Javier de Burgos

De familia noble pero non rica, el so destín paecía tar venceyáu a la carrera eclesiástica, pero dexó bien céu los sos estudios relixosos en Granada y treslladóse a Madrid pa estudiar Derechu. Demientres la invasión napoleónica pasó al serviciu de los franceses, ocupando dellos cargos públicos n'Andalucía. Al colar los franceses en 1812 marchó con ellos pa París; ellí completó la so formación col estudiu de la obra de los clásicos, especialmente d'Horaciu, que tornaría les obres de so al castellanu. Esta traducción foi comentada un tiempu dempués por Andrés Bello nún artículu de prensa perfamosu, nel que lu califica como «débil traductor y excelente comentarista de Horacio»^[4]. Javier de Burgos espublizó en 1844 una revisión de la so propia torna que, magar les sos imperfecciones, sigue siendo entá un referente por coses como l'acertáu usu de la estrofa sáfica en versos sueltos.

Regresó a Madrid en 1819 y en 1822 fue nombrado direutor de El Imparcial, periódicu nel que s'agrupaben los afrancesaos que defendíen les nueves idees lliberales. El so llabor como periodista foi simultáneu con una intensa actividá lliteraria. Rescampla ente la so obra d'esta dómina la so Biografía universal antigua y moderna, una torna del francés qu'espublizó modificándola y ampliándola. Los años vinientes, de 1827 a 1833, pasolos ocupando dellos cargos d'importancia na alministración del estáu.

El 21 d'ochobre de 1833, nel entamu del reináu d'Isabel II embaxu la rexencia de María Cristina de Borbón, foi designáu por Francisco Cea Bermúdez, xefe de gobiernu, Secretariu d'Estáu de Fomentu. Foi nesi cargu nel que desendolcó la so llabor más permanente, la división territorial en provincies, que fizo basándose los plantegamientos del Estáu lliberal pero aprovechando l'antigua constitución en reinos d'España. El decretu foi aprobáu'l 30 de payares, y el 22 d'avientu Javier de Burgos foi nombráu ministru de Facienda. A esti cargu asocediéron-y los de senador y conseyeru real y, en 1846, ministru de la gobernación demientres un breve periodu de tiempu.

Nos caberos años de la so vida volvió a dedicase a la lliteratura. Revisó, como yá se dixera, la so traducción de la obra d'Horaciu, y escribió tamién poesía de circunstancies. Rescamplen ente les sos obres d'esos años una canción fúnebre a la muerte de la reina Isabel de Braganza, una oda al casoriu del rei Fernandu VII con María Cristina de Borbón y, especialmente, la so Oda a la razón y al porvenir. Otres obres a destacar foron la comedia Los tres iguales y unos Anales del reinado de Doña Isabel II que dexó inacabaos y foron completaos pol so fíu Augusto.

• Maestre Rosa, Julio (1972). «Javier de Burgos, liberal doctrinario». Revista de Estudios Políticos (Centro de Estudios Políticos y Constitucionales) (181):  páxs. 133-156. ISSN 0048-7694. http://dialnet.unirioja.es/servlet/articulo?codigo=1945388.