Schmoiznudl

A Schmoiznudl, aa Auszogne, Fensda-Kiache, Nockade, Kiachl, Bauankrapfa, gnennd, is a Gebäck aus am Geamdoag, des wo in hoassm Fett aussabocha wead (schaug: Schmoizbeckarei).

A Schmoiznudl is im Prinzip wiara siaßa Geamdoag fian Krapfa, blos wead dea Doag iwam siadadn Fett iwan Handruckn zua na flochn, dellafeamign Scheim zong, wobei da aissane Rond wesntli dicka bleim soit wia des Innare. Nochm Bocha, eingdle eha "frittian", soit dea Doag ringsrum schee hejbraun und locka afgonga sei und in da Middn a gonz an dinne Scheim vo an reschn Doag sei, de wo aa vo da Foab hea vui hella is wia da Ring aussnrum.

Schmoiznudln hoaßns, weis friacha imma in Schmoiz aussabocha worn san.

Je feina des Fett im Gschmoch is, desto bessa schmeckt so a Schmoiznudl. Wichtig on am Fett zum Aussabocha vo Gebäck is zum ondan aa no, wia hoass doss wead, ohne vabrennd zum Schmecka. Deszweng wean Schmoiznudln heidzdog vo de Beck fost nia ned mid am echtn Schmoiz bacha, sondan mid am neitraj schmeckadn Ej oda ana Pflanznfettn.

De Schmoiznudl is duach iahn moast recht houchn Fettghoit und weis fost imma mid Zugga ogricht wead, a recht noahrhofte Speis. Se is in Bayern a recht beliabte Zwischnmoihzeid im Biagoartn oda fia untawegs.

In Noadbayern gibds "katholische" und "evangelische" Kejchla, de wous bacha hom. De katholischn Kejchla san rund, aussn homs an dickn Rond, inna sans gonz dinn, de evangelischn san viaeckad, gwejbt und inwende hoi.