Fai! Asturies

 

Fai! tien el so aniciu n'antigua mocedá del partíu Izquierda Asturiana, MIAS, de la que vienen los más de los militantes "fundadores". De magar el 2005 MIAS esperimentó una mayor medría en militancia y actividá. Nesta medría foi mui significativa la data del 29 de xunetu de 2006, cuando tevo llugar la I Asambleya Xeneral de la organización, encadarmando una Direición Nacional y marcando les llinies d'actuación política a siguir dende esi momentu.

Entóncenes, MIAS participó en manifestaciones y concentraciones (pola oficialidá de la llingua asturiana, pola igualdá ente sexos, escontra la tauromaquia, escontra la invasión d'El Líbanu per parte d'Israel,...), espublizando mensualmente un cartafueyu (na cai>>) onde recoyía les actividaes y comunicaos más importantes, o desenrollando campañes variaes.

Sicasí, Mocedá d'Izquierda Asturiana anunció públicamente a entamos de 2008 la so disolución como organización de mocedá del partíu Izquierda Asturiana por razones de desterciadura estratéxica, según un comunicáu de prensa unviáu a los medios.^[1]

El 29 d'abril d'esi mesmu añu anúnciase nuna rueda de prensa l'aprucida d'una nueva organización, Fai! Asturies, esta vuelta ensin venceyamientu a partíu dalu pero calteniéndose na mesma llinia d'actuación y aduciendo'l so ámbitu. A lo llargo los meses entama la so actividá integrándose nel Conceyu Abiertu pola Oficialidá, asinamesmo preséntase a les eleiciones al Claustru de la Universidá d'Uviéu, algamando dellos representantes y cada vez toma más presencia n'estemaes concentraciones y manifestaciones.

 

• Spanish invaders ¡Defendi Asturies!, primer tirada d'unes 4000 pegadielles denunciando'l colonialismu y la represión político-cultural que carez Asturies
• Esontra la Europa del capital, el neolliberalismu y les 65 hores selmanales, nuevamente 4000 pegadielles con un til anticapitalista.
• ¡Boloña non!, asoléyense cientos de cartelos nos que se vindica una universidá pública y non mercantilizada.
• El rei d'España nun da güelpe dende'l 23-F, campaña antimonárquica denunciando una supuesta complicidá del rei nel güelpe d'estáu del 23-F per aciu d'una tirada de pegadielles.
• Faciendo Xixón, Faciendo Asturies, campaña pa la presentación de la seición xixonesa de Fai!

Fai! tamién realiza un programa biselmanal de radio, Ixuxú!! -radiomagacín sonoru contrainformativu-, que pue sintise un domingu de cada dos en Radio Sele (106.1FM) de magar les 19:00 hores. Nesti programa alcuéntrase una seición nel que s'entrevistaren a estremaes organizaciones sociales y polítiques (Yesca, Milenta muyeres, Agora País Llionés, etc...) asina como otres estayes informatives y musicales. Anguaño la so emisión alcuéntrase suspendida temporalmente por mor del treslláu de Radio Sele, maguer, espérase que torne a emitir en breve.

 

Los primeros actos y concentraciones nes qu'asistió oficialmente Fai! foron la manifestación de la XPDLLA nel Día les Lletres, la celebración del 1u de Mayu en Xixón asina como dalguna concetración escontra les corríes de gües. Mui ceo percanció cierta sonadía na Universidá d'Uviéu debío al enterriu surdíu na facultá de filoloxía, sofitando l'encierru de los estudiantes pola marxinación de la llingua asturiana nos planes d'estudiu. Precisamente la organización llantó un puestín de material nel Derrame Rock, el macrofestival que se desendolcó en Pravia los díes 17, 18 y 19 de xunetu del 2008 ufriendo pegadielles, camisetes o chapes, pero tamién información sobro l'allugamientu'l conflictu alrodiu la especialidá d'asturianu na universidá.

De gran espurriemintu mediático foi l'aición na vuelta ciclista de les Fontes d'Iviernu 2008, enllenando l'asfalte de pintaes vindicatives llegando inevitablemente a ser retresmitíes pelos medios demientres el pasu de los pelotones. Ente los llemes más destacaos, figuraren por exemplu ¡FREE ASTURIES!

Maguer, el so actu principal tevo llugar nel antiguu CSOA de la ReFLEXón el 23 de xunu del 2009, celebrando'l 201 aniversariu de la proclamación de la soberanía de la Xunta Xeneral d'Asturies baxo'l títulu "Asturies Enxamás Vencida". Nesta celebración hebo un recital de poesía, un mural vindicativu y un conciertu nel qu'actuaron grupos como K-Nalón, 13 Palabras, Arma-X y Vinagre de Sidra.

 

2008

• Rueda de prensa de presentación de la organización (29/04/2008).
• Participación na manifestación del 1u de Mayu entamada pola Corriente Sindical d'Izquierda (01/05/2008).
• Participación na manifestación de la Xunta Pola Defensa de la Llingua Asturiana pola oficialidá (09/05/2008).
• Fai! preséntase a les eleiciones del claustru de la universidá y aglama dellos representantes (29/05/2008).
• Fai! ingresa nel Conceyu Abiertu Pola Oficialidá (03/06/2008).
• Fai! pide la entevención urxente del Rector na marxinación del asturianu en filoloxía dos díes dempués de pidi-y en Claustru que se pronunciare (25/06/2008).
• Fai! apoya l'encierru d'estudiantes nel Rectoráu (01/07/2008).
• Fai! entama una campaña col lema "Spanish invaders: ¡Defendi Asturies!" asoleyando 4.000 pegadielles (15/07/2008).
• Participación na manifestación entamada por ANADEL escontra les corríes de gües y el maltratu animal (16/08/2008).
• Fai! demanda n'Uviéu la xunidá del movimientu d'emancipación social y nacional na manifestación del día d'Asturies (08/09/2008.)
• Aición vindicativa na Vuelta Cicilsta Española: Decenes de pintaes na carretera del Puertu S. Isidru (14/09/2008).
• Participación na manifestación entamada pol CAO (04/10/2008).
• Presentación d'un informe col títulu "Filoloxía asturiana y Espaciu Européu d'Educación Superior" (07/10/2008).
• Nueva campaña escontra la Europa del capital, el neolliberalismu y les 65 hores selmanales (09/10/2008).
• Fai! xúnese al Ensame República Asturiana y llama a la movilización pola República Asturiana (16/10/2008).
• Fai! entama "Ixuxú!!" - Magacín sonoru contrainformativu en Radio Sele (19/11/2008).
• I Asambleya Xeneral Estraordinaria de Fai! (20/12/2008).

 

2009

• Fai! participa nes movilizaciones entamaes dende la Plataforma Asturies con Palestina y l'Asambleya Universitaria por Palestina de denuncia de la masacre israelina na franxa de Gaza (09/01/2009).
• Aición vindicativa énte'l 23-F: Pancartes y pegadielles con llema “El rei d'España nun da güelpe dende'l 23-F”(23/02/2009).
• Fai! dumbia cartes de sofitu a les y los estudiantes catalanes y llama al Rector a condergar l'actuación policial (24/03/2009).
• Muralón nuevu de Fai! na entrada d'Uviéu: FREE ASTURIES (31/03/2009).
• Fai! celebra la su I Folixa Nacional, Asturies Enxamás Vencida nel CSOA de la ReFLEXón (23/05/2009) .
• Fai! compadez na rueda de prensa escontra'l desaloxu del CSOA de la ReFLEXón xunto a otros coleutivos (05/06/2009).
• Fai! organízase en Xixón y asoleya 2.000 pegadielles nueves (10/06/2009).
• Fai! acude a la manifestación en solidaridá col Coleutivu de Trabayadores de la Cuenca del Caudal (12/06/2009).

• Nacionalismu asturianu
• MIAS
• Frenti Estudiantil

• Páxina web de la organización Fai! Archiváu 2008-06-03 en Wayback Machine