KfW

KfW
Тып	Установа публічнага права
Год заснавання	1948
Размяшчэнне	Франкфурт-на-Майне, Германія
Актывы	€511,6 млрд (2012, група)
Чысты прыбытак	€2.384 млн (2012, група)
Колькасць супрацоўнікаў	5.190 чалавек (2012, група)
Аўдытар	KPMG
Сайт	http://www.kfw.de

KfW — нямецкі дзяржаўны банк, размешчаны ў Франкфурце-на-Майне. Назва з'яўляецца скарачэннем ад Kreditanstalt für Wiederaufbau (у даслоўным перакладзе Крэдытная ўстанова для аднаўлення). У 2012 годзе KfW з'яўляўся трэцім па велічыні актываў нямецкім банкам.

Банк быў заснаваны ў снежні 1948 года з мэтай фінансавання аднаўлення эканомікі Германіі. Першапачатковае фінансаванне адбывалась у асноўным са сродкаў Праграмы аднаўлення Еўропы (у прастамоўі «план Маршала»). У 50-х гадах асноўным кірункам дзейнасці было спрыянне дзейнасці кампаній сярэдняй велічыні (mittelständische Unternehmen). У 1961 годзе KfW атрымала таксама задачу наладжвання фінансавага супрацоўніцтва ФРГ з развіваючыміся краінамі. Сёння асноўнымі напрамкамі дзейнасці з'яўляюцца:

• Спрыянне інвестыцыям грамадзян, камунальных прадпрыемстваў і дзяржаўных устаноў праз крэдытаванне на выгадных умовах (напрыклад крэдыты на адукацыю, будаўніцтва жылля).
• Экспартнае і праектнае фінансаванне (у асноўным праз дачэрнюю кампанію IPEX-Bank).
• Фінансаванне праектаў у развіваючыхся краінах, арыентаваных на барацьбу з галечай, эканамічнае развіццё, належнае кіраванне, паляпшэнне адукацыі, ахову здароўя і навакольнага асяроддзя.
• Спецыяльныя задачы (напрыклад прыватызацыя нямецкіх дзяржаўных прадпрыемстваў)

Федэральнаму ўраду Германіі належыць 80%, а федэральным землям Германіі - 20% капіталу банка. Дзяржава нясе адказнасць за ўсе даўгі і крэдыты KfW. Дадзеная гарантыя замацаваная ў Законе аб KfW. У міжнародных рэйтынгавых агенцтваў KfW мае найлепшы крэдытны рэйтынг (AAA).

Галоўнымі органамі банка з'яўляюцца праўленне (Vorstand) і наглядальны савет (Verwaltungsrat). Старшыня праўлення — Ульрых Шродэр (Ulrich Schröder). Наглядальны савет кантралюе і кансультуе праўленне па пытаннях кіравання KfW. Ён складаецца з 37 прадстаўнікоў палітычных партый і дзелавых колаў. Старшыня наглядальнага савета — міністр фінансаў Германіі Вольфганг Шойбле (Wolfgang Schäuble).

• http://www.kfw.de/ — Афіцыйны сайт KfW
• Гадавая фінансавая справаздача банка(недаступная спасылка) (англ.)