Sufraxu universal

El sufraxu universal consiste na dotación del drechu a votu a tola población adulto d'un Estáu independientemente de la so casta, sexu, creyencies o condición social.

El llogro del sufraxu universal tiense dao a partir d'una evolución na democracia. Tres de la Revolución Francesa el poder políticu entamó a tar en manes de cámares de representantes polo que se facía necesario regular el so sistema d'eleición. Asina entamóse col sufraxu censitariu nel que namái votaben los homes que tuvieren una riestra de requisitos de nivel d'instrucción, de renta y de clas social; pasando pel sufraxu masculín (segunda metá del sieglu XIX), nel que podíen votar tolos homes que supieran lleer y escribir, Hasta la inclusión del sufraxu femenín (sieglu XX n'alantre), analfabetu (sieglu XX) y xente de toles tribes (segunda metá del sieglu XX).