Kamahalan

Senakulo sa Magarao, Camarines Sur (2010)

Prusisyon sa hapon na Biyernes Santo (Naga City(2010)

An Kamahalan o Semana Santa (Latin: Hebdomas Sancta or Hebdomas Maior, "Greater Week"; Greyigo: Ἁγία καὶ Μεγάλη Ἑβδομάς, Hagia kai Megale Hebdomas) iyo an taontaon na pagroromdom kan mga Kristyano kan pagsakit, pagkagadan asin pagkabuhay-liwat ni Hesukristo Nasareno. Minapoon ini nin Domingo de Ramos asin natapos sa Domingong Pasko nin Pagkabuhay-liwat.

Sa semanang ini sinusunod an paglelehe, an pag-abstenensya asin an hararom na pagpapangadyì, pagsosolsol kan mga Kristyano sa saindang mga pagkakasalà. Kinaugalian kan mga Katoliko na magtiripon sa simbahan, magkumpisal asin mag-Via Crucis, o mag-Bisita Altares. Digdi sa Filipinas uso, alagad pawara na, an gawì na magpa-Pasyon na iyo ini an sarong semana na ikinakanta na pano nin paglogologo an istorya kan enterong buhay ni Hesus. Pag-Biyernes Santo may nagkukulto arog kan pagpàsan nin krus o minapapako na tunay sa krus sa makuring pakikidumamay sa inagihan na sakit ni Hesukristo asin sa paghagad nin kapatawaran sa mga kasàlan. Sa ibang mga banwaan ginigibo an Senakulo, sarong pagsa-drama kan pagpasakit ki Hesus kun saen an sarong deboto napagakot sa itinindog na krus. Sa aldaw man na ini, gawì na gayo sa Filipinas, urog na kan mga Katoliko, na iprusisyon an mga rebultong nagpapahiling kan agi-agi ni Hesus sa huring aldaw kan siya pinasakitan asta pinako sa krus. Pagkabanggi isinusunod an inaapod na Soledad sa palibot kan sentro kun sain sa mga estasyon may pagpangadyì, may pagkantang maludok asin mapùngaw sa pagladawan kan paglogologo ni Santa Maria sa pagkawara kan saiyang Aki na si Hesus.

Pag'ataman kan mga rebulto

An pag'aataman kan rebulto sarong pagdebosyon asin pangako, asin uso igdi sa Filipinas na an mga pamilyang prominente iyo an na'asikaso asin nagsasaray kan mga rebulto sa taon-taon asin iyo an naggasto sa pagsamno kaini. Sarong tradisyon an pagpamana kan rebulto sa laog kan pamilya.

Igdi sa syudad nin Naga, sa Arkidioseses nin Caceres, ini an mga pamilyang may mga ataman nin rebulto: an pamilya Delloro (Paghampak asin pagputong tunok ki Hesus, pamilya Fidel Cu (Pagpa'san kan krus), pamilya Guazon (Pagsabat ki Hesus kan saiyang Ina), pamilya Boncodin (Pagpahid ni Veronica sa pandok ni Hesus), pamilya de la Cruz (Pagpa'san kan Krus), pamilya Magtoto (Hesus ipinako sa Krus), pamilya Cosay (San Jose nin Arimatea), pamilya Cepriaso (Hesus sakolo ni Santa Maria), pamilya Ragragio (Pieta), pamilya Claros (Mater dolorosa), pamilya Fuentebella (Mater Dolorosa), pamilya Monson (Paghulid ki Hesus sa lolobngan), pamilya Cecilio (Juan Evangelista), pamilya Rentoy (Santa Marta), pamilya Guiriba (Maria Magdalena), pamilya Primo (Maria Salome), pamilya Jimenez (Agonia ni Hesus hardin nin Getsemani), pamilya Imperial (Tres Marias), pamilya Morano (Pagsaluib ki Hesus ni Hudas), pamilya ni Miguel Perez (Pagsayuma ni San Pedro).