, Michel-Édouard Nigaglioni, Éditions Du Patrimoine, 2003
4. ↑ http://tice-corse.fr/educorsica/index.php/recherche/226-bastia-u-palazzu-di-i-guvernatori
5. ↑ https://www.corsematin.com/articles/le-corps-de-garde-de-la-citadelle-de-bastia-va-rajeunir-de-deux-siecles-121791
6. ↑ https://www.pop.culture.gouv.fr/notice/merimee//PA00099158
7. ↑ Copia di archiviu [archiviu 2020-02-04; Ritruvatu 2020-02-04].

• U Palazzu di i Guvernatori, video di u Scéren-CRDP, 2010
• Scopre Bastia à l'epica ghjenuvese, librettu di a merrìa di Bastia