1Eyn n vierhundertachtzigstn Jaar naach n Auszug von de Isryheeler aus Güptn, in n viertn Jaar von n Salman seiner Herrschaft über Isryheel, in n Maanet Sif, also in n zwaittn Maanet, fieng yr an, yn n Herrn seinn Templ z baun. 2Dös Haus, wo dyr Salman für n Trechtein gabaut, war dreissg Elln lang, zöne brait und fuchzöne hooh. 3Dyr Vorschopf vor n Templ war zöhen Elln lang, netty so lang wie dyr Templ brait. Brait war yr fümf Elln. 4Er gmacht für s Haus Fenster mit Ramen und Öter.

5Eyn d Wöndd von n Haus anhin, von n Haauptgadn und Hintergadn, glögt yr rund umydum aynn Anbau mit Kammern. 6S Erdgschoß dyrvon war zwaiaynhalb Elln brait, dyr eerste Stok drei Elln und dyr ober dreiaynhalb. D Aussnmauer von n Haus hiet yr abgstuefft, däß yr s dyrnaach nit nonmaal anbecken mueß.

7Bei n Bau wurdnd grad Stäin hergnummen, die wo schoon eyn n Stainbruch förtig zueghaut wurdnd. Drum warnd bei n Bau kaine Hämmer, Maissln older anderne Eisnwerchzeuger zo n Hoern.

8De Tür zo de heruntern Kammern war auf dyr Sunderseitt von n Haus. Über Stiegnen stig myn zo n mittern Gadm und weiter eyn n obern aufhin. 9Wie yr mit n Mauern förtig war, gabaut yr s Dach mit Rafenn, Traeum und Bröter aus Zödernholz. 10Die Gäng um s Haus umher warnd in aynn iedn Gadm zwaiaynhalb Elln hooh, und sö warnd mit zöderne Traeum mit n Haus verbunddn.

11Yn n Herrn sein Wort ergieng an n Salman: 12"Du baust also ietz önn Templ. Wennst auf meine Geboter lustertst, meine Satzungen achtst und alle meine Weisungen ausfüerst und naach ien löbst, naacherd gaa i an dir dös Wort waar machen, wo i zo deinn Vatern Dafet gsprochen haan. 13Und i gaa mittn unter de Isryheeler wonen und mein Volk Isryheel nit verlaassn."

14Yso gvollenddt dyr Salman önn Bau von n Templ.

15Er gatäferlt n einwendig mit Zödernholz von n Bodm hinst eyn d Rafenn aufhin. Auf n Bodm gverlögt yr Züpfernplankenn. 16Zöhen Elln herverder dyr Ruggwand zog yr von n Bodm hinst eyn n Dachstuel aufhin ayn zöderne Wand ein und gatrennt dyrmit de Gotswonung ab, s Allerheiligste. 17Zwaizg Elln lang war dyr Haauptgadn herverderhalb lang. 18Einwendig war s Haus zöderen verklaidt mit einhingschnitzte Bluemengwinder und Blüe'nrancknen. Allss war aus Zödernholz; daa war kain Stain zo n Seghn. 19Er grichtt dös innerne Heiligtuem ein, daa wo yr önn Bundesschrein von n Trechtein aufstölln gwill. 20Dö Wonung war zöhen Elln lang, zöne brait und zöhe hooh; und dyr Salman überzog allss mit scheiern Gold. Aau ließ yr aynn Altter aus Zödernholz herstölln. 21S Haus ließ yr einwendig mit scheiern Gold ausklaidn und vor dyr Gotswonung golderne Kötnen hinmachen. 22Yso überzog yr dös gantze Haus vollstöndig mit Gold und önn Altter von dyr Gotswonung gleichfalls.

23Für de Gotswonung ließ yr zween Kerebn aus Lifnholz anförtignen mit fümf Elln Hoeh. 24Zwaiaynhalb Elln maaß dyr aine Flügl von aynn Kerebn und dyr ander aau. Von ainn Flüglend hinst eyn dös ander hiet yr also fümf Elln. 25Dyr zwaitte Kereb hiet de gleichn Maesser und de gleiche Gstaltt. 26Fümf Elln warnd also all Zween hooh. 27Er gstöllt de Kerebn mittn eyn n innerstn Gadn einhin. Ienerne Flügln warnd yso ausgspannt, däß ayn ieder auf ainer Seitt eyn d Wand anhingaglangt und däß s mit n andern End in dyr Mitt von n Gadn zammkaamend. 28Aau de Kerebn ließ yr mit vergolddn.

29An allsand Wöndd von n Haus, in n hintern wie herverdern Gadn, ließ dyr Salman rund umydum Kerebn, Palmenn und Blüe'nrancknen einhinschnitzn. 30Aau de Bödm von n hintern und herverdern Gadn ließ yr mit Gold auslögn.

31Für n Eingang zo dyr Gotswonung ließ yr liferne Türflügln anförtignen. De Gibltraeum und Seittnpfostn gabilddnd ayn Fümfögg. 32Eyn die lifern Türflügln ließ yr Kerebn, Palmenn und Bluemenwerch einhinschnitzn und s Schnitzwerch vergolddn.

33Aau für n Eingang zo n Haauptgadn ließ yr aynn lifern Türstok herrichtn, der wo ayn Vierögg dargstöllt, 34weiters zween Türflügln aus Züpfernholz, die wo mit ie zwo Angln angmacht warnd. 35Er ließ auf ien Kerebn, Palmenn und Bluemenwerch einschnitzn und auf s Gschnitz ayn Blatgold auflögn.

36Er glögt önn innern Hof an mit drei Laagn Haustäin und ainer Laag zöderne Traeum.

37Eyn n viertn Jaar eyn n Maanet Sif war s Grundföst für n Herrn seinn Templ glögt wordn; 38und eyn n ainlyftn in n Maanet Bul, also eyn n achtn, wurd dyr Templ mit alln Drum und Dran förtig, netty yso, wie yr blicht war. Sibn Jaar hiet myn also dran hinbaut.