Bob Marley

Si Robert Nesta "Bob" Marley, OM (6 Pebrero 1945 – 11 Mayo 1981) sarong bantogan na Jamaicanong parakanta, musikero, kompositor asin gitarista. Kan panahon niya siya nagkamit nin labilabing kabantogan asin pag'omaw gibo kan istilo nin saiyang pagkanta.

Nagpoon siya kan taon 1963 sa grupong The Wailers na nagustohan na gayo kan mga paradangog sa bilog na kinaban.^[1][2] An grupo niya nagpaluwas nin mga plakang reggae kaantabay an prodyuser na si Lee Scratch Perry. Kan an grupong ini nagrilitikan kan taon 1974, si Marley nagsolong karera na, nagresulta sa pagpaluwas kan saiyang album na Exodus taon 1977 na iyo an nagkorona saiya kan reputasyon bilang saro sa pinakamabentang artista sa bilog na kinaban, na naghakot nin bentang 75 milyon na rekord.^[3] Huli ta siya sarong posikit na Rastafari, an saiyang musika may timbre nin espiritualidad.^[4] Siya bantog sa mga kantang reggae.