Oidgriachisch

Oidgriachisch (dt.: Altgriechisch, Sejbstbezeichnung: : ἣ Ἑλληνικὴ γλῶσσα; hē Hellēnikē glōssa; boar.: „de griachische Sproch“) is de antike Version vo da griachischn Sproch. Des is a indogermanische Sproch, wo haptsechli im Ostn van Middlmeeagebiet gredd worn is.

Unta "Oidgriachisch" wean vaschiedane Sprochversiona und Dialekte zammgfossd, wo voa oim zwischn da Eihfiahrung vo da griachischn Schrift (eppa 800 v. Kr.) bis zan Ofong vo da hellenistischn Era (eppa 300 v. Kr.) vawendd worn is. In da Literatua is s Oidgriachische owa bis zan End vo da Antike (uma 600 n. Kr.) gnuzd worn. Ois Quasi-Standard fia's Oidgriachische guid da attische Dialekt van 5. und 4. Joarhundad v. Kr., oisdonn de Sproch van Sophokles, Platon und Demosthenes. De Sprochstuaf zwischn eppa 600 und 1453 (Eaobarung vo Konstantinopel duach de Osmanen) wead ois Middlgriachisch oda Byzantischs Griachisch bezeichnd, oschliassnd redd ma van Neigriachisch, da Stootssproch van heiting Griachaland.