Las Hurdes

 

Trátase d'un tarrén montañosu de clima mediterraneu con influencia atlántica. Llenda cola Sierra de Gata, les Tierres de Granadilla y la Sierra de Francia (Salamanca). Forma parte de la llamada "España húmeda".

Siete ríos pasen pelos sos valles: el ríu Malo o Ladrillar, el ríu Batuecas, el Hurdano, el Malvellido, Esperabán, Ovejuela y el ríu de Los Ángeles.

Como nes más de les comarques del nordeste de la provincia de Cáceres, Las Hurdes conserva tola so herencia cultural asturlleonesa, siendo el rasgu más carauterísticu'l dialeutu altoestremeñu, con influencies del asturianu.

Tamién tien un calter especial l'Antroxu Jurdanu con seres fantásticos como'l burru antrueju, el machu lanú, l'obispu jurdanu, los mozus del guinaldu, etc, xunto a un ricu folklor, l'arquiteutura vernácula y la naturaleza nel espertar de la primavera. La participación de tol pueblu resúmese col dichu Quien no se encarantoña no comi de la olla.^[4]

 

En munches de les alqueríes pue atopase entá bones muestres de les cases hurdanes construyíes dafechu con piedra de pizarra y cubiertes con lloses de pizarra. Estes viviendes tán emparentaes cola palloza del noroeste ibéricu. El so orixe ye prerromanu, quiciás celta con semeyances nes edificaciones de la cultura castreña.^[5]. Muncha xente puxa pola conservación d'estes construcciones tan carauterístiques y nun se destruyan y que sían declaraos nucleos antiguos como Bien d'Interés Cultural.^[6]

Históricamente foi una comarca aisllada del so entornu y de difíciles condiciones econímiques pa los sos habitantes, pero básase nel autoabastecimientu al traviés de pequeños cultivos de varios tipos. La población distribúise en pequeños pueblos de 100 a 400 habitantes y en dalgunes alqueríes. La economía tradicional de LAs Hurdes basóse en productos naturales del llugar: miel, olivar, patates, cereales, corchu, carbón de brezu, etc. Na actualidá, la economía comarcal meyoró enforma. El turismu rural ta cobrando cada vez más importancia.